箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
30:1 A-gú-l ê Chim-giân
Ia-keh ê kiáⁿ A-gú-l ê ōe, to̍h-sī be̍k-sī; chit-ê lâng tùi I-thé-el kah U-kal kóng,
30:2 " Góa pí kûn-chiòng khah gû-gōng, mā bô it-poaⁿ lâng ê chhong-bêng.
30:3 Góa bô o̍h tio̍h tì-hūi, mā m̄ bat chì-sèng-.ê ê tì-sek.
30:4 Siáⁿ lâng bat chiūⁿ thiⁿ koh lo̍h-.lâi? Siáⁿ lâng bat kā hong chū-chi̍p tī chhiú tiong? Siáⁿ lâng bat kā chúi pau tī saⁿ-á lāi? Siáⁿ lâng bat tiāⁿ tio̍h tē ê sì-ke̍k? I ê miâ kiò-chò siáⁿ-mi̍h, I kiáⁿ ê miâ kiò-chò siáⁿ-mi̍h, lí kám chai?
30:5 Siōng-tè ê ōe ta̍k kù lóng ū keng-kòe toàn-liān, kiàn-nā óa-khò I ê lâng, I chiū chò in ê tîn-pâi.
30:6 I ê ōe, lí m̄ thang ke-thiⁿ; khióng-kiaⁿ I ē kā lí chek-pī, lí chiū hián-bêng sī teh kóng pe̍h-chha̍t.
30:7 Kî-tha ê Chim-giân
Góa kiû Lí nn̄g kiāⁿ sū; tī góa bōe sí chìn-chêng, m̄ thang bô hō͘ góa.
30:8 Kiû Lí hō͘ hi-ké kah pe̍h-chha̍t lī-khui góa hn̄g-hn̄g; hō͘ góa bô sànchhiah, mā bô hó gia̍h. Kiû Lí kantaⁿ sù góa kàu-gia̍h ê bí-niûⁿ,
30:9 Bián-tit góa nā pá-chiok soah m̄-jīn Lí, kóng Siōng-chú sī siáⁿ lâng? Koh khióng-kiaⁿ góa sànchhiah chiū ē thau-the̍h, tì-kàu siat-to̍k góa ê Siōng-tè ê miâ.
30:10 M̄-thang tùi chú-lâng kóng i lô͘-po̍k ê pháiⁿ ōe, khióng-kiaⁿ chú-lâng ē kā i chiù-chó͘, lí soah sǹg-chò ū chōe.
30:11 Ū chi̍t-kóa lâng chiù-chó͘ i ê lāu-pē, mā bô kā i ê lāu-bú chiok-hok.
30:12 Ū chi̍t-kóa lâng, kakī khòaⁿ-chò chheng-khì; chóng-.sī, pēng bô sé-tû kakī ê ù-òe.
30:13 Ū chi̍t-kóa lâng ba̍k-thâu hui-siông koân, ba̍k-chiu phôe mā thí koân-koân.
30:14 Koh ū chi̍t-kóa lâng ê gê chhin-chhiūⁿ kiàm, khí chhin-chhiūⁿ to, in beh thun-bia̍t tē-bīn chiūⁿ khùn-khó͘ ê lâng kah sè-kan ê sànchhiah lâng.
30:15 Gô͘-khî ū nn̄g-ê chabó͘ kiáⁿ, in tiāⁿtiāⁿ kóng, " Hō͘ góa, hō͘ góa! " In ū saⁿ hāng bē ti chiok ê, nā liân m̄ bat kóng " Kàu-gia̍h "ê ū sì hāng:
30:16 to̍h-sī im-hú, bē hoâi-īn ê chio̍h thai, bô kàu chúi ê tē kah bē kóng " Kàu-gia̍h " ê hóe.
30:17 Hì-lāng lāu-pē, khòaⁿ-khin koh m̄ chun-thàn lāu-bú ê ōe ê lâng, in ê ba̍k-chiu ē hō͘ soaⁿ-kok tiong ê o͘-a tok chhut-.lâi, ē hō͘ eng-á-kiáⁿ chia̍h lo̍h-pak.
30:18 Góa só͘ siūⁿ bē chhut ê kî-biāu ū saⁿ hāng, liân góa só͘ m̄-chai ê ū sì hāng,
30:19 Chiū-sī eng-chiáu tī khong-tiong ê lō͘, chôa tī chio̍h-pôaⁿ téng ê lō͘, chûn tī hái tiong ê lō͘, lâm kak lú kau-ha̍p ê lō͘.
30:20 Îm-hū ê lō͘ mā sī ánne, i chia̍h-liáu, chhit chhùi chiū kóng, " Góa bô chò pháiⁿ. "
30:21 Hō͘ tē iô-tāng ê goân-in ū saⁿ hāng, liân tam-tng bē khí ê ū sì hāng:
30:22 to̍h-sī lô͘-po̍k chò ông, gōng lâng chia̍h kàu pá,
30:23 Bô lâng-iân ê lú-chú chhut-kè, lú-pī chhú-tāi chú-bó.
30:24 Tē-bīn chiūⁿ ū sì hāng bî-sè ê oa̍h-mi̍h, chóng-.sī, ke̍k ū tì-sek.
30:25 Káu-hiā sī bô la̍t ê tōng-bu̍t, chóng-.sī, ē-hiáu tī joa̍h-thiⁿ sî chún-pī chia̍h-mi̍h.
30:26 Soa-hoan sī loán-jio̍k ê tōng-bu̍t, chóng-.sī, ē-hiáu tī chio̍h-pôaⁿ téng khí chhù.
30:27 Chháu-me̍h bô kun-ông, chóng-.sī, lóng ē-hiáu hun tūi chhut-.khì.
30:28 Sian-ang-á ē-tàng ēng chhiú lia̍h, chóng-.sī, in tòa tī ông-kiong lāi.
30:29 Kiâⁿ-lō͘ ui-hong ê ū saⁿ hāng, liân kiâⁿ-ta̍h kha-pō͘ ui-hong ê ū sì hāng:
30:30 sai sī iá-siù tiong tē-it béng, i bián ūi tio̍h pa̍t mi̍h lâi siám-phiah;
30:31 kî-tha saⁿ-ê sī la̍h-káu kah kang ê soaⁿ-iûⁿ, í-ki̍p bô lâng ē-tàng tí-te̍k ê kun-ông.
30:32 Lí nā kiau-ngō͘, gōng-gōng-á chò, á-.sī chûn pháiⁿ liām-thâu, tio̍h ēng chhiú am chhùi.
30:33 Phah gû-leng ē piàn-sêng leng-iû, phah tio̍h phīⁿ-khang ē chhut-hoeh; chhin-chhiūⁿ ánne, kek lâng siū-khì ē khí sio-cheⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。