以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
13:1 Siōng-chú beh Têng-hoa̍t Ba-bú-lông
A-mô͘-su ê kiáⁿ I-sá-iah só͘ khòaⁿ tio̍h koan-hē Ba-bú-lông ê be̍k-sī.
13:2 Lín tio̍h tī kng liu-liu ê soaⁿ khiā tōa kî, tùi in chhut siaⁿ ia̍t chhiú, hō͘ in ji̍p-khì kùi-cho̍k ê mn̂g.
13:3 Góa hoan-hù góa só͘ kéng chhut-.lâi ê lâng; góa í-keng ūi tio̍h góa ê siū-khì lâi tiàu góa ê ióng-sū, to̍h-sī hiahê chū-khoa kiau-ngō͘ ê lâng.
13:4 Soaⁿ-.ni̍h ū chin chē lâng ê siaⁿ, chhin-chhiūⁿ kui tōa-tīn ê jîn-bîn, ū chin chē kok ê jîn-bîn chū-chi̍p teh hōa-hōa háu ê siaⁿ. Che sī bān-kun ê Siōng-chú tiám-chê kun-tūi teh beh kau-chiàn.
13:5 In tùi hn̄g ê só͘-chāi lâi, tùi thiⁿ-piⁿ lâi; Siōng-chú kah chip-hêng I ê siū-khì ê ke-si, teh beh húi-bia̍t chit-ê choân tē.
13:6 Lín tio̍h ai-khàu! In-ūi Siōng-chú ê ji̍t-chí kīn là! Chhin-chhiūⁿ húi-bia̍t sī tùi Choân-lêng-.ê lâi!
13:7 Só͘-í, só͘-ū ê chhiú ē nńg lo̍h-.khì, kûn-chiòng ê sim ē siau-iûⁿ.
13:8 In ē kiaⁿ-hiâⁿ; thàng-thiàⁿ ê kan-khó͘ ē kā in khîⁿ-tiâu; in pak-tó͘ kiáu-ká chhin-chhiūⁿ beh seⁿ kiáⁿ ê chabó͘ lâng. Tāi-ke tio̍h-kiaⁿ kah gāng-khì lâi sio tùi khòaⁿ, bīn ná chhin-chhiūⁿ hóe-iām.
13:9 Lí khòaⁿ, Siōng-chú ê ji̍t lîm-kàu; hit ji̍t ē ū chân-jím, thòng-hūn kah tōa siū-khì, hō͘ chit-ê tē pha-hng, koh tùi hit tiong-kan kā ū chōe ê lâng tû-bia̍t.
13:10 Thiⁿ téng ê chèng chheⁿ-sîn lóng bô hoat-chhut kng, ji̍t-thâu tú-á chhut-.lâi chiū piàn o͘-àm, goe̍h mā bô hoat-chhut i ê kng.
13:11 Siōng-Chú kóng, " Góa beh in-ūi siâ-ok lâi hêng-hoa̍t sè-kài, in-ūi chōe-gia̍t lâi hêng-hoa̍t pháiⁿ lâng; hō͘ kiau-ngō͘ ê lâng ê lāmsám soah-.khì, koh ap-chè kiông-pō ê lâng ê kiau-ngō͘.
13:12 Góa beh hō͘ lâng pí sûn-kim khah chió, hō͘ lâng pí O-hui ê kim khah chió.
13:13 Só͘-í, góa beh tī bān-kun ê Siōng-chú ê thòng-hūn kah I tōa siū-khì ê ji̍t-chí, hō͘ thiⁿ tín-tāng, koh hō͘ tē iô-tāng lâi lī-khui i ê pún ūi.
13:14 In ē chhin-chhiūⁿ siū jiok ê lo̍k, chhin-chhiūⁿ bô lâng chū-chi̍p ê iûⁿ, ta̍k lâng tò tńg-khì pún cho̍k, ta̍k lâng tô-cháu khì-kàu i ê pún só͘-chāi.
13:15 Kiàn-nā hông tú-.tio̍h ê ē siū chha̍k thàng-kòe, kiàn-nā hông lia̍h tio̍h ê ē hō͘ to thâi-sí.
13:16 In ê eⁿ-á ē tī in ê ba̍k-chiu chêng hō͘ lâng siak-sí, in ê chhù ē hō͘ lâng chhiúⁿ-toa̍t, in ê bó͘ ē hō͘ lâng lêng-jio̍k.
13:17 Siōng-Chú kóng," Góa beh kek-tōng Ma-tái lâng lâi kā in kong-kek, in bô koh khòaⁿ-tiōng gîn, mā bô ài ti̍h kim.
13:18 In ê kiong ē phah-sí siàu-liân lâng, bô liân-bín chabó͘ lâng ê thai-īn, in ê ba̍k-chiu mā bô khó-liân gín'á.
13:19 Ba-bú-lông pêng-sî chò lia̍t kok ê êng-kng, chò Kal-tí-ah lâng kiau-ngō͘ ê táⁿ-pān, ē chhin-chhiūⁿ So͘-tóm kah Am-mo͘-la̍h hō͘ Siōng-chú só͘ húi-hoāi.
13:20 I ê lāi-bīn it-tēng ē éng-oán bô lâng tòa, tāi-tāi bô lâng tòa; A-la-puh lâng bô tī hia tah pò͘-pêⁿ, kò͘ iûⁿ ê lâng mā bô hō͘ iûⁿ-kûn tó tī hia.
13:21 Chí-ū khòng-iá ê cháu-siù tó tī hia, hm̄-hm̄ háu ê siù-lūi móa chhù-keng; tô-chiáu tiàm tī hia, iá soaⁿ-iûⁿ tī hia thiàu-bú.
13:22 Chhâi-lông ē tī iâⁿ-pâng háu, soaⁿ-káu ē tī i iàn-lo̍k ê kiong-tiān háu. Ba-bú-lông tōa chai-lān ê sî kīn là! I ê ji̍t-chí í-keng bô kú-tn̂g! "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。