傳道書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 Bêng-tì kah Gû-gōng ê Chha-pia̍t
Miâ-siaⁿ pí hó ê ko-iû khah hó; lâng sí ê ji̍t pí chhut-sì ê ji̍t khah hó.
7:2 Khì pān song-sū ê ke pí khì iàn-lo̍k ê ke khah hó; in-ūi che sī chèng lâng ê kiat-kio̍k, oa̍h ê lâng mā ē kā chit-ê tāichì hē tī sim-.ni̍h.
7:3 Iu-būn pí hoan-chhiò khah hó, in-ūi bīn tài iu-iông ē hō͘ sim khoài-lo̍k.
7:4 Tì-hūi lâng ê sim tī pān song-sū ê ke; gû-gōng lâng ê sim tī khoài-lo̍k ê ke.
7:5 Thiaⁿ tì-hūi lâng ê chek-pī, pí thiaⁿ gû-gōng lâng ê chhiùⁿ koa khah hó.
7:6 Gōng lâng ê chhiò chhin-chhiūⁿ tiáⁿ-ē teh sio chhì-á ê siaⁿ. Che mā sī khang-hi.
7:7 Le̍k-sek ē hō͘ tì-hūi ê lâng piàn gû-gōng, o͘-se ē pāi-hoāi lâng ê sim-su.
7:8 Hó thâu put-jû hó bóe. Sim jím-nāi iâⁿ-kòe sim kiau-ngō͘.
7:9 Lí ê sim m̄ thang sò-sèng lâi siū-khì; in-ūi siū-khì chûn tī gōng lâng ê sim-hoâi.
7:10 Lí m̄ thang kóng, chá-chêng ê ji̍t-chí ná ē iâⁿ-kòe hiān-kim ê ji̍t-chí? In-ūi lí ánne mn̄g m̄-sī chhut tī tì-hūi.
7:11 Tì-hūi kah sán-gia̍p kāng-khoán sī hó, tùi khòaⁿ tio̍h ji̍t-kng ê lâng, koh khah ū lī-ek.
7:12 In-ūi tì-hūi ē tì-ìm lâng, chîⁿ-gîn mā ē tì-ìm lâng; chóng-.sī, tì-hūi ē pó-choân i pún-lâng ê oa̍h-miā, che to̍h-sī tì-sek ê lī-ek.
7:13 Lí tio̍h siūⁿ Siōng-tè ê chok-ûi, in-ūi I hō͘ i oan-.khì ê, siáⁿ lâng ē-tàng hō͘ i koh piàn ti̍t?
7:14 Heng-thong ê ji̍t, lí tio̍h hoaⁿ-hí; tú tio̍h hoān-lān ê ji̍t, lí tio̍h su-sióng. In-ūi Siōng-tè hō͘ nn̄g hāng pêⁿ-pêⁿ pâi-teh, ūi tio̍h beh hō͘ lâng chhâ bē chhut sin-āu ū siáⁿ-mi̍h sū.
7:15 Ū gī lâng kiâⁿ gī, tian-tò bia̍t-bông; ū pháiⁿ lâng kiâⁿ pháiⁿ, tian-tò chia̍h tn̂g hòe-siū. Góa tī khang-hi ê ji̍t-chí lóng ū khòaⁿ-.tio̍h.
7:16 M̄-thang kiâⁿ gī siuⁿ chē, m̄ thang tì-hūi kòe-thâu; lâng ná ē pāi-hoāi kakī?
7:17 M̄-thang kiâⁿ pháiⁿ siuⁿ chē, mā m̄ thang chò gōng lâng, ná ē ū lâng kî iáu-bōe kàu to̍h lâi sí?
7:18 Lí chhî-siú chit-ê sī hó, hit-ê mā m̄ thang pàng chhiú, in-ūi kèng-ùi Siōng-tè ê lô͘-po̍k ē-tàng thoat-lī chiahê tāichì.
7:19 Tì-hūi hō͘ tì-hūi ê lâng ū lêng-le̍k, iâⁿ-kòe siâⁿ lāi cha̍p-ê chiáng-koân-chiá.
7:20 Kiâⁿ hó koh bô hoān chōe ê gī lâng, sè-chiūⁿ si̍t-chāi sī bô chit khoán lâng.
7:21 Lâng só͘ kóng ê ōe m̄ thang lóng hē tī sim-lāi, chiah bián-tit thiaⁿ tio̍h lí ê lô͘-po̍k kā lí chiù-chó͘.
7:22 In-ūi lí ê sim kakī chai, lí mā bat chin chē pái chiù-chó͘ pa̍t lâng.
7:23 Góa bat ēng tì-hūi chhì-giām só͘-ū ê tāichì; góa kóng, góa beh chò tì-hūi ê lâng, chóng-.sī, tì-hūi lī-khui góa hn̄g-hn̄g.
7:24 Só͘-ū ê tāichì sī hn̄g koh chhim, siáⁿ lâng ē-tàng chhek-to̍k?
7:25 Góa oa̍t tńg-lâi siūⁿ, góa choan-sim ài chai, ài chhâ-khó, mā chhōe tì-hūi kah bān sū ê lí-iû, koh ài chai siâ-ok sī gû-gōng, gû-chhún sī tian-kông.
7:26 Góa koh chhâ-chhut chi̍t hāng pí sí khah kan-khó͘ ê tāichì, to̍h-sī ū chi̍t chióng chabó͘ lâng, i ê sim sī oa̍h-tauh kah lô-bāng, i ê chhiú sī só-liān; só͘-ū tit tio̍h Siōng-tè hoaⁿ-hí ê lâng ē siám-phiah i; chóng-.sī, ū chōe ê lâng hō͘ i lia̍h tio̍h.
7:27 Thoân-tō-chiá kóng, lí khòaⁿ, góa ài chai i ê sò͘-gia̍h, chi̍t hāng chi̍t hāng lâi pí-kàu, chiū chhōe tio̍h chit-ê.
7:28 Góa ê sim ài beh chhōe i mā bē tàng chhōe-.tio̍h. Ū lâng kóng, " Tī chi̍t chheng lâng ê tiong-kan góa ē chhōe tio̍h chi̍t-ê chèng-ti̍t ê chapo͘ lâng, tī hiahê lâng ê tiong-kan, góa bô chhōe tio̍h chi̍t-ê chèng-ti̍t chabó͘ lâng. "
7:29 Lí khòaⁿ, góa chí ū chhōe tio̍h chit-ê, to̍h-sī Siōng-tè chhòng-chō lâng pún sī chèng-ti̍t, chóng-.sī, in chhōe-chhut chin chē kî-khiáu ê kè-bô͘.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。