以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
10:1 Ū chai-hō à, hiahê siat-li̍p put-gī ê lu̍t-lē, kì-chài kan-chà ê phòaⁿ-sû ê lâng.
10:2 In óng-khut sànchhiah lâng ê àn-kiāⁿ, chhiúⁿ-toa̍t góa ê jîn-bîn tiong khùn-khó͘ ê lâng ê chêng-lí, ēng kóaⁿ-hū chún-chò só͘ chhiúⁿ ê mi̍h, ēng ko͘-jî chún-chò só͘ kiap ê mi̍h.
10:3 Tng kàng hêng-hoa̍t ê ji̍t, ū chai-hō tùi hn̄g-hn̄g lîm-kàu, hit sî lín beh án-chóaⁿ? Lín beh cháu-khì kiû siáⁿ lâng kā lín kiù? Lín ê châi-pó ē lâu tī siáⁿ-mi̍h só͘-chāi?
10:4 Lín chí ū khut-sin tī siū lia̍h ê lâng ê ē-bīn, tó tī siū thâi ê lâng ê ē-bīn. Sûi-jiân ánne, Siōng-chú ê siū-khì iáu-bōe siau, I ê chhiú iû-goân chhun-.leh.
10:5 Siōng-chú Ēng A-siul Ông Chò Kang-kū
Siōng-chú kóng, " A-siul sī góa siū-khì ê thûi, in ê chhiú tiong gia̍h góa ê thòng-hūn chò koái.
10:6 Góa beh chhe i kong-kek siâ-ok ê pang-kok, hoan-hù i kong-kek góa só͘ siū-khì ê jîn-bîn, khì chhiúⁿ i só͘ chhiúⁿ ê, khì lia̍h i só͘ lia̍h ê, koh chhin-chhiūⁿ ke-lō͘ ê thô͘-môe kā in thún-ta̍h.
10:7 Chóng-.sī, A-siul ông m̄-sī chit khoán ì-sù, i ê sim mā m̄-sī chit-ê phah-sǹg. I ê sim-lāi tian-tò siūⁿ beh húi-bia̍t, siūⁿ beh châu-bia̍t chin chē kok.
10:8 In-ūi i kóng, góa ê jîn-sîn kám bô lóng sī ông?
10:9 Kal-neh kám m̄-sī chhin-chhiūⁿ Kal-ke-mí-si? Ha-mat kám m̄-sī chhin-chhiūⁿ Al-pat? Sa-má-lī-a kám m̄-sī chhin-chhiūⁿ Ta-má-su-ko?
10:10 Góa ê chhiú í-keng chhun-kàu ngó͘-siōng ê kok, in tiau-khek ê ngó͘-siōng iâⁿ-kòe Ê-lú-sa-lèm kah Sa-má-lī-a ê ngó͘-siōng.
10:11 Góa án-chóaⁿ khoán-thāi Sa-má-lī-a kah kî-tiong ê ngó͘-siōng, kám bē chiàu ánne khoán-thāi Ê-lú-sa-lèm kah kî-tiong ê ngó͘-siōng? "
10:12 Chú tī Si-óng soaⁿ kah Ê-lú-sa-lèm oân-sêng I it-chhè só͘ chò ê tāichì ê sî, kóng, " Góa beh hêng-hoa̍t A-siul ông sim-kiau ê hêng-ûi kah i ê ba̍k-thâu koân. "
10:13 In-ūi A-siul ông kóng, góa só͘ oân-sêng ê tāichì sī ēng góa ê chhiú ê lêng-le̍k kah góa ê tì-hūi, in-ūi góa ū chhong-bêng. Góa î-sóa lia̍t kok ê tē-kài, chhiúⁿ in ê châi-pó, góa koh chhin-chhiūⁿ ióng-sū hō͘ chē koân ūi ê kàng chò kē.
10:14 Góa ê chhiú the̍h tio̍h lia̍t kok ê châi-pó, chhin-chhiūⁿ the̍h chiáu-á siū. Góa tit tio̍h choân tē, chhin-chhiūⁿ khioh tio̍h hông pàng-sak ê chiáu-á nn̄g; bô ū phia̍t si̍t ê, bô ū khui chhùi ê, bô ū háu-kiò ê.
10:15 Taⁿ pó͘-thâu kám ē tùi gia̍h kakī lâi chhò chhâ ê lâng khoa-kháu? Kù-á kám ē tùi hit-ê thoa kì ê lâng phòng-hong? Che sī chhin-chhiūⁿ thûi-á ē ūn-choán hit-ê gia̍h i ê lâng, koh chhin-chhiūⁿ koái-á ē gia̍h-khí hit-ê m̄-sī chhâ chò ê lâng.
10:16 In-ūi ánne, Chú — bān-kun ê Chú ē hō͘ pûi ê lâng piàn siau-sán. Tī I êng-kng ê ē-bīn ē ū hóe to̍h khí-.lâi, ná chhin-chhiūⁿ hóe teh sio.
