以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
37:1 Kok-ông Phèng I-sá-iah Tam-jīm Kò͘-būn
( LOH 19: 1-7)
Hi-che-kia ông thiaⁿ-.tio̍h, chiū thiah-li̍h i ê saⁿ, chhēng môa-pò͘ ji̍p-khì Siōng-chú ê tiān.
37:2 I chhe koán-ke ê E-li-a-kim, su-kì Siap-ná kah chè-si tiong ê ló-pòe ê lóng chhēng môa-pò͘, khì kìⁿ A-mô͘-su ê kiáⁿ — I-sá-iah sian-ti.
37:3 In tùi i kóng, " Hi-che-kia ánne kóng, ' Kin-á-ji̍t sī hoān-lān, chek-hoa̍t, lêng-jio̍k ê ji̍t, sī chhin-chhiūⁿ kiáⁿ beh chhut-sì, khiok bô la̍t thang seⁿ chhut-.lâi.
37:4 Kiám-chhái Siōng-chú — lí ê Siōng-tè ū thiaⁿ tio̍h Lap-siá-keh ê ōe, to̍h-sī i ê chú A-siul ông chhe i lâi bú-bān éng-oán oa̍h ê Siōng-chú ê ōe, kiámchhái Siōng-chú — lí ê Siōng-tè in-ūi ū thiaⁿ tio̍h chiahê ōe, chiū ē kā i chek-pī. Só͘-í, kiû lí ūi tio̍h iáu chhun lo̍h-.lâi ê jîn-bîn chhut siaⁿ kî-tó. '"
37:5 Hi-che-kia ông ê jîn-sîn chiū khì kìⁿ I-sá-iah.
37:6 I-sá-iah tùi in kóng, " Tio̍h ánne tùi lín ê chú kóng, Siōng-chú ánne kóng, ' Lí thiaⁿ tio̍h A-siul ông ê lô͘-po̍k siat-to̍k Góa ê ōe, m̄-bián kiaⁿ in.
37:7 Lí khòaⁿ, Góa beh ēng chi̍t-ê sîn ji̍p i ê sim, i ē thiaⁿ tio̍h hong-siaⁿ, chiū tò tńg-khì goân-pún ê só͘-chāi, góa ē hō͘ i tī hia tó tī to hā. '"
37:8 A-siul Lâng koh Lâi Ui-hia̍p
( LOH 19: 8-19)
Lap-siá-keh tńg-.khì, tú tio̍h A-siul ông teh phah Lip-nah; i tńg-.khì, sī in-ūi i ū thiaⁿ tio̍h A-siul ông thiat iâⁿ, lī-khui La̍h-ki-sih.
37:9 A-siul ông ū thiaⁿ tio̍h hong-siaⁿ kóng: Kú-si̍t ông Te̍k-hap-ka chhut-lâi beh kah lí kau-chiàn. I chi̍t-ē thiaⁿ-.tio̍h, chiū chhe sù-chiá khì kìⁿ Hi-che-kia, kā in hoan-hù, kóng,
37:10 " Tio̍h tùi Iô-tah ông Hi-che-kia ánne kóng, ' Lí só͘ óa-khò ê Siōng-chú kóng: Ê-lú-sa-lèm it-tēng bô beh kau tī A-siul ông ê chhiú, lí m̄ thang hō͘ i phiàn-.khì.
37:11 Lí khòaⁿ, lí it-tēng ū thiaⁿ-kòe A-siul chiahê ông tùi lia̍t kok só͘ chò ê sī beh kā in choân-pō͘ siau-bia̍t, kám kóng lí iáu ē tit tio̍h kiù?
37:12 Góa ê chó͘-sian só͘ húi-bia̍t ê, to̍h-sī Go-chán, Khal-lân, Le-che-hu kah sio̍k The-la-sal ê E-tiân lâng. Chiahê kok ê sîn-bêng kám bat kā i kiù?
