箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
31:1 Tùi Ông ê Khoàn-bián
Mak-sá ông Le-mu-el ê lāu-bú só͘ kà-sī ê ōe,
31:2 Góa ê kiáⁿ, góa chhin-seⁿ ê kiáⁿ, góa hē goān tit tio̍h ê kiáⁿ, góa tio̍h án-chóaⁿ kā lí kà-sī?
31:3 M̄-thang kā lí ê cheng-le̍k choân-pō͘ hō͘ chabó͘ lâng, lí ê só͘ chò m̄ thang chiàu hiahê pāi-hoāi ê ông.
31:4 Le-mu-el, chò ông lim chiú sī bô ha̍p-gî; ông-chhin nā kóng, " Kāu-chiú tī tó-ūi? ", mā sī bô ha̍p-gî.
31:5 Khióng-kiaⁿ in lim lo̍h-khì chiū bē kì-tit lu̍t-hoat, phòaⁿ-toàn só͘-ū siū khó͘ ê lâng ê àn-kiāⁿ chiū ē ū phian-chha.
31:6 Kāu-chiú tio̍h hō͘ teh beh sí ê lâng lim, chiú tio̍h hō͘ kan-khó͘-sim ê lâng lim;
31:7 hō͘ i lim-liáu bē kì-tit i ê sànchhiah, bô koh ē kì-tit i ê kan-khó͘.
31:8 Lí tio̍h ūi é-káu ê lâng lâi khui chhùi, ūi só͘ ū bô i-óa ê lâng lâi sin-oan.
31:9 Lí tio̍h khui chhùi chiàu kong-gī phòaⁿ-toàn, ūi khùn-khó͘ kah sànchhiah ê lâng sin-oan.
31:10 Ū Châi-tek ê Cha-bó͘ Lâng
Siáⁿ lâng chhōe ē tio̍h ū châi-tek ê chabó͘ lâng? I ê kè-ta̍t tōa-tōa iâⁿ-kòe pó-chio̍h.
31:11 I ê tiōng-hu ê sim óa-khò i, lóng bô khiàm-khoeh siáⁿ-mi̍h.
31:12 I chi̍t-sì-lâng ê ji̍t-chí, hō͘ tiōng-hu ū lī-ek bô sún-hāi.
31:13 I ēng mî-iûⁿ ê mn̂g kah iù-môa chò saⁿ, kam-sim ēng chhiú chò-kang.
31:14 I chhin-chhiūⁿ siong-chûn, tùi hn̄g-hn̄g ūn bí-niûⁿ lâi.
31:15 Thiⁿ bōe kng, i chiū khí-.lâi, ūi chhù lāi ê lâng chún-pī chia̍h-mi̍h, koh kā eng-kai chò ê kang hun-phài hō͘ lú-pī.
31:16 I chim-chiok khòaⁿ chhân-hn̂g, nā ū hó ê thó͘-tē chiū bé khí-.lâi, koh ēng i ê chhiú só͘ thàn ê chîⁿ lâi chai-chèng phû-tô hn̂g.
31:17 I ēng khùi-la̍t chò tòa hâ io, koh hō͘ i ê chhiú-kut giám-ngē.
31:18 I chai-iáⁿ i só͘ keng-êng ê sī ū lī-ek; i kui mê chò-kang, teng-hóe lóng bô hoa.
31:19 I ê chhiú the̍h ák-á, i ê chhiú-sim hōaⁿ pháng-chhia.
31:20 I chhut-chhiú chín-chè kan-khó͘ lâng, chhun chhiú pang-chān sànchhiah lâng.
31:21 I m̄-bián in-ūi lo̍h seh lâi ūi chhù lāi ê lâng chhau-hoân, in-ūi choân ke lóng chhēng chu-âng ê saⁿ-khò͘.
31:22 I ūi kakī chò súi ê thán-á; i chhēng iù-tē pò͘ kah chí-sek pò͘ ê saⁿ-khò͘.
31:23 I ê tiōng-hu tī siâⁿ mn̂g-kháu lâng-lâng bat, in-ūi i kah pún-tē ê tiúⁿ-ló chò-hóe chē.
31:24 I chò iù-tē pò͘ ê saⁿ-khò͘ khì bē, koh kā io-tòa bē hō͘ senglí lâng.
31:25 Khùi-la̍t kah ui-gî sī i ê saⁿ-khò͘; i siūⁿ tio̍h chiong-lâi ê kéng-hóng chiū hoaⁿ-hí chhiò.
31:26 I khui chhùi chiū kóng tì-sek ê ōe; i ê chi̍h ū jîn-chû ê kà-sī.
31:27 I chim-chiok khòaⁿ chhù lāi ê tāichì, bô chia̍h êng-pn̄g.
31:28 I ê kiáⁿ-jî khùn chhéⁿ khí-lâi chiū kā i chiok-hok; i ê tiōng-hu mā oló i,
31:29 kóng: Hó tek-hēng ê chabó͘ lâng chin chē, to̍k-to̍k lí sī siōng hó ê.
31:30 Gōa-piáu hó khòaⁿ sī hi-ké, súi mā sī khang-khang; to̍k-to̍k kèng-ùi Siōng-chú ê chabó͘ lâng ē tit tio̍h oló.
31:31 I ê chhiú só͘ chò ê sêng-kó tio̍h kui i; i ê sêng-chiū tī siâⁿ mn̂g tāi-chiòng bīn-chêng eng-kai tit tio̍h oló.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。