10:17 I-su-la-el ê kng beh chò hóe, i ê sèng ê beh chò hóe-iām; tī chi̍t ji̍t ê tiong-kan, kā i ê chhì-phè kah chi̍t-lê sio liáu-liáu.
10:18 I ê chhiū-nâ kah pûi tē ê êng-kng, tùi sîn-hûn kàu jio̍k-thé lóng kā i sio bia̍t-tiāu, sè-bīn chhin-chhiūⁿ phòa-pēⁿ ê lâng chiām-chiām soe-pāi.
10:19 Chhiū-nâ chhun bô kúi châng chhiū-á, gín'á mā ē-hiáu kì i ê sò͘-gia̍h.
10:20 Só͘ Chhun ê Lâng Tńg-.lâi
Kàu hit ji̍t, I-su-la-el só͘ chhun lo̍h-.lâi ê kah Iâ-kop ke só͘ tô-thoat ê lâng bô koh óa-khò hit-ê kā in phah ê, sī beh sêng-si̍t óa-khò Siōng-chú — I-su-la-el ê sèng ê.
10:21 Só͘ chhun lo̍h-.lâi ê lâng ē tò tńg-.lâi, to̍h-sī Iâ-kop ke só͘ chhun lo̍h-.lâi ê, ē kui tī choân-lêng Siōng-tè.
10:22 I-su-la-el, lí ê jîn-bîn sûi-jiân chē kah chhin-chhiūⁿ hái soa, chí ū chhun lo̍h-.lâi ê lâng tò tńg-.lâi. Soe-pāi ê tāichì í-keng tiāⁿ tio̍h, koh ēng kong-gī lâi chhiong-móa.
10:23 In-ūi Chú — bān-kun ê Siōng-chú, tī choân tē tiong-kan ē kiâⁿ só͘ tiāⁿ tio̍h ê bia̍t-bông.
10:24 Siōng-chú Têng-hoa̍t A-siul
Só͘-í, Chú — bān-kun ê Siōng-chú ánne kóng, " Tòa tī Si-óng ê Góa ê chú-bîn, A-siul sûi-jiân ēng thûi kā lín phah, koh chhin-chhiūⁿ Ai-gi̍p ê khoán, gia̍h koái-á kong-kek lí, lí m̄-bián kiaⁿ i.
10:25 " In-ūi koh chi̍t-sî-á, Góa tùi lín ê siū-khì chiū ē siau-.khì, jî-chhiáⁿ Góa ê siū-khì ē tùi in ê bia̍t-bông lâi soah.
10:26 Bān-kun ê Siōng-chú ē gia̍h-khí piⁿ lâi kā i phah, chhin-chhiūⁿ tī Gô-li̍p ê chio̍h-pôaⁿ phah Mí-tiân; I ê koái-á ē chhun tī hái ê téng-bīn, I ē chhin-chhiūⁿ tī Ai-gi̍p gia̍h-khí I ê koái-á.
10:27 Kàu hit ji̍t, A-siul ê tāng-tàⁿ ē lī-khui lí ê keng-kah-thâu, i ê ka-taⁿ ē lī-khui lí ê ām-kún, i ê ka-taⁿ mā ē in-ūi boah iû ê iân-kò͘ lâi húi-hoāi."
10:28 Chhim-lio̍k-chiá Chìn-kong
A-siul kàu A-ia̍p, keng-kòe Mik-lông, kā hêng-lí pàng tī Mik-mah.
10:29 In keng-kòe koan-kháu, tī Ge-bah hioh mê. La̍h-má lâng kiaⁿ-hiâⁿ; Sàu-lô ê Gi-be-at lâng tô-cháu.
10:30 Tòa tī Ka-lîm ê jîn-bîn tio̍h tōa-siaⁿ hoah! Lâi-sa, lí tio̍h àⁿ hīⁿ-khang lâi thiaⁿ! Chhám ah, khùn-khó͘ ê A-ná-thot!
10:31 Mat-me-nah lâng siám-phiah; tòa tī Ge-bím ê jîn-bîn tô-cháu.
10:32 Hit ji̍t, i chat-peng tī Νo͘p; pí kûn-thâu-bú ǹg Si-óng siâⁿ ê soaⁿ, to̍h-sī Ê-lú-sa-lèm ê soaⁿ-thâu.
10:33 Lí khòaⁿ, Chú — bān-kun ê Siōng-chú, ēng hō͘ lâng thang kiaⁿ ê ui-giâm lâi chhò chhiū-ki; tn̂g ê ē siū chhò, koân ê ē siū kàng kē.
10:34 Ām ê chhiū-nâ, I ē ēng thih-khì kā i chhò khí-.lâi, jî-chhiáⁿ Le-ba-nòng ē tùi tōa koân-lêng ê lâi tó lo̍h-.khì.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。