以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 Siōng-chú Ho͘-tiàu I-sá-iah Chò Sian-ti
Tng O͘-chi-a ông sí hit nî, góa khòaⁿ tio̍h Chú chē tī koân-koân ê pó-chō, I ê saⁿ-khò͘ sôe lo̍h-lâi cha̍h móa sèng-tiān.
6:2 Tī I ê téng-bīn ū se-la̍h-peng kin-tòe teh khiā; in kok ū la̍k ki si̍t, ēng nn̄g ki si̍t jia bīn, nn̄g ki si̍t jia kha, nn̄g ki si̍t teh poe.
6:3 In koh chit-ê chhiùⁿ, hit-ê hô, kóng: Sèng chài, sèng chài, sèng chài, bān-kun ê Siōng-chú! I ê êng-kng chhiong-móa choân tē.
6:4 Mn̂g-kheng in-ūi chhiùⁿ hô ê siaⁿ lâi tín-tāng; tiān chiū ū ian-bū móa-móa.
6:5 Hit sî, góa kóng, " Góa ū chai-hō ah! Góa ē bia̍t-bông ah! In-ūi góa sī chhùi-tûn bô chheng-khì ê lâng, koh tiàm tī chhùi-tûn bô chheng-khì ê jîn-bîn tiong-kan; in-ūi góa ba̍k-chiu ū khòaⁿ tio̍h Ông — bān-kun ê Siōng-chú. "
6:6 Ū chi̍t-ê se-la̍h-peng poe-lâi óa-kīn góa, i ê chhiú the̍h jia̍t-jia̍t ê hóe-thòaⁿ, sī ēng hóe khîⁿ tùi tôaⁿ téng the̍h lo̍h-.lâi ê.
6:7 I kā hóe-thòaⁿ hē tī góa ê chhùi, kóng, " Lí khòaⁿ, chit-ê hē tī lí ê chhùi-tûn, lí ê chōe-kò chiū tû-.khì, lí ê chōe-ok chiū sià-bián. "
6:8 Góa koh thiaⁿ tio̍h Chú ê siaⁿ kóng, " Góa thang chhe siáⁿ lâng? Siáⁿ lâng beh ūi goán khì? " Góa chiū kóng, " Góa tī chia, thang chhe góa! "
6:9 I kóng: Lí khì kā chiahê jîn-bîn kóng: " Lín thiaⁿ sī ū teh thiaⁿ, m̄ koh, bē bêng-pe̍k; khòaⁿ sī ū teh khòaⁿ, chóng-.sī, bē hiáu-gō͘.
6:10 Tio̍h hō͘ chiahê jîn-bîn sim tūn, hīⁿ-khang tāng, ba̍k-chiu kheh ba̍t; bián-tit in ēng ba̍k-chiu khòaⁿ-.tio̍h, ēng hīⁿ-khang thiaⁿ-.tio̍h, sim ē bêng-pe̍k, oa̍t tò-tńg, lâi tit tio̍h i hó. "
6:11 Góa chiū kóng, " Chú ah, che ē ū gōa kú? " I kóng, " Kàu chiahê siâⁿ pha-hng, bô lâng tòa, chhù lāi bô lâng, thó͘-tē-ke̍k-kî pha-hng,
6:12 koh kàu Siōng-chú chhian-sóa hiahê lâng khì-kàu hn̄g-hn̄g ê só͘-chāi, chit-ê tē chin chē lóng hông pàng hē-.leh..
6:13 Tī hit tiong-kan nā iáu chhun cha̍p-hūn chi-it, mā ē siū thun-bia̍t. Chhin-chhiūⁿ la̍t chhiū kah siōng chhiū, sûi-jiân hông chhò khí-.lâi, chóng-.sī, chhiū thâu iáu lâu-.leh; ánne, ū chit-ê sèng ê kiáⁿ-sun, to̍h-sī hit-ê chhiū thâu iáu lâu-.leh.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。