傳道書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
12:1 Lí tio̍h tī siàu-liân ê ji̍t-chí, kì-liām chhòng-chō lí ê Chú, to̍h-sī hoān-lān ê ji̍t iáu-bōe kàu, mā sī lí só͘ kóng ê " Góa bô thang tùi ánne tit tio̍h khoài-lo̍k ", hiahê nî iáu-bōe chiap-kīn ê sî;
12:2 tī ji̍t, kng, goe̍h kah chheⁿ iáu-bōe piàn-chò o͘-àm, í-ki̍p hō͘ kòe-liáu, hûn iáu-bōe koh lâi ê chìn-chêng;
12:3 tng kò͘ chhù ê lâng phi̍h-phi̍h chhoah, ū la̍t ê lâng so͘-io, e bō ê lâng in-ūi lâng chió chiū soah-.khì, tùi thang-á khòaⁿ chhut-.khì lóng o͘-àm ê sî;
12:4 tng thàng ke-lō͘ ê mn̂g koaiⁿ-.leh, e bō ê siaⁿ sè-sè; tng chiáu-á chi̍t-ē háu, lâng chiū khí-.lâi. Chhiùⁿ koa ê chabó͘ gín'á ê siaⁿ mā lóng kàng kē ê sî;
12:5 tng lâng kìⁿ tio̍h koân chiū kiaⁿ, tī lō͘ tiong mā iú-só͘ kiaⁿ-ùi ê sî; tng hēng chhiū khui hoe, chháu-meh chò tāng-tàⁿ, io̍k-sim lóng sí-.khì ê sî. Jiân-āu lâng kui tī i éng-oán ê chhù, ai-khàu ê lâng tī ke-lō͘ lâi-lâi khì-khì;
12:6 tng gîn liân-á iáu-bōe tn̄g, kim óaⁿ iáu-bōe phòa, tī chúi-chôaⁿ piⁿ ê chúi-pân iáu-bōe sún-hoāi, ka-lak iáu-bōe pháiⁿ tī kó͘-chéⁿ téng;
12:7 tī tîn-ai hoán-pún kui thó͘, lêng-hûn kui tī hō͘ i lâi ê Siōng-tè hia chìn-chêng, tio̍h kì-liām chhòng-chō lí ê Chú.
12:8 Thoân-tō-chiá kóng: Khang-hi ê khang-hi, hoân-sū lóng sī khang-hi.
12:9 Kiat-bóe ê Ōe
Thoân-tō-chiá m̄ nā ū tì-hūi, i koh kà-sī jîn-bîn tì-sek, mā tiām-tiām siūⁿ, chhâ-khó, koh chiàu chhù-sū pâi-lia̍t chin chē chim-giân.
12:10 Thoân-tō-chiá choan-sim chhōe thang hoaⁿ-hí ê ōe, sī chiàu chèng-ti̍t siá chin-lí ê ōe.
12:11 Tì-hūi lâng ê ōe chhin-chhiūⁿ chhì, in pian-chi̍p ê gí-lio̍k chhin-chhiūⁿ tèng-tiâu ê teng, lóng sī tùi chi̍t-ê bo̍k-chiá só͘ sù ê.
12:12 Góa ê kiáⁿ, iáu ū chi̍t chân ōe, lí tio̍h siū khoàn-kái; tù chheh chē, bû kiông-chīn; tha̍k chheh chē, seng-khu ē ià-siān.
12:13 Chiahê tāichì lóng í-keng thiaⁿ-liáu à; kiat-bóe to̍h-sī tio̍h kèng-ùi Siōng-tè, kín-sīn chun-siú I ê kài-bēng. Che to̍h-sī lâng chê-pī ê pún-hūn.
12:14 In-ūi kiàn-nā só͘ chò ê kah it-chhè ún-ba̍t ê tāichì, bô-lūn sī hó sī pháiⁿ, Siōng-tè lóng ē sím-phòaⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。