以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 Tùi Liû-bông Tńg-.lâi
Siōng-chú ē liân-bín Iâ-kop, ē koh kéng-soán I-su-la-el, kā in an-tì tī in ê pún só͘-chāi; kià-kha ê ē lâi kui óa in kah Iâ-kop ke liân-ha̍p.
14:2 Lia̍t-pang ē kā in tòa tò tńg-lâi pún só͘-chāi. I-su-la-el ê chú-bîn ē tī Siōng-chú ê tē tit tio̍h in lâi chò lô͘-po̍k, lú-pī, mā ē chhiúⁿ-lia̍h chá-chêng kā in chhiúⁿ-lia̍h ê lâng, koán-hat chá-chêng kā in ap-chè ê lâng.
14:3 Ba-bú-lông Ông tī Im-kan
Tng Siōng-chú hō͘ lí thoat-lī kan-khó͘ kah hoân-ló, í-ki̍p lâng bián-kióng lí chò ê khó͘-kang, tit tio̍h pêng-an ê ji̍t-chí ê sî,
14:4 lí ē chò chit-ê koa lâi lūn Ba-bú-lông ông, kóng: " Chè-ap lâng ê ná ē kèng-jiân sí-.khì! Le̍k-sek lâng ê ná ē kèng-jiân sí-.khì!
14:5 Siōng-chú ū at-tn̄g pháiⁿ lâng ê koái-á kah koán-hat lâng ê koân-pèng,
14:6 to̍h-sī tī siū-khì tiong liân-liân phah chiahê jîn-bîn, tī siū-khì tiong koán-hat lia̍t kok koh kiâⁿ pek-hāi bô lâng thang chó͘-chí.
14:7 Taⁿ choân tē tit tio̍h an-hioh kah pêng-chēng; lâng lóng chhut hoaⁿ-hí ê siaⁿ.
14:8 Siông chhiū kah Le-ba-nòng ê pek-hiuⁿ chhiū lóng in-ūi lí hoaⁿ-hí, kóng, ' Tùi lí tó lo̍h-.khì í-āu, bô lâng ē koh khí-lâi chhò goán. '
14:9 " Lí lo̍h-.khì ê sî, im-kan chiū ūi lí tín-tāng, lâi kā lí gêng-chiap; koh in-ūi lí, kiaⁿ-tōng hiahê bat tī sè-kan chò léng-siù ê im-hûn, mā hō͘ hiahê bat chò lia̍t kok kun-ông ê lâng lóng tùi i ê chō-ūi khiā khí-.lâi.
14:10 In lóng ē ìn lí kóng, ' Lí mā piàn-chò loán-jio̍k chhin-chhiūⁿ goán? Lí kám mā kah goán kāng-khoán?
14:11 Lí ê ui-hong kah lí ê khîm-sek ê siaⁿ lóng lo̍h kàu im-kan! Pho͘ tī lí ê ē-bīn ê sī thâng, khàm tī lí ê téng-bīn ê sī chhi. '
14:12 Thiⁿ-kng chá-khí ê khé-bêng-chheⁿ, lí ná ē tùi thiⁿ tūi lo̍h-.lâi! Lí chit-ê kong-phòa lia̍t kok ê lâng ná ē siū phah tó tī tē-chiūⁿ?
14:13 Lí ê sim-lāi bat kóng, góa beh chiūⁿ kàu thiⁿ-téng, góa beh tī Siōng-chú chèng chheⁿ ê téng-bīn kí-khí góa ê chō-ūi; góa beh chē tī chū-hōe ê soaⁿ, tī pak-hong ê ke̍k-thâu.
14:14 Góa beh chiūⁿ kàu pí hûn khah koân ê téng-bīn, góa beh kah Chì-koân-.ê pêng-téng.
14:15 Chóng-.sī, lí ē tūi lo̍h-khì im-kan, kàu tī chhim kheⁿ ê ke̍k-thâu.
14:16 Hoān-nā khòaⁿ tio̍h lí ê lâng lóng ē chù-ba̍k khòaⁿ lí, chù-ì siūⁿ lí, kóng,
14:17 ' Hō͘ tāi-tē iô-tāng, hō͘ lia̍t kok tín-tāng, hō͘ sè-kài pha-hng, hō͘ siâⁿ chhiûⁿ chhia-tó, koh bô tháu-pàng siū lia̍h ê lâng tò tńg-khì in tau ê, kám sī chit-ê lâng? '
14:18 " Lia̍t kok ê kun-ông ta̍k-ê lóng ū êng-kng khùn tī i ê bōng.
