以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
40:1 Ǹg-bāng ê Ōe
Lín ê Siōng-tè kóng, " Lín tio̍h an-ùi, an-ùi Góa ê jîn-bîn.
40:2 Tio̍h tùi Ê-lú-sa-lèm kóng hó ōe, koh pò i chai, i ê kau-chiàn í-keng chīn, i ê chōe-kò í-keng sià; i ūi tio̍h i it-chhè ê chōe, tùi Siōng-chú ê chhiú ka-pōe siū hêng-hoa̍t.
40:3 Ū tōa-siaⁿ kiò kóng: Tī khòng-iá chún-pī Siōng-chú ê lō͘, tī soa-bô͘ ê tē, siu pêⁿ lán ê Siōng-tè ê tōa lō͘.
40:4 Chiahê soaⁿ-kok lóng beh thūn hō͘ i tīⁿ; tōa-sè ê soaⁿ-thâu lóng beh ku̍t hō͘ i kē. Oan-oat ê beh kái hō͘ i ti̍t; khâm-khia̍t ê beh siu hō͘ i pêⁿ.
40:5 Siōng-chú ê êng-kng it-tēng hián-hiān; só͘-ū ū hia̍t-khì ê ē lóng khòaⁿ-.tio̍h. In-ūi che sī Siōng-chú chhin-chhùi kóng ê.
40:6 Ū siaⁿ kóng: Lí tio̍h kiò! I mn̄g, góa tio̍h kiò siáⁿ-mi̍h? Tio̍h soan-pò͘: Kiàn-nā ū hia̍t-khì ê lóng chhin-chhiūⁿ chháu, i ê êng-kng lóng chhin-chhiūⁿ soaⁿ-.ni̍h ê hoe.
40:7 Chháu ē ta, hoe ē siā, in-ūi Siōng-chú ê khùi chhoe tī i ê téng-bīn. Lâng chin-chiàⁿ sī chhin-chhiūⁿ hoe-chháu.
40:8 Chháu ē ta, hoe ē siā, m̄ koh, lán ê Siōng-chú ê ōe it-tēng éng-oán chûn-chāi.
40:9 Pò hó siau-sit hō͘ Si-óng ê, lí tio̍h chiūⁿ koân soaⁿ; pò hó siau-sit hō͘ Ê-lú-sa-lèm ê, lí tio̍h chīn-la̍t chhut lí ê siaⁿ. Tio̍h chhut siaⁿ, m̄-bián kiaⁿ, tùi Iô-tah ê siâⁿ kóng: Lí khòaⁿ, lín ê Siōng-tè!
40:10 Lí khòaⁿ, chì-koân Siōng-chú beh chhin-chhiūⁿ tōa-koân-lêng-.ê lîm-kàu, I ê chhiú it-tēng ūi I chiáng-koân. Lí khòaⁿ, I ê siúⁿ-sù tī I hia, I ê pò-tap mā tī I ê bīn-chêng.
40:11 I beh chhin-chhiūⁿ bo̍k-chiá kò͘ I ê iûⁿ-kûn, I ē ēng chhiú âⁿ-óa iûⁿ-á-kiáⁿ, kā i phō tī heng chêng, bān-bān-á chhōa hiahê hō͘ iûⁿ-á suh-leng ê.
40:12 Bô Thang Pí ê Siōng-chú
Siáⁿ lâng bat ēng chhiú-sim niû chiahê chúi, ēng chhiú-hó͘-kháu niû kiong-chhong, ēng táu té tāi-tē ê thô͘-soa hún, ēng chhìn-á lâi chhìn soaⁿ-niá, ēng thian-phêng lâi chhìn soaⁿ-thâu?
40:13 Siáⁿ lâng bat chhek-to̍k Siōng-chú ê sim, á-.sī chò I ê bô͘-sū lâi kā I chí-kàu?
40:14 I kah siáⁿ lâng siong-liông, siáⁿ lâng kà-sī I, kā kong-pêⁿ ê lō͘ chí-sī I, koh kā tì-sek kà-sī I, kā thong-ta̍t ê tō-lō͘ kā I chí-kàu?
