以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
33:1 Kiû Chō͘ ê Kî-tó
Ū chai-eh ah! Lí chit-ê chhiúⁿ-toa̍t lâng ê, kakī bô siū chhiúⁿ-toa̍t; chò tāichì kúi-chà ê, lâng bô ēng kúi-chà khoán-thāi lí. Lí chhiúⁿ-toa̍t tú-á soah, kakī ē siū chhiúⁿ-toa̍t; lí kiâⁿ kúi-chà tú-á soah, lâng ē ēng kúi-chà khoán-thāi lí.
33:2 Siōng-chú ah, kiû Lí si un hō͘ goán; goán thèng-hāu Lí. Kiû Lí ta̍k chá-khí chò goán ê chhiú, tī goán tú tio̍h hoān-lān ê sî, chò goán ê chín-kiù.
33:3 Soan-hoa ê siaⁿ chi̍t-ē hoat, chèng lâng tô-cháu; lí chi̍t-ē khí-.lâi, lia̍t kok sì-sòaⁿ.
33:4 Lín só͘ chhiúⁿ ê chiàn-lī-phín ē hō͘ lâng siu-khioh, chhin-chhiūⁿ chián-á-thâng teh siu-khioh mi̍h-kiāⁿ; lâng cháu-khì hia, chhin-chhiūⁿ chháu-meh thiàu-lâi thiàu-khì.
33:5 Siōng-chú siū chun-chò koân, in-ūi I tòa tī koân ê só͘-chāi; I ēng kong-pêⁿ kah kong-gī chhiong-móa Si-óng.
33:6 Lí chi̍t-sì-lâng ē tit tio̍h an-ún, ū hong-sēng ê kiù-un, tì-hūi kah tì-sek; kèng-ùi Siōng-chú ē chiâⁿ-chò lí ê pó-pòe.
33:7 Lí khòaⁿ, in ê hô-kia̍t tī gōa-bīn ai-siong; kiû hô ê sù-chiá thòng-sim thî-khàu.
33:8 Tōa lō͘ pha-hng, lóng bô lâng teh kòe lō͘; tùi-te̍k pōe iok, khòaⁿ-khin chiahê siâⁿ, bô iàu-kín jîn-bîn.
33:9 Tē chiūⁿ pi-ai soe-thè; Le-ba-nòng kiàn-siàu ta-.khì; Sia-lông chhin-chhiūⁿ khòng-iá; Ba-siáng kah Kal-mel ê chhiū-ba̍k lak kah kng-kng.
33:10 Siōng-chú Kéng-kò Te̍k-jîn
Siōng-chú tùi bān-kok kóng, " Taⁿ Góa beh khí-.lâi; taⁿ Góa beh heng-khí; taⁿ Góa beh kakī ko-seng.
33:11 Lín hoâi-īn chho͘-khng lâi seⁿ tiū-kó; lín ê khùi ē chhin-chhiūⁿ hóe lâi thun-bia̍t lín.
33:12 Lia̍t-pang ē chhin-chhiūⁿ í-keng sio ê chio̍h-hoe, chhin-chhiūⁿ í-keng koah ê chhì-phè, tī hóe tiong siū sio.
33:13 Lín tī hn̄g ê lâng tio̍h thiaⁿ Góa só͘ kiâⁿ ê, lín tī kīn ê lâng tio̍h chai Góa ê tōa koân-lêng. "
33:14 Si-óng tiong ê chōe-jîn lóng kiaⁿ-hiâⁿ, bô kèng-khiân ê lâng ē ti̍t-ti̍t chhoah. In kóng, " Lán tiong-kan siáⁿ lâng ē kah thun-bia̍t ê hóe chò-hóe tòa? Lán tiong-kan siáⁿ lâng ē kah éng-oán ê sio-húi chò-hóe tòa?
33:15 Kiâⁿ tāichì kong-gī, kóng-ōe chèng-ti̍t, oàn-hūn le̍k-sek ê châi-lī, iô chhiú bô chiap-siū lâng ê o͘-se, that-ba̍t hīⁿ-khang bô thiaⁿ lâu hoeh ê ōe, kheh ba̍k-chiu bô khòaⁿ pháiⁿ tāi ê lâng,
33:16 I ē tòa tī koân ê só͘-chāi; kian-kò͘ ê chio̍h-pôaⁿ ē chò i ê siâⁿ-pó; ē ū bí-niûⁿ kiong-kip i, i ê chúi it-tēng bē choa̍t-tn̄g.
33:17 Kong-êng ê Chiong-lâi
Lí ê ba̍k-chiu ē khòaⁿ tio̍h ông ê súi, ē khòaⁿ tio̍h khui-khoah ê tē.
33:18 Lí ê sim ē hôe-sióng hiahê kiaⁿ-hiâⁿ ê tāichì, koán siàu ê lâng tī tó-ūi? Chhìn chìn-kòng ê gîn ê lâng tī tó-ūi? Sǹg chiú-keⁿ lâu ê lâng tī tó-ūi?
33:19 Lí it-tēng bē koh khòaⁿ tio̍h kiông-béng ê jîn-bîn, to̍h-sī hiahê kóng-ōe oh-thiaⁿ, lí bē bêng-pe̍k; kóng-ōe gí-bú gí-ngiáu, lí bē bêng-pe̍k ê.
33:20 Lí tio̍h khòaⁿ Si-óng, lán siú sèng-cheh ê siâⁿ; lí ê ba̍k-chiu ē khòaⁿ tio̍h Ê-lú-sa-lèm chò an-chēng ê chhù-the̍h, chò bô î-sóa ê pò͘-pêⁿ; i ê khit éng bô poe̍h-chhut, i ê soh lóng bô tn̄g.
33:21 Tī hia, Siōng-chú ē hián-bêng ui-giâm kah lán tông-chāi. I ē chhin-chhiūⁿ kang-hô khui-khoah ê tē; hit tiong-kan it-tēng bô ū kò chiúⁿ ê chûn óng-lâi, mā bô ū ui-hong ê chûn keng-kòe.
33:22 In-ūi Siōng-chú sī lán ê sím-phòaⁿ-koaⁿ, Siōng-chú sī kā lán siat lu̍t-hoat ê; Siōng-chú sī lán ê ông; I ē kā lán chín-kiù.
33:23 Tùi-te̍k ê phâng-soh lóng lut-.khì; chûn-ûi khiā bē chāi, hong-phâng thí bē khui. Hit sî, chin chē chhiúⁿ-.lâi ê mi̍h ē hō͘ lâng pun-.khì; liân pái-kha-.ê mā chhiúⁿ tio̍h mi̍h.
33:24 Tòa tī hia ê jîn-bîn it-tēng bô koh kóng: Góa ū phòa-pēⁿ; siâⁿ tiong jîn-bîn ê chōe-kò lóng ē siū sià-bián.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。