以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 I-sá-iah ê Kiáⁿ Tòng-chò Kì-hō
Siōng-chú tùi góa kóng, " Lí the̍h chi̍t tè tōa pâi, ēng lâng thong-hêng ê jī lâi siá, lūn-khí Ma-hel-sia-lal-ha-si-ba-chuh（ Chù, Hi-bú-lâi bûn, ì-sù sī " Chhiúⁿ-kiap liâmpiⁿ ē kàu "）.
8:2 Góa ē kiò sêng-si̍t ê kiàn-chèng, to̍h-sī chè-si U-lī-a kah E-be-le-kia ê kiáⁿ Cha-kha-lī-a, lâi chò kiàn-chèng. "
8:3 Góa kah sian-ti niû tâng-pâng, i chiū hoâi-īn seⁿ kiáⁿ. Siōng-chú ū tùi góa kóng, " Kā i hō-miâ kiò-chò Ma-hel-sia-lal-ha-si-ba-chuh;
8:4 in-ūi chit-ê eⁿ-á bē hiáu kiò a-pa, a-bú ê chìn-chêng, Ta-má-su-ko ê châi-pó kah Sa-má-lī-a siū chhiúⁿ ê mi̍h lóng ē hông poaⁿ-khì tī A-siul ông ê bīn-chêng. "
8:5 A-siul Ông teh beh Lâi
Siōng-chú koh tùi góa kóng,
8:6 " In-ūi chiahê jîn-bîn thó-ià Si-ló-ám bān-bān-á teh lâu ê chúi, khah kah-ì Le-chín kah Le-má-liah ê kiáⁿ,
8:7 só͘-í, Chú ē hō͘ hit-ê hô chin tōa koh chin hiông ê chúi-lâu, to̍h-sī A-siul ông kah i it-chhè ê êng-kng lâi im in. Tōa chúi ē pôaⁿ-kòe só͘-ū ê chúi-kau, tiòng móa chiahê hōaⁿ;
8:8 ē chhiong ji̍p-khì Iô-tah, tiòng móa sì-kè im-chúi, koân kàu ām-kún. Em-má-nu-el, i ê si̍t thí-khui, phiàn-móa lí ê tē. "
8:9 Lia̍t kok ê jîn-bîn, chhut-chāi lín soan-hoa, kàu bóe it-tēng ē siū phò-hoāi. Hn̄g ê lâng tio̍h àⁿ hīⁿ-khang lâi thiaⁿ; chhut-chāi lín hâ io, it-tēng ē siū phò-hoāi, chhut-chāi lín hâ io, it-tēng ē siū phò-hoāi.
8:10 Chhut-chāi lín siat kè-bô͘, it-tēng ē kui tī khang-khang; chhut-chāi lín gī-lūn, it-tēng bē sêng-li̍p; in-ūi Siōng-chú kah goán tông-chāi.
8:11 Siōng-chú Kéng-kò Sian-ti
Siōng-chú ēng tōa koân-lêng ê chhiú chí-sī góa, ēng ōe kéng-kài góa kóng m̄ thang kiâⁿ chiahê jîn-bîn só͘ kiâⁿ ê lō͘. I tùi góa kóng,
8:12 " Chit-ê jîn-bîn só͘ kóng ê tông-bô͘, lín m̄ thang kóng; in só͘ kiaⁿ ê, lín m̄-bián kiaⁿ, mā m̄ thang lún.
8:13 Chóng-.sī, tio̍h chun bān-kun ê Siōng-chú chò sèng; I sī lín só͘ tio̍h kiaⁿ ê, só͘ tio̍h lún ê.
8:14 I ē chò sèng-só͘, mā ē tùi I-su-la-el kah Iô-tah nn̄g ke chò hō͘ lâng poa̍h-tó ê chio̍h, chó͘-gāi lâng ê chio̍h-pôaⁿ; tùi tòa tī Ê-lú-sa-lèm ê jîn-bîn chò oa̍h-tauh kah lô-bāng.
8:15 Ū chin chē lâng ē kha that tio̍h lâi poa̍h-tó, poa̍h kah chhùi-chhùi, mā ē hō͘ i bāng tio̍h, lia̍h tio̍h.
8:16 M̄-thang Khì Mn̄g Sí-Lâng
Lí tio̍h kā kiàn-chèng ê ōe kńg ân-ân, tī góa ha̍k-seng ê tiong-kan kā lu̍t-hoat hong ba̍t.
8:17 Góa beh thèng-hāu Siōng-chú, to̍h-sī tī Iâ-kop ê ke kakī am bīn ê Siōng-tè, góa mā beh gióng-bōng I.
8:18 Lí khòaⁿ, góa kah Siōng-chú só͘ hō͘ góa ê kiáⁿ tī chia. Goán lóng sī bān-kun ê Siōng-chú, to̍h-sī tiàm tī Si-óng soaⁿ ê, chhe-phài tī I-su-la-el tiong-kan lâi chò tiāu-thâu kah kì-hō ê.
8:19 Nā ū lâng tùi lín kóng, " Lín tio̍h khì mn̄g tâng-ki kah kiâⁿ siâ-su̍t ê lâng, in ê siaⁿ-im ki-ki kiu̍h-kiu̍h, giân-gí sè-sè." Lín tio̍h ìn kóng, " Jîn-bîn mn̄g i ê Siōng-tè kám m̄ tio̍h? Kám thang ūi tio̍h oa̍h-lâng khì mn̄g hiahê sí-lâng? "
8:20 Lâng tio̍h chiàu lu̍t-hoat kah kiàn-chèng ê ōe, nā bô chun-thàn chit-ê ōe lâi kóng, chiū bē tàng khòaⁿ tio̍h chá-khí sî ê kng.
8:21 Hoān-lān ê Sî-chūn
In ē keng-kòe chit-ê tē siū kan-khó͘, siū iau-gō. Iau-gō ê sî, sim-lāi kakī siū-khì, chiù-chó͘ in ê ông kah in ê Siōng-tè.
8:22 In gia̍h thâu khòaⁿ thiⁿ, àⁿ-lo̍h khòaⁿ tē, bô siūⁿ kóng choân-pō͘ lóng sī kan-khó͘ kah thòng-khó͘ ê o͘-àm, koh hông kóaⁿ ji̍p-khì tī o͘-o͘ àm-àm ê lāi-bīn.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。