傳道書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 Góa koh oa̍t tńg-lâi khòaⁿ, khòaⁿ tio̍h tī ji̍t-kng ê ē-bīn só͘ hoat-seng ê it-chhè ê ap-pek. Lí khòaⁿ, siū ap-pek ê teh lâu ba̍k-sái, mā bô lâng an-ùi. In bô tit tio̍h an-ùi, sī in-ūi ap-pek in ê ū sè-le̍k..
4:2 In-ūi ánne, góa oló hiahê í-keng sí-.khì ê sí-lâng, iâⁿ-kòe hiahê iáu oa̍h-.leh ê oa̍h-lâng.
4:3 M̄ koh, hit-ê iáu-bōe chhut-sì ê, to̍h-sī khòaⁿ bē tio̍h ji̍t-kng ê ē-bīn só͘ hoat-seng ê pháiⁿ tāi ê, i pí chit nn̄g chióng iáu khah hó.
4:4 Góa koh khòaⁿ tio̍h lâng ūi tio̍h it-chhè ê lô-khó͘ kah ta̍k chióng kî-khiáu ê kang, chiū hō͘ chhù-piⁿ oàn-tò͘. Che mā sī khang-hi, mā sī lia̍h-hong.
4:5 Gû-gōng ê lâng chhiú phah chhe, chia̍h kakī ê bah.
4:6 Chi̍t chhiú móa-móa koh ū pêng-an, iâⁿ-kòe nn̄g chhiú móa-móa lâi lô-lo̍k lia̍h-hong.
4:7 Góa koh oa̍t tńg-lâi khòaⁿ, tī ji̍t-kng ê ē-bīn ū khang-hi ê tāichì.
4:8 Ū lâng ko͘-toaⁿ bô phōaⁿ, bô kiáⁿ mā bô hiaⁿ-tī. I kèng-jiân lô-lo̍k bô soah, i ê ba̍k-chiu bô khòaⁿ chîⁿ-châi chò kàu-gia̍h. I kóng, " Góa lô-lo̍k khek-khó͘ kakī, bô hióng-hok, tàu-té sī teh ūi siáⁿ lâng? " Che mā sī khang-hi, mā sī ke̍k tāng ê lô-khó͘.
4:9 Nn̄g-ê lâng chóng pí chi̍t-ê lâng khah hó, in-ūi in chò-hóe lô-khó͘ tit tio̍h hó ê hāu-kó.
4:10 Poa̍h-tó ê sî, chit-ê lâng thang hû i ê tâng-phōaⁿ khí-.lâi; nā-sī toaⁿ-sin lâi poa̍h-tó, bô pa̍t lâng hû i khí-.lâi, chit-ê lâng chiū ū chai-hō.
4:11 Jî-chhiáⁿ nn̄g lâng chò-hóe khùn chiū ē sio-lō; nā kakī chi̍t-ê lâng khùn, ná ē sio lè?
4:12 Tan-tan chi̍t-ê lâng, lâng chiū ē phah-iâⁿ i; nā ū nn̄g-ê lâng, chiū ē tí-tòng i; saⁿ kó͘ ê soh bē hiah kín tn̄g.
4:13 Sàn-chhiah koh ū tì-hūi ê siàu-liân lâng, iâⁿ-kòe nî lāu koh m̄-khéng siū kàn-chèng ê gōng ông.
4:14 Chit-ê lâng sī tùi kaⁿ lāi chhut-lâi chò ông; tī i ê kok lāi, chhut-sì sī sànchhiah lâng.
4:15 Góa khòaⁿ tio̍h tī ji̍t-kng ê ē-bīn teh kiâⁿ ê oa̍h-lâng, lóng chun-thàn hit-ê siàu-liân lâng, to̍h-sī tē-jī-ê, sòa-chiap i ê ūi ê lâng.
4:16 I só͘ koán ê jîn-bîn chin chē, sǹg bē liáu; chóng-.sī, āu-lâi ê lâng bô ūi tio̍h i lâi hoaⁿ-hí. Che mā sī khang-hi, mā sī lia̍h-hong.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。