以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
34:1 Siōng-tè beh Têng-hoa̍t Te̍k-jîn
Lia̍t kok, lín tio̍h kiâⁿ óa-lâi thiaⁿ! Chèng lâng, lín tio̍h àⁿ hīⁿ-khang lâi thiaⁿ! Tē kah i só͘ chhiong-móa ê, sè-kài kah kiàn-nā tùi i lâi chhut ê lâng lóng tio̍h thiaⁿ!
34:2 In-ūi Siōng-chú ê siū-khì kàu lia̍t kok, tùi in ê kun-tūi tōa siū-khì, gí-tiāⁿ lóng beh kā in bia̍t-tiāu, kā in kau hō͘ lâng thâi.
34:3 In siū thâi ê lâng it-tēng hông hiat-ka̍k, sin-si ê chhàu-bī ē chhèng khí-.lâi, chiahê soaⁿ ē siū in ê hoeh iûⁿ-hòa.
34:4 Thiⁿ ê bān-siōng ē siau-bia̍t, thiⁿ ē chhin-chhiūⁿ chi̍t pak chheh-koàn kńg khí-.lâi; i ê bān-siōng ē soe-pāi, chhin-chhiūⁿ phû-tô chhiū ê hio̍h soe-pāi, koh chhin-chhiūⁿ bû-hoa-kó chhiū ê soe-pāi.
34:5 In-ūi góa ê to tī thiⁿ-.ni̍h í-keng lim kàu-gia̍h; lí khòaⁿ, chit-ê to ē khì-kàu E-tóm, í-ki̍p góa só͘ gí-tiāⁿ beh bia̍t-bông ê jîn-bîn sin chiūⁿ, lâi kā in sím-phòaⁿ.
34:6 Siōng-chú ê to ū hoeh móa-móa, bak tio̍h iû kah iûⁿ-á-kiáⁿ, soaⁿ-iûⁿ ê hoeh, í-ki̍p kang ê mî-iûⁿ io-chí ê iû; in-ūi Siōng-chú tī Bo-chu-la̍h ū chè-sū, tī E-tóm tē ū tōa tô͘-sat ê tāichì.
34:7 Iá-gû ē tó lo̍h-.lâi, gû-á kah kang ê gû mā sī ánne; in ê tē in-ūi hoeh lâi chùi, in ê thô͘-soa hún in-ūi iû lâi pûi.
34:8 In-ūi Siōng-chú ū pò-siû ê ji̍t, ūi tio̍h Si-óng ê àn-kiāⁿ, ū pò-èng ê nî.
34:9 E-tóm chiahê khe ē piàn-chò tá-má-ka, thô͘-soa hún ē piàn-chò liû-hông; i ê tē chiâⁿ-chò í-keng to̍h ê tá-má-ka.
34:10 Mê-ji̍t lóng bô sit, i ê ian éng-oán chhèng khí-.lâi; tāi-tāi pha-hng, éng-oán bô lâng keng-kòe.
34:11 Thê-ô͘, hô-ti ē tit tio̍h i chò sán-gia̍p; niau-thâu-eng, o͘-a ē tiàm tī hit tiong-kan. I ē kā hong-hùi ê chún-chîn, hūn-tūn ê tūi-sòaⁿ, khan tī i ê téng-bīn.
34:12 In ē kiò chun-kùi ê lâng lâi tī-lí kok-ka, tī hia lóng chhōe bô chi̍t-ê, liân kùi-cho̍k mā lóng bô.
34:13 In ê kiong-tiān ē hoat chhì-phè, siâⁿ-pó ē hoat chi̍t-lê kah chháu-chhì; in ē chiâⁿ-chò soaⁿ-káu ê hia̍t, tô-chiáu ê siū.
34:14 Iá-siù kah chhâi-lông sio tú-.tio̍h; iá soaⁿ-iûⁿ ē kah i ê phōaⁿ tùi-kiò. Àm-sî ê iau-koài ē tī hia hioh, kakī chhōe an-hioh ê só͘-chāi.
34:15 Chìⁿ-chôa ē tī hia chò siū, seⁿ nn̄g, pū nn̄g, chhut kiáⁿ, koh chū-chi̍p kiáⁿ tī i ê pak-tó͘-ē; eng-chiáu chi̍t tùi chi̍t tùi chū-chi̍p tī hia.
34:16 Lín tio̍h chhâ-khó koh tha̍k Siōng-chú ê chheh. Kî-tiong bô khiàm chi̍t hāng tōng-bu̍t, mā bô kah chi̍t chiah bô phit-phòe; in-ūi góa ê chhùi í-keng chhut bēng-lēng, I ê Sèng Sîn í-keng kā in chū-chi̍p.
34:17 I mā ūi in liam-khau, koh chhin-chhiú ēng chún-chîn kā in pun tē; in ē éng-oán tit tio̍h i chò sán-gia̍p, ta̍k sè-tāi tòa tī hia.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。