以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
21:1 Ba-bú-lông ê Bia̍t-bông
Koan-hē hái piⁿ khòng-iá ê be̍k-sī. Ū tùi khòng-iá kah tùi thang kiaⁿ ê tē lâi ê, chhin-chhiūⁿ lâm-hong ê kông hong sàu kòe-.khì.
21:2 Hō͘ lâng kiaⁿ ê ī-siōng í-keng be̍k-sī góa, kúi-chà ê kiâⁿ kúi-chà, húi-bia̍t ê kiâⁿ húi-bia̍t. Ê-lám, lí tio̍h khì! Ma-tái, lí tio̍h kā i ûi-khùn! It-chhè ê thó͘-khùi, góa beh hō͘ i soah.
21:3 Só͘-í, góa kui-ê io thàng-thiàⁿ, thòng-khó͘ kā góa khîⁿ tiâu-.leh, chhin-chhiūⁿ chabó͘ lâng seⁿ kiáⁿ ê thòng-khó͘. Góa kiáu-ká thiàⁿ kàu bē tàng thiaⁿ, góa kiaⁿ-hiâⁿ kàu bē tàng khòaⁿ.
21:4 Góa ê sim bê-loān, kiaⁿ-hiâⁿ phah-kiaⁿ góa. Góa só͘ teh iàn-lo̍k ê ê-hng piàn-chò góa ê phi̍h-phi̍h chhoah.
21:5 In pâi-siat iàn-se̍k, phài lâng siú-bōng, mā chia̍h, mā lim. Siú-léng, lín tio̍h khí-.lâi, ēng iû boah lín ê tîn-pâi.
21:6 Chú tùi góa kóng, " Lí khì siat-hoat phài siú-bōng ê lâng, hō͘ i kā só͘ khòaⁿ-.tio̍h ê lâi kā góa pò-kò.
21:7 Tng i khòaⁿ tio̍h kun-tūi kah khiâ bé ê chi̍t tùi chi̍t tùi, koh ū lû tūi, lo̍k-tô tūi lóng teh lâi, chiū ē àⁿ hīⁿ-khang siông-sè thiaⁿ.
21:8 Jiân-āu, i chhin-chhiūⁿ sai teh háu-kiò, kóng, " Chú ah, góa ji̍t-sî tiāⁿtiāⁿ khiā tī bāng-ko lâu, kui mê khiā tī góa chiú-keⁿ ê só͘-chāi. "
21:9 Lí khòaⁿ, ū chi̍t tūi ê bé-peng, chi̍t tùi chi̍t tùi teh lâi. In tiong-kan chi̍t-ê lâng koh ìn kóng, " Ba-bú-lông tó-hoāi à! Tó-hoāi à! I só͘-ū sîn-bêng ê siōng lóng phah-chhùi tī tē-.ni̍h. "
21:10 Góa siū lún ê tiū-pé, góa chhek-tiûⁿ ê ngó͘-kok, góa tùi bān-kun ê Siōng-chú — I-su-la-el ê Siōng-tè só͘ thiaⁿ tio̍h-.ê, lóng kā lín kóng à.
21:11 E-tóm ê Sìn-sit
Koan-hē Tu-mah ê be̍k-sī. Ū lâng tùi Se-il lâi mn̄g góa, " Siú-bōng ê lâng! O͘-àm mê tio̍h kàu tang-sî? Siú-bōng ê lâng! O͘-àm mê tang-sî chiah ē kòe-.khì? "
21:12 Siú-bōng ê lâng ìn kóng, " Chá-khí sî teh beh kàu, o͘-àm mê mā beh lâi. Lí nā beh mn̄g chiū thang mn̄g; thang hôe-thâu koh lâi mn̄g."
21:13 A-la-puh ê Sìn-sit
Koan-hē A-la-puh ê be̍k-sī. Tí-tàn kui tīn ê chhut-gōa lâng, lín ē tī A-la-puh ê chhiū-nâ lāi hioh mê.
21:14 Tòa tī Thê-má ê jîn-bîn phâng chúi chhut-lâi sàng hō͘ chhùi-ta ê lâng, the̍h piáⁿ chhut-lâi gêng-chiap tô-cháu ê lâng.
21:15 In-ūi in siám-phiah lāi-kiàm kah chhut-siù ê to, í-ki̍p peⁿ ân ê kiong kah béng-lia̍t ê kau-chiàn.
21:16 Chú tùi góa ánne kóng, " Chi̍t nî lāi, chiàu chhiàⁿ-kang ê nî-hān, Ke-tal só͘-ū ê êng-kng lóng ē siau-sit-.khì.
21:17 Hiahê gia̍h kiong-chìⁿ ê Ke-tal ióng-sū só͘ chhun lo̍h-.lâi ê gia̍h-sò͘ chió-chió. In-ūi che sī Siōng-chú — I-su-la-el ê Siōng-tè kóng ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。