40:15 Lí khòaⁿ, bān-bîn lóng chhin-chhiūⁿ chúi-tháng ê chi̍t tih chúi, koh chhin-chhiūⁿ thian-phêng téng ê tîn-ai; I kā chiahê tó-sū the̍h khí-.lâi, chhin-chhiūⁿ teh the̍h ke̍k bî-sè ê mi̍h.
40:16 Le-ba-nòng bô kàu-gia̍h thang chò hóe-chhâ, kî-tiong ê cháu-siù bô kàu-gia̍h chò sio-chè.
40:17 Bān-bîn tī I ê bīn-chêng chhin-chhiūⁿ bô mi̍h, hō͘ I khòaⁿ hui-siông bô, to̍h-sī khang-khang.
40:18 Lín kiù-kèng beh kā siáⁿ lâng the̍h-lâi pí-phēng Siōng-tè? Ēng siáⁿ-mi̍h hêng-siōng kah Siōng-tè pí-phēng?
40:19 Ngó͘-siōng sī sai-hū chù-chō, gîn-chhiūⁿ ēng kim kā i an, kā i chù gîn-liān.
40:20 Sàn-chhiah lâng bô la̍t thang hiàn chit khoán mi̍h, chiū kéng bē tàng hiú-hoāi ê chhâ, ūi i chhōe kî-khiáu ê sai-hū, lâi chhāi bē iô-tāng ê ngó͘-siōng.
40:21 Lín kám m̄-chai? Lín kám bô thiaⁿ-.tio̍h? Góa tùi khí-thâu kám bô kā lín kóng? Tùi siat-li̍p tē ê kin-ki khí, lín kám bô liáu-kái?
40:22 Chú chē tī tē ê tōa îⁿ-khoân téng-bīn, tòa tī tē-chiūⁿ ê jîn-bîn chhin-chhiūⁿ chháu-meh; I thián-khui thiⁿ chhin-chhiūⁿ tiùⁿ-pak, kā i an-tì, chhin-chhiūⁿ thang tòa ê pò͘-pêⁿ.
40:23 I hō͘ kun-ông kui tī bô, hō͘ tē-chiūⁿ ê sím-phòaⁿ-koaⁿ chiâⁿ-chò khang-hi.
40:24 In sī tú-á chai, tú-á chèng, i ê châng tú-á tèng-kin tī tē-.ni̍h, Siōng-chú chi̍t-ē chhoe hong tī i téng-bīn, chiū lóng ta-.khì; kńg-lê-á hong kā i chhoe-.khì, chhin-chhiūⁿ chháu-iù ánne.
40:25 Chì-sèng ê kóng, " Lín beh ēng siáⁿ lâng kah Góa pí-phēng, hō͘ Góa kah i pêⁿ? "
40:26 Lín gia̍h thâu khòaⁿ téng-bīn, khòaⁿ sī siáⁿ lâng chhòng-chō chiahê? I chiàu siàu-ba̍k chhōa hiahê bān-kun chhut-.lâi, chi̍t-ê chi̍t-ê chheng in ê miâ; in-ūi I ê koân-lêng, koh in-ūi I ê tōa koân-lêng, tōa khùi-la̍t, liân chi̍t-ê mā bô khiàm.
40:27 Iâ-kop, lí án-chóaⁿ kóng, góa ê tō-lō͘ ún-ba̍t tī Siōng-chú? I-su-la-el, lí ná ē kóng, góa ê àn-kiāⁿ bô tit tio̍h Siōng-tè liāu-lí?
40:28 Lí kám m̄-chai? Lí kám bô thiaⁿ-.tio̍h? Éng-oán chûn-chāi ê Siōng-tè — Siōng-chú, chhòng-chō tē-ke̍k ê, I bô ià, mā bô siān; I ê tì-hūi bô thang chhek-to̍k.
40:29 Ià-siān ê, I hō͘ i lêng-le̍k; nńg-chiáⁿ ê, I ke-thiⁿ i ê khùi-la̍t.
40:30 Siàu-liân lâng mā ē ià ē siān, ióng-chòng ê lâng mā ē poa̍h-tó.
40:31 To̍k-to̍k óa-khò Siōng-chú ê ē tit tio̍h sin ê khùi-la̍t. In ē chhin-chhiūⁿ eng-chiáu thí-si̍t poe koân; in cháu mā bô ià, kiâⁿ mā bô siān.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。