出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
10:1 Chháu-me̍h ê Chai-lān
Siōng-chú tùi Mô͘-se kóng, " Lí ji̍p-khì kìⁿ Hôa-láu, in-ūi Góa í-keng hō͘ i ê sim kah i ê jîn-sîn ê sim giám-ngē, thang hō͘ Góa hián-bêng Góa chiahê sîn-jiah tī in tiong-kan,
10:2 Mā ē hō͘ lí kā Góa tī Ai-gi̍p só͘ chò ê tāichì kah Góa tī in tiong-kan só͘ kiâⁿ chiahê sîn-jiah, thoân hō͘ lí ê kiáⁿ-sun thiaⁿ, thang hō͘ lín chai Góa sī Siōng-chú. "
10:3 Mô͘-se kah A-lông chiū khì kìⁿ Hôa-láu, kā i kóng, " Siōng-chú — Hi-bú-lâi lâng ê Siōng-tè ánne kóng, ' Lí tī Góa ê bīn-chêng m̄-khéng kakī khiam-pi, beh kàu tang-sî? Lí tio̍h chún Góa ê chú-bîn lī-khui, hō͘ in lâi ho̍k-sāi Góa.
10:4 Lí nā m̄-khéng hō͘ Góa ê jîn-bîn lī-khui, lí khòaⁿ, bîn-á-chài Góa beh hō͘ chháu-meh ji̍p-khì lí ê kéng lāi,
10:5 In ē jia-khàm tē-bīn, tì-sú khòaⁿ bē tio̍h thô͘, koh ē chia̍h hit-ê tùi chai-hō só͘ chhun lo̍h-.lâi ê, to̍h-sī pha̍uh só͘ phah bô liáu ê, mā ē chia̍h chhân-.ni̍h ūi lín só͘ hoat it-chhè ê chhiū-ba̍k.
10:6 Chháu-me̍h ē chhiong-móa lí ê chhù kah lí ê chèng jîn-sîn ê chhù, í-ki̍p só͘-ū Ai-gi̍p lâng ê chhù, tùi lí ê lāu-pē kah lí ê chó͘-sian chhut-sì kàu taⁿ, m̄ bat khòaⁿ tio̍h ánne. '" Mô͘-se chiū oa̍t tńg-sin, lī-khui Hôa-láu chhut-.khì.
10:7 Hôa-láu ê jîn-sîn tùi i kóng, " Chit-ê lâng chò lán ê lô-bāng, ē kàu tang-sî-chūn? Tio̍h chún chiahê lâng khì ho̍k-sāi Siōng-chú — in ê Siōng-tè! Ai-gi̍p í-keng pāi-hoāi, lí kám m̄-chai? "
10:8 Chiū ánne, Mô͘-se kah A-lông siū-tiàu tò tńg-lâi kìⁿ Hôa-láu, Hôa-láu kā in kóng, " Lín khì ho̍k-sāi Siōng-chú — lín ê Siōng-tè; to̍k-to̍k hiahê siūⁿ beh khì ê, tàu-té sī siáⁿ-mi̍h khoán lâng? "
10:9 Mô͘-se kóng, " Goán beh kah goán ê siàu-liân lâng, lāu lâng khì, mā beh chhōa goán ê kiáⁿ-jî kah goán ê iûⁿ-kûn, gû-kûn chò-hóe khì, in-ūi goán tio̍h siú Siōng-chú ê cheh. "
10:10 Hôa-láu tùi in kóng, " Hó là, góa chún lín kah lín ê gín'á khì! Goān Siōng-chú kah lín tông-chāi, lín tio̍h kín-sīn, chai-hō í-keng tī lín ê ba̍k-chiu chêng ā!
10:11 Án-ne bē chò-.tit, kantaⁿ lín chiahê tōa-lâng thang khì ho̍k-sāi Siōng-chú, in-ūi che sī lín só͘ kiû ê. " Chiū tùi Hôa-láu ê bīn-chêng kā in kóaⁿ chhut-.khì.
10:12 Siōng-chú kā Mô͘-se kóng, " Lí chhun chhiú kí Ai-gi̍p tē, hō͘ chháu-meh khí-lâi Ai-gi̍p tē, chia̍h tē-.ni̍h it-chhè ê chhài-se, to̍h-sī pha̍uh phah bô liáu ê. "
10:13 Mô͘-se chiū chhun i ê koái-á, kí Ai-gi̍p tē. Siōng-chú chiū hō͘ tang-hong kui ji̍t kui mê chhoe tī tē-.ni̍h. Kàu bîn-á chá-khí, tang-hong chiū kā chháu-meh chhoe-.lâi.
