以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
23:1 Tu-lô ê Sìn-sit
Koan-hē Tu-lô ê be̍k-sī. Tal-si-sih ê chûn, lín tio̍h ai-khàu, in-ūi Tu-lô í-keng pha-hng ā, sīm-chì bô chhù-the̍h, mā bô lâng teh chhut-ji̍p. Tùi Kit-thê ê só͘-chāi ū pò in chai chit-ê siau-sit.
23:2 Tòa tī hái-hōaⁿ ê jîn-bîn kah chá-sî kòe hái hō͘ lín tit tio̍h chhiong-sēng ê Si-tòng senglí lâng, taⁿ lín tio̍h tiām-tiām.
23:3 Tī tōa-chúi ê téng-bīn, Si-ho͘l ê bí-niûⁿ, Nai-l hô ê ngó͘-kok sī tùi Tu-lô chìn-ji̍p ê; i chò lia̍t kok ê káng-kháu.
23:4 Si-tòng, lí tio̍h kiàn-siàu, in-ūi tōa hái kóng, to̍h-sī hái-hōaⁿ ê siâⁿ-pó kóng, " Góa bô hoâi-īn, mā bô seⁿ kiáⁿ; bô iúⁿ-chhī chapo͘ kiáⁿ, mā bô hû-ióng chāi-sek-lí. "
23:5 Chit-ê hong-siaⁿ thoân kàu Ai-gi̍p, in ē ūi tio̍h Tu-lô thoân-.lâi ê hong-siaⁿ hui-siông thàng-thiàⁿ.
23:6 Hoe-ní-ke lâng, lín tio̍h kòe-khì Tal-si-sih! Tòa tī hái-hōaⁿ ê jîn-bîn, lín tio̍h ai-khàu.
23:7 Che kám sī lín khoài-lo̍k ê siâⁿ? I ê sè-tāi sī tùi kó͘-chá í-lâi to̍h ū, i ê kha bat sóa kàu hn̄g-hn̄g ê só͘-chāi khiā-khí.
23:8 Sī siáⁿ lâng koat-tēng beh lâi kong-kek Tu-lô? I pún sī sù lâng bián-liû ê, i ê senglí lâng sī ông-chhin, i chò bé-bē ê sī sè-chiūⁿ ê kùi-cho̍k.
23:9 Sī bān-kun ê Siōng-chú tiāⁿ tio̍h ánne, I beh lêng-jio̍k it-chhè êng-kng ê kiau-ngō͘, hō͘ sè-chiūⁿ só͘-ū ê kùi-cho̍k lóng tú tio̍h siū khòaⁿ-khin.
23:10 Tal-si-sih ê jîn-bîn, lí tio̍h chhin-chhiūⁿ Nai-l hô, piàn kiâⁿ lí ê só͘-chāi, bô koh siū khu-sok.
23:11 Siōng-tè í-keng chhun I ê chhiú tī hái-.ni̍h, hō͘ lia̍t kok iô-tāng. Koan-hē Ka-nân, Siōng-chú bat hoan-hù: Tio̍h húi-hoāi i ê siâⁿ-pó.
23:12 Siōng-tè kóng, " Lí siū lêng-jio̍k ê chāi-sek-lí, Si-tòng ê chabó͘ kiáⁿ, lí it-tēng bē koh tit tio̍h khoài-lo̍k. Khí-.lâi! Kòe-khì Kit-thê; to̍h-sī tī hia mā bē tit tio̍h an-hioh. "
23:13 （ Lí khòaⁿ, Kal-tí-ah lâng ê tē, taⁿ chiahê jîn-bîn bô-.khì à, A-siul lâng hō͘ i chò iá-siù tòa ê só͘-chāi. In khí in ê chiú-keⁿ lâu, húi-hoāi in ê kiong-tiān, hō͘ i piàn-chò pha-hng. ）
23:14 Tal-si-sih ê chûn-chiah, lín tio̍h ai-khàu! In-ūi lín ê siâⁿ-pó piàn-chò pha-hng ê só͘-chāi.
23:15 Tng hit ji̍t, Tu-lô ē hō͘ lâng bē kì-tit chhit-cha̍p nî, tú chiàu chi̍t-ê ông ê hòe-siū; chhit-cha̍p nî āu, Tu-lô ê kéng-hóng ē chhin-chhiūⁿ ki-lí só͘ chhiùⁿ ê koa,
23:16 Lí chit-ê hō͘ lâng bē kì-.tit ê ki-lí, the̍h khîm tī siâⁿ lāi sì-kè kiâⁿ; tôaⁿ hó thiaⁿ, chhiùⁿ khah chē, hō͘ lâng koh ē kì-tit lí.
23:17 Chhit-cha̍p nî āu, Siōng-chú ē chiàu-kò͘ Tu-lô, i chiū ē koh thàn chîⁿ kah sè-chiūⁿ ê bān-kok kau-koan.
23:18 I ê hòe-bu̍t kah só͘ thàn ê chîⁿ ē chiâⁿ-chò sèng, kui hō͘ Siōng-chú; bô beh khǹg-.leh, bô beh chek-chū; in-ūi i ê hòe-bu̍t ē kui hō͘ tiàm tī Siōng-chú bīn-chêng ê lâng, hō͘ in chia̍h pá, koh chhēng ē-tàng tòng chin kú ê saⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。