以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
17:1 Siōng-chú beh Têng-hoa̍t A-lâm kah I-su-la-el
Koan-hē Ta-má-su-ko ê be̍k-sī, Siōng-chú kóng, " Lí khòaⁿ, Ta-má-su-ko í-keng siū hùi-tû-.khì, bô koh chò siâⁿ, it-tēng ē piàn-chò hāu-phiaⁿ-phòe ê tui.
17:2 A-ló-el ê siâⁿ í-keng siū pàng-sak, it-tēng ē chiâⁿ-chò chhī iûⁿ ê só͘-chāi; iûⁿ tó tī hia, bô lâng phah-kiaⁿ in.
17:3 E-hu-laim ê soaⁿ-chē, Ta-má-su-ko ê kok-koân, A-lâm só͘ chhun lo̍h-.lâi ê jîn-bîn, lóng ē chhin-chhiūⁿ I-su-la-el ê êng-kng siau-sit-.khì. Che sī bān-kun ê Siōng-chú kóng ê.
17:4 Kàu hit ji̍t, Iâ-kop ê êng-kng ē soe-lám, i ê pûi seng-khu ē siau-sán.
17:5 Chhin-chhiūⁿ siu-koah ê lâng teh siu ngó͘-kok, ēng chhiú koah hiahê sūi, koh chhin-chhiūⁿ lâng tī Le-hoa-im ê soaⁿ-kok teh khioh be̍h-sap.
17:6 In tiong-kan só͘ chhun lo̍h-.lâi ê bô gōa chē, chhin-chhiūⁿ lâng teh kóng kaⁿ-ná chhiū, tī siōng koân ê ki-bóe, chí ū nn̄g saⁿ lia̍p, tī kóe-chí chhiū chhun hn̄g ê ki bóe, chí ū chhun sì gō͘ lia̍p. Che sī Siōng-chú — I-su-la-el ê Siōng-tè kóng ê.
17:7 Tng hit ji̍t, lâng ē gióng-bōng kā i chhòng-chō ê Chú, ba̍k-chiu ē koan-khòaⁿ I-su-la-el ê sèng ê.
17:8 In bô koh gióng-bōng kakī ê chhiú só͘ khí ê chè-tôaⁿ, bô koh koan-khòaⁿ kakī ê chéng-thâu-á só͘ chō ê chhâ-thiāu á-.sī ji̍t-thâu ê siōng.
17:9 Tī hit ji̍t, in kian-kò͘ ê siâⁿ ē chhin-chhiūⁿ chhiū-nâ lāi kah soaⁿ téng bóe-liu só͘ khì-sak ê só͘-chāi, to̍h-sī in tī I-su-la-el lâng ê bīn-chêng só͘ khì-sak ê; tē chiū ánne pha-hng.
17:10 In-ūi lí bē kì-.tit kiù lí ê Siōng-chú, bē kì-tit chò lí khùi-la̍t ê chio̍h-pôaⁿ; só͘-í, lí chai chin sim-sek ê chhiū-á-chai, mā chèng pa̍t ūi lâi ê chéng.
17:11 Chai-chèng ê ji̍t lí kā i ûi lî-pa, kàu chá-khí sî, hō͘ lí só͘ chèng ê khui hoe. Chóng-.sī, tī iu-khó͘, choa̍t-bāng, thàng-thiàⁿ ê ji̍t, lí só͘ siu-koah ê lóng poe-poe khì.
17:12 Phah-pāi Só͘-ū ê Tùi-te̍k
Lí thiaⁿ! Ū chin chē jîn-bîn ê siaⁿ, in hōa-hōa háu, chhin-chhiūⁿ hái-éng teh hōa-hōa háu. Ū lia̍t kok ê sù-chiá, in cháu-chông chhin-chhiūⁿ tōa-chúi teh cháu-chông.
17:13 Lia̍t-pang ê sù-chiá chhin-chhiūⁿ chin chē chúi teh cháu-chông; chóng-.sī, Siōng-chú kā in hoah, in chiū cháu hn̄g-hn̄g, koh siū jiok, chhin-chhiūⁿ tī soaⁿ téng hō͘ hong teh chhoe ê chho͘-khng, koh chhin-chhiūⁿ tōa hong thâu-chêng teh kńg ê mi̍h.
17:14 Ê-hng sî, ū kiaⁿ-hiâⁿ; thiⁿ iáu-bōe kng, in chiū sí-.khì. Che sī kā goán chhiúⁿ-toa̍t ê lâng só͘ tit tio̍h ê hūn-gia̍h, sī kā goán chhiúⁿ-kiap ê lâng ê pò-èng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。