37:13 Ha-mat ê ông, Al-pat ê ông, Se-hoa-ba-im siâⁿ ê ông, He-ná kah A-boah ê ông, in lóng tī tó-ūi? '"
37:14 Hi-che-kia tùi sù-chiá ê chhiú chiap tio̍h phoe, chiū tha̍k. Hi-che-kia chiū chiūⁿ-khì Siōng-chú ê tiān, kā phoe pâi tī Siōng-chú ê bīn-chêng.
37:15 Hi-che-kia tùi Siōng-chú kî-tó kóng,
37:16 " Chē tī ki-lō͘-peng ê tiong-kan, bān-kun ê Siōng-chú — I-su-la-el ê Siōng-tè ah, to̍k-to̍k Lí chò thian-hā bān-kok ê Siōng-chú, Lí bat chhòng-chō thiⁿ-tē.
37:17 Siōng-chú ah, kiû Lí àⁿ hīⁿ-khang lâi thiaⁿ; Siōng-chú ah, kiû Lí khui ba̍k-chiu lâi khòaⁿ. Kiû Lí tio̍h thiaⁿ Se-nah-khe-lip só͘-ū ê ōe; i to̍h-sī chhe sù-chiá lâi bú-bān éng-oán oa̍h ê Siōng-chú ê.
37:18 Siōng-chú ah, A-siul chiahê ông kó-jiân hō͘ lia̍t kok kah in ê tē piàn-sêng pha-hng,
37:19 Mā kā in ê sîn-bêng hiat tī hóe-.ni̍h; in-ūi in m̄-sī Siōng-tè, sī lâng ê chhiú só͘ chō ê, sī chhâ-ê, chio̍h ê, in chiū kā hiahê sîn-bêng châu-bia̍t.
37:20 Siōng-chú — goán ê Siōng-tè ah, taⁿ kiû Lí kiù goán thoat-lī i ê chhiú, hō͘ thiⁿ-ē bān-kok lóng chai: to̍k-to̍k Lí sī Siōng-chú. "
37:21 I-sá-iah hō͘ Ông ê Sìn-sit
( LOH 19:20-37)
A-mô͘-su ê kiáⁿ I-sá-iah chiū chhe lâng khì kìⁿ Hi-che-kia kóng, " Siōng-chú — I-su-la-el ê Siōng-tè ánne kóng, ' Lí kì-jiân in-ūi A-siul ông Se-nah-khe-lip ê iân-kò͘ lâi tùi góa kî-kiû,
37:22 Taⁿ kóng tio̍h i, Siōng-chú ū ánne kóng, Si-óng ê chāi-sek-lí biáu-sī lí, kā lí thí-chhiò; Ê-lú-sa-lèm ê chabó͘ gín'á tùi lí iô thâu.
37:23 Lí lêng-jio̍k bú-bān siáⁿ lâng? Chhut tōa-siaⁿ, ba̍k-chiu niah koân-koân, sī teh kong-kek siáⁿ lâng? Chiū-sī kong-kek I-su-la-el ê chì-sèng ê.
37:24 Lí chhe lí ê lô͘-po̍k lâi bú-bān Siōng-chú kóng: Góa tòa chin chē chiàn-chhia chiūⁿ-kàu soaⁿ koân ê só͘-chāi, kàu Le-ba-nòng ke̍k chhim ê só͘-chāi; góa beh chhò hit-châng koân-tōa ê pek-hiuⁿ chhâ kah siōng hó ê siông chhiū. Góa beh chiūⁿ-kàu ke̍k koân ê só͘-chāi kah hiahê pûi tē ê chhiū-nâ.
37:25 Góa í-keng khui chéⁿ teh lim gōa-pang ê chúi, góa ēng kha-chiúⁿ ta̍h Ai-gi̍p só͘-ū ê hô, hō͘ i ta-.khì. '
37:26 " Siōng-chú kóng, ' Lí kám m̄ bat thiaⁿ tio̍h Góa tī goân-khí-thâu só͘ chò ê, tī kó͘-chá só͘ tiāⁿ tio̍h ê? Taⁿ Góa beh kā i oân-sêng, to̍h-sī beh hō͘ lí húi-hoāi kian-kò͘ ê siâⁿ, hō͘ in piàn-chò hòe-hi.