14:19 To̍k-to̍k lí siū hiat-ka̍k, bē tàng ji̍p-khì lí ê bōng, chhin-chhiūⁿ thang thó-ià ê ki; lí ēng siū thâi ê lâng chò saⁿ, to̍h-sī siū to chha̍k-sí kah tūi lo̍h-khì kheⁿ tiong chio̍h-thâu ê; lí koh chhin-chhiūⁿ siū thún-ta̍h ê sin-si.
14:20 Lí bē tàng kah in tâng-chê bâi-chòng, in-ūi lí pāi-hoāi lí ê kok, thâi-sí lí ê jîn-bîn. Pháiⁿ lâng ê kiáⁿ-sun it-tēng éng-oán bô miâ.
14:21 " In-ūi chó͘-sian ê chōe, tio̍h chún-pī kā in ê kiáⁿ-sun thâi-sí, bián-tit in koh heng khí-lâi chiàm-tē, tī piàn sè-kan khí siâⁿ."
14:22 Siōng-chú beh Húi-bia̍t Ba-bú-lông
Bān-kun ê Siōng-chú kóng, góa beh khí-lâi kā in kong-kek, beh tùi Ba-bú-lông tû-bia̍t i ê miâ kah só͘ chhun lo̍h-.lâi ê lâng, í-ki̍p i ê kiáⁿ-sun. Che sī Siōng-chú kóng ê.
14:23 Góa beh hō͘ i ê tē chiâⁿ-chò hô-ti só͘ tiàm ê só͘-chāi, koh piàn-chò chúi-tî. Góa beh ēng bia̍t-bông ê sàu-chhiú kā i sàu-tû. Che sī bān-kun ê Siōng-chú kóng ê. "
14:24 Siōng-chú beh Húi-bia̍t A-siul
Bān-kun ê Siōng-chú ū chiùchōa kóng, " Góa só͘ siūⁿ ê choa̍t-tùi ē sêng-chiū; Góa só͘ tiāⁿ tio̍h ê choa̍t-tùi ē kiàn-li̍p.
14:25 Góa beh tī Góa ê tē phah-pāi A-siul lâng, tī Góa ê soaⁿ kā in thún-ta̍h. I ê ka-taⁿ ē lī-khui Góa ê jîn-bîn, i ê tāng-tàⁿ ē lī-khui Góa ê jîn-bîn ê keng-kah-thâu. "
14:26 Che sī í-keng tiāⁿ tio̍h beh kiâⁿ tī choân tē ê chí-ì; che sī chhun tī bān-kok téng-bīn ê chhiú.
14:27 Bān-kun ê Siōng-chú í-keng tiāⁿ tio̍h chí-ì, siáⁿ lâng ē-tàng kā i hùi-tû? I ê chhiú í-keng chhun chhut-.khì, siáⁿ lâng ē-tàng hō͘ i kiu tò tńg-.lâi?
14:28 Siōng-chú beh Húi-bia̍t Hui-lī-sū
A-khà-chuh ông sí hit nî, ū chit-ê be̍k-sī:
14:29 Hui-lī-sū ê choân tē, m̄ thang in-ūi phah lí ê koái-á í-keng áu-tn̄g lâi hoaⁿ-hí. In-ūi tùi chôa ê nn̄g ē seⁿ-chhut to̍k-chôa, i só͘ seⁿ ê sī ē poe ê hóe-chôa.
14:30 Sàn-chhiah lâng ê tōa-kiáⁿ ē tit tio̍h chia̍h pá, khiàm-khoeh ê lâng ē an-jiân tó-.leh. Góa beh ēng ki-hng gō sí lí ê chéng-lūi, i ē thâi-sí lí só͘ chhun lo̍h-.lâi ê jîn-bîn.
14:31 Mn̂g tio̍h thî-khàu! Siâⁿ tio̍h tōa-siaⁿ hoah! Hui-lī-sū choân tē, lí ē siau-bia̍t à. In-ūi ū ian tùi pak pêng lâi, jî-chhiáⁿ in ê peng-teng bô kah chi̍t-ê làu-tīn.
14:32 Beh án-chóaⁿ ìn lia̍t kok ê sù-chiá? Tio̍h kóng, " Siōng-chú kiàn-li̍p Si-óng, I ê chú-bîn tiong-kan khùn-khó͘ ê lâng ē tâu-hioh tī hit lāi-bīn. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。