以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 Bī-lâi ê Kun-ông
Chóng-.sī, hit-ê bat siū thòng-khó͘ ê tē bô koh tiàm tī o͘-àm. Chá-chêng Siōng-tè hō͘ Che-bú-lông kah Ná-hu-tha-lím ê tē siū khòaⁿ-khin, āu-lâi chiū hō͘ iân hái ê lō͘, Iol-tàn hô ê hô gōa, gōa-pang ê Ga-lí-la-iah tit tio̍h êng-kng.
9:2 Kiâⁿ tī o͘-àm tiong ê jîn-bîn khòaⁿ tio̍h tōa kng; tòa tī sí-ìm ê tē ê jîn-bîn ū kng chiò in.
9:3 Lí hō͘ chit-ê jîn-bîn chin chē, mā ke-thiⁿ in ê hoaⁿ-hí; in tī Lí ê bīn-chêng hoaⁿ-hí, chhin-chhiūⁿ siu-koah ê hoaⁿ-hí, chhin-chhiūⁿ lâng pun tio̍h só͘ chhiúⁿ ê mi̍h hit khoán ê khoài-lo̍k.
9:4 In-ūi i só͘ phāiⁿ ê tāng-tàⁿ kah keng-kah-thâu téng ê koái-á, í-ki̍p kā i ap-chè ê thûi, Lí lóng kā i at-tn̄g, kah tī Mí-tiân ê ji̍t-chí sio-siâng.
9:5 In-ūi kau-chiàn tiong chhēng chiàn-kah ê lâng ê kun-chong kah kō tī hoeh lāi ê saⁿ lóng ē siū sio, chò hiâⁿ hóe ê chhâ.
9:6 In-ūi ū chi̍t-ê eⁿ-á ūi lán lâi chhut-sì! Ū chi̍t-ê Kiáⁿ siúⁿ-sù hō͘ lán! I beh hū-tām kok-chèng, I ê miâ kiò-chò kî-biāu ê bô͘-sū, choân-lêng Siōng-tè, éng-oán chûn-chāi ê Thiⁿ-pē, hô-pêng ê kun-ông.
9:7 I ê kok-chèng kah pêng-an ē ke-thiⁿ bû kiông-chīn. Tī Ta-bi̍t ê pó-chō kah i ê kok, I ē ēng sím-phòaⁿ kah kong-gī lâi kiàn-li̍p i, pó-hō͘ i, tùi taⁿ kàu éng-oán. Bān-kun ê Siōng-chú ê jia̍t-sim ē chiâⁿ chit-ê tāichì.
9:8 Siōng-chú Beh Têng-hoa̍t I-su-la-el
Chú hoat-chhut chi̍t kù ōe hō͘ Iâ-kop ke, hit-ê ōe mā lîm-kàu tī I-su-la-el cho̍k.
9:9 Chiahê chèng jîn-bîn, to̍h-sī E-hu-laim kah tòa tī Sa-má-lī-a ê lâng lóng ē chai. In chiàu in kiau-ngō͘ chū-tōa ê sim kóng,
9:10 " Chng piah í-keng tò, goán beh phah chio̍h lâi khí; sng-châi chhiū í-keng chhò, goán beh ēng pek-hiuⁿ chhiū lâi thè-ōaⁿ. "
9:11 Só͘-í, Siōng-chú ē khí-tōng Le-chín ê tùi-te̍k lâi kā i kong-kek, mā ē kek-tōng i ê tùi-te̍k.
9:12 Tang ū A-lâm lâng, sai ū Hui-lī-sū lâng; in khui chhùi thun-chia̍h I-su-la-el. Sûi-jiân ánne, Siōng-chú ê siū-khì iáu-bōe siau, I ê chhiú iáu koh chhun-.leh.
9:13 Chit-ê jîn-bîn iû-goân bô kui-ǹg kā in phah ê Chú, mā bô cháu-chhōe bān-kun ê Siōng-chú.
9:14 Só͘-í, Siōng-chú tī chi̍t ji̍t ê tiong-kan ē tùi I-su-la-el chám-tn̄g thâu kah bóe, chang chhiū-ki kah lô͘-úi.
9:15 Láu-tōa kah chun-kùi ê lâng to̍h-sī thâu, ēng pe̍h-chha̍t ōe kà-sī lâng ê sian-ti to̍h-sī bóe.
9:16 In-ūi ín-chhōa chiahê jîn-bîn ê lâng hō͘ in kiâⁿ chhe-lō͘, hō͘ in ín-chhōa ê lâng lóng siū thun-bia̍t.
9:17 Só͘-í, Chú bô hoaⁿ-hí in ê siàu-liân lâng, mā bô beh liân-bín in ê ko͘-jî, kóaⁿ-hū; in-ūi ta̍k lâng lóng sī siat-to̍k ê, lóng sī kiâⁿ pháiⁿ ê, jî-chhiáⁿ ta̍k lâng ê chhùi lóng sī teh kóng gōng ōe. Sûi-jiân ánne, Siōng-chú ê siū-khì iáu-bōe siau, I ê chhiú iû-goân chhun-.leh.
9:18 In-ūi siâ-ok chhin-chhiūⁿ hóe teh to̍h, sio-bia̍t chhì-phè kah chi̍t-lê, koh to̍h tī ām-ām ê chhiū-nâ, chiâⁿ-chò ian-thiāu, tńg-se̍h chhèng chiûⁿ thiⁿ.
9:19 In-ūi bān-kun ê Siōng-chú ê tōa siū-khì, tē-sì-kè siū hóe sio, jîn-bîn chiâⁿ-chò to̍h hóe ê chhâ; hiaⁿ-tī bô hō͘-siōng khó-liân.
9:20 Lâng chiàⁿ pêng chhiúⁿ-toa̍t, iû-goân sī iau; tò pêng thun-chia̍h, iû-goân bē pá; ta̍k lâng kā i kakī chhiú-kut ê bah.
9:21 Má-ná-se kong-táⁿ E-hu-laim, E-hu-laim kong-táⁿ Má-ná-se, nn̄g cho̍k koh liân-ha̍p kong-táⁿ Iô-tah. Sûi-jiân ánne, Siōng-chú ê siū-khì iáu-bōe siau, I ê chhiú iáu koh chhun-.leh.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。