以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 Éng-oán ê Hô-pêng
( MKS 4: 1-3)
A-mô͘-su ê kiáⁿ I-sá-iah só͘ tit tio̍h koan-hē Iô-tah kah Ê-lú-sa-lèm ê be̍k-sī.
2:2 Kàu hiahê ji̍t liáu-āu, Siōng-chú tiān ê soaⁿ beh kiàn-li̍p tī chiahê soaⁿ ê téng-bīn, pôaⁿ-kòe só͘-ū ê soaⁿ-niá; bān-kok lóng ē lâi kui-sūn.
2:3 Ū chin chē kok ê jîn-bîn ē khì, kóng, " Lâi, lán lâi-khì chiūⁿ Siōng-chú ê soaⁿ, kàu Iâ-kop ê Siōng-tè ê tiān; I ē ēng I ê tō-lō͘ kà-sī lán, lán mā ē kiâⁿ I ê lō͘; in-ūi lu̍t-hoat ē tùi Si-óng chhut, Siōng-chú ê ōe ē tùi Ê-lú-sa-lèm thoân-pò͘."
2:4 Siōng-tè ē tī lia̍t kok tiong lâi sím-phòaⁿ, ūi tio̍h chin chē jîn-bîn lâi kái-koat. In ē kā in ê to phah-chò lê-thâu, kā in ê chhiuⁿ phah-chò liâm-á. Chit kok bô gia̍h to kong-kek hit kok, in mā bô koh ha̍k-si̍p kau-chiàn.
2:5 Iâ-kop ê ke, tio̍h lâi! Lán tio̍h tī Siōng-chú ê kng-bêng tiong lâi kiâⁿ.
2:6 Kiau-ngō͘ ê lâng ē siū kàng kē
Siōng-chú, Lí ū pàng-sak Lí ê chú-bîn, Iâ-kop ê ke; in-ūi in chhiong-móa tang-hong ê hong-sio̍k, chhin-chhiūⁿ Hui-lī-sū lâng teh kiâⁿ siâ-su̍t, mā kah gōa-pang lâng kiat iok.
2:7 In ê tē ū kim-gîn móa-móa, in ê châi-pó sǹg bē liáu; in ê tē ū bé móa-móa, in ê chhia mā sǹg bē liáu.
2:8 In ê tē ū ngó͘-siōng móa-móa, in kūi-pài kakī ê chhiú só͘ chō ê siōng, to̍h-sī kakī ê chéng-thâu-á só͘ chò ê siōng.
2:9 Pi-chiān ê lâng khut-lo̍h, chun-kùi ê lâng kàng kē. Lí m̄ thang kā in sià-bián.
2:10 Lí tio̍h ji̍p-khì chio̍h-tōng, bih tī thô͘-.ni̍h, siám-phiah Siōng-chú ê hián-hek kah I ui-giâm ê êng-kng.
2:11 Kàu hit ji̍t, ba̍k-thâu koân ê lâng ē siū kàng kē, kiau-ngō͘ ê lâng ē siū khut-lo̍h; to̍k-to̍k Siōng-chú chì-chun bô pí.
2:12 In-ūi bān-kun ê Siōng-chú ū chi̍t ji̍t ē kong-kek só͘-ū kiau-ngō͘ ê lâng, só͘-ū seng koân ê lâng lóng ē kàng kē.
2:13 Siōng-chú koh kong-kek Le-ba-nòng só͘-ū koân-tōa ê pek-hiuⁿ chhiū kah Ba-siáng só͘-ū ê siōng chhiū;
2:14 Kong-kek só͘-ū ê koân soaⁿ kah só͘-ū tōa ê soaⁿ-niá;
2:15 Kong-kek só͘-ū ê siâⁿ-pó kah só͘-ū kian-kò͘ ê siâⁿ chhiûⁿ;
2:16 koh kong-kek Tal-si-sih só͘-ū ê chûn-chiah kah só͘-ū thang ì-ài ê súi mi̍h.
2:17 Kiau-ngō͘ ê lâng ē siū khut-lo̍h, kiau-ngō͘-ê lâng ē siū kàng-chò kē; tī hit ji̍t, to̍k-to̍k Siōng-chú chì-chun bô pí.
2:18 Ngó͘-siōng ē chò chi̍t-ē siau-bia̍t.
2:19 Siōng-chú khí-.lâi, hō͘ tē tōa tín-tāng ê sî, lâng chiū ji̍p-khì chio̍h-tōng, ji̍p-khì thô͘-khang, siám-phiah Siōng-chú ê hián-hek kah I ui-giâm ê êng-kng.
2:20 Kàu hit ji̍t, lâng ē kā só͘ chō lâi pài ê gîn ê ngó͘-siōng kah kim ê ngó͘-siōng, hiat hō͘ chhân-chhú kah bi̍t-pô.
2:21 Kàu Siōng-chú khí-.lâi, hō͘ tē tōa tín-tāng ê sî, lâng ē ji̍p-khì chio̍h-pôaⁿ phāng kah soaⁿ-tōng, siám-phiah Siōng-chú ê hián-hek kah I ui-giâm ê êng-kng.
2:22 Lín m̄ thang óa-khò sè-kan lâng, in chí-put-kò sī ū chi̍t kháu khùi tī phīⁿ-khang, in thang sǹg-chò sī siáⁿ-mi̍h?
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。