10:14 Chháu-me̍h khí-lâi Ai-gi̍p choân tē, hioh tī Ai-gi̍p ê sì-kho͘-ûi, lī-hāi kàu-ke̍k. Chá-chêng bô ū ánne ê chháu-meh, í-āu mā bē koh ánne.
10:15 In-ūi in jia-khàm choân tē, tì-sú tē lóng o͘-àm, koh chia̍h tē-chiūⁿ it-chhè pha̍uh só͘ phah bô liáu ê chhài-se kah chhiū-.ni̍h ê kóe-chí. Ai-gi̍p choân tē, bô-lūn chhiū-ba̍k á-.sī chhân-.ni̍h ê chhài-se, bô lâu kah chi̍t hāng chheⁿ-chhùi ê mi̍h.
10:16 Chiū ánne, Hôa-láu kóaⁿ-kín kiò Mô͘-se kah A-lông lâi, kóng, " Góa tek-chōe lín ê Siōng-tè — Siōng-chú, mā tek-chōe lín.
10:17 Taⁿ kiû lí koh chi̍t pái sià-bián góa ê chōe, kiû lín ê Siōng-tè — Siōng-chú hō͘ góa thoat-lī chit pái ê sí-bông. "
10:18 Mô͘-se chiū lī-khui Hôa-láu, khì kiû Siōng-chú.
10:19 Siōng-chú chiū sàu chin thàu ê sai-hong kā chháu-meh chhoe khí-.lâi, kóaⁿ ji̍p-khì Âng-hái, bô lâu kah chi̍t chiah chháu-meh tī Ai-gi̍p ê sì-kho͘-ûi.
10:20 Chóng-.sī, Siōng-chú hō͘ Hôa-láu ê sim ngē, m̄-chún I-su-la-el lâng lī-khui.
10:21 O͘-àm ê Chai-lān
Siōng-chú kā Mô͘-se kóng, " Lí chhun chhiú ǹg thiⁿ, hō͘ Ai-gi̍p tē o͘-àm, chit-ê o͘-àm ē o͘ kah bē bong-.tit.
10:22 Mô͘-se chiū chhun chhiú ǹg thiⁿ, Ai-gi̍p chiū choân tē-saⁿ ji̍t o͘-o͘ àm-àm.
10:23 Chit saⁿ ji̍t, lâng khòaⁿ bē tio̍h lâng, mā bô khí-lâi lī-khui i ê só͘-chāi; to̍k-to̍k I-su-la-el lâng ê chhù lóng ū kng.
10:24 Hôa-láu chiū kiò Mô͘-se lâi kóng, " Lín khì ho̍k-sāi Siōng-chú; to̍k-to̍k lín ê iûⁿ-kûn, gû-kûn tio̍h lâu-.leh, lín ê gín'á chiū thang kah lín chò-hóe khì. "
10:25 Mô͘-se kóng, " Lí mā tio̍h kā seng-lé kah sio-chè ê mi̍h kau goán ê chhiú, hō͘ goán thang chè-sū Siōng-chú — goán ê Siōng-tè.
10:26 Goán ê chengseⁿ mā tio̍h kah goán chò-hóe khì, liân chi̍t chiah mā bô beh lâu-.leh, in-ūi goán tio̍h tùi hit tiong-kan chhú-lâi ho̍k-sāi Siōng-chú — goán ê Siōng-tè. Goán koh iáu-bōe kàu hia, mā m̄-chai tio̍h ēng siáⁿ-mi̍h lâi ho̍k-sāi Siōng-chú. "
10:27 Chóng-.sī, Siōng-chú hō͘ Hôa-láu ê sim ngē, m̄-khéng hō͘ in lī-khui.
10:28 Hôa-láu kā Mô͘-se kóng, " Lí tio̍h lī-khui góa-.khì, lí tio̍h kakī kín-sīn, m̄ thang koh-chài lâi kìⁿ góa ê bīn, in-ūi lí koh-chài kìⁿ góa ê bīn hit ji̍t, lí ē sí. "
10:29 Mô͘-se kóng, " Lí ánne kóng, hó! Góa bô beh koh-chài kìⁿ lí ê bīn ā. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。