37:27 Só͘-í, tòa tī kî-tiong ê jîn-bîn khùi-la̍t chin chió, kiaⁿ-hiâⁿ kiàn-siàu. In chhin-chhiūⁿ khòng-iá ê chháu, chheⁿ-chhùi ê chhài, chhin-chhiūⁿ chhù téng ê chháu, chhin-chhiūⁿ chhân-.ni̍h bē tōa châng ê tiū-á.
37:28 " ' Lí chē lo̍h-.khì, lí chhut-.khì, lí ji̍p-.lâi, lí tùi góa ê tōa siū-khì, góa lóng chai.
37:29 In-ūi lí tùi Góa tōa siū-khì, koh in-ūi lí kiau-ngō͘ ê ōe thàng-kàu Góa ê hīⁿ-khang, Góa chiū beh ēng Góa ê kau kau lí ê phīⁿ, ēng Góa ê bé-kā-kiuⁿ khòa tī lí ê chhùi, hō͘ lí tùi goân-lō͘ tò tńg-.khì. '
37:30 " Hi-che-kia, chit-ê hō͘ lí chò tiāu-thâu, kin-nî lín ē chia̍h kakī hoat ê mi̍h, mê-nî ē chia̍h tùi hiahê só͘ chhut ê, kàu tē-saⁿ nî, lín tio̍h chèng-choh siu-koah, chai-chèng phû-tô hn̂g, lâi chia̍h i ê kóe-chí.
37:31 Iô-tah ke thoat-lī hoān-lān só͘ chhun lo̍h-.lâi ê jîn-bîn iû-goân ē ē-bīn tèng-kin, téng-bīn kiat kóe-chí.
37:32 In-ūi ē ū chhun lo̍h-.lâi ê jîn-bîn tùi Ê-lú-sa-lèm chhut-.lâi, ē ū tô-cháu ê lâng tùi Si-óng soaⁿ lâi; bān-kun ê Siōng-chú ê jia̍t-sim ē oân-sêng chit-ê tāichì.
37:33 " Só͘-í, Siōng-chú koan-hē A-siul ông kóng: I it-tēng bē kàu chit-ê siâⁿ, mā bē tī chia siā chìⁿ, bē tàng giâ tîn-pâi kàu siâⁿ chêng, mā bē khí thô͘-tui lâi kong-kek siâⁿ.
37:34 I tùi hit tiâu lō͘ lâi, ē tùi hit tiâu lō͘ tńg-.khì, bē tàng lâi-kàu chit-ê siâⁿ. Che sī Siōng-chú kóng ê.
37:35 In-ūi ūi tio̍h kakī ê iân-kò͘, koh ūi tio̍h góa ê lô͘-po̍k — Ta-bi̍t ê iân-kò͘, góa beh pó-hō͘ chit-ê siâⁿ, lâi kā i chín-kiù. "
37:36 Siōng-chú ê sù-chiá chhut-.khì, tī A-siul iâⁿ tiong phah-sí cha̍p-peh bān gō͘-chheng lâng. Kàu thiⁿ-kng chá-khí khí-.lâi ê sî, lí khòaⁿ, lóng sī sí-lâng ê sin-si.
37:37 A-siul ông Se-nah-khe-lip chiū lī-khui, tńg-.khì, tòa tī Ni-ne-beh.
37:38 Ū chi̍t ji̍t, i tī i ê sîn-bêng Nî-su-lo̍k ê biō kūi-pài ê sî, i ê kiáⁿ — A-to-lam-me-le̍k kah Sia-lé-chel, ēng to kā i thâi-sí, jiân-āu cháu kàu A-la̍h-la̍t ê tē. I ê kiáⁿ —E-sal-ha-tóng sòa-chiap i chò ông.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。