箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
27:1 M̄-thang ūi bîn-á-chài lâi kakī khoa-kháu, in-ūi lí m̄-chai chi̍t ji̍t tiong-kan ē hoat-seng siáⁿ-mi̍h tāichì.
27:2 Tio̍h hō͘ pa̍t lâng oló lí, m̄ thang ēng lí kakī ê chhùi; hō͘ gōa-lâng oló lí, m̄ thang ēng kakī ê chhùi-tûn.
27:3 Chio̍h-thâu tāng, soa mā sī ánne; gōng lâng ê siū-khì pí chit nn̄g hāng khah tāng.
27:4 Tōa siū-khì sī chân-jím, siū-khì sī hoàn-lām ê chúi; chi̍t-tò͘ ê thâu-chêng siáⁿ lâng khiā ē tiâu?
27:5 Hián-bêng ê chek-pī, iâⁿ-kòe ún-ba̍t ê ài-chêng.
27:6 Pêng-iú ê phah-siong sī chhut tī hó-ì; to̍k-to̍k tùi-te̍k ê chim-chhùi sī kòe-thâu chē.
27:7 Lâng nā chia̍h pá, liân bi̍t to thó-ià; pak-tó͘ nā iau, liân khó͘ mi̍h mā lia̍h-chò sī tiⁿ.
27:8 Lâng lī-khui pún só͘-chāi khì phiau-liû, tú chhin-chhiūⁿ chiáu-á lī-khui i ê siū sì-kè poe.
27:9 Ko-iû kah phang-liāu hō͘ lâng ê sim hoaⁿ-hí; pêng-iú tiong-si̍t ê khó͘-khǹg, i ê tiⁿ mā sī ánne.
27:10 Lí ê pêng-iú kah lāu-pē ê pêng-iú, lí lóng m̄ thang khì-sak; lí tú tio̍h hoān-lān ê ji̍t, m̄ thang khì hiaⁿ-tī ê chhù; hù-kīn ê chhù-piⁿ iâⁿ-kòe hn̄g-hn̄g ê hiaⁿ-tī.
27:11 Góa ê kiáⁿ, lí tio̍h ū tì-hūi, hō͘ góa ê sim hoaⁿ-hí; hō͘ góa thang ìn-tap hit-ê khau-sé góa ê lâng.
27:12 Thong-ta̍t ê lâng khòaⁿ tio̍h chai-hō chiū siám-bih; gōng-ti̍t ê lâng chìn-chêng óa-khì chiū siū hāi.
27:13 Ūi chheⁿ-hūn lâng tam-pó, tio̍h the̍h hit lâng ê saⁿ lâi tí-ah; ūi ki-lí chò pó-chèng, tio̍h kakī tam-tng chek-jīm.
27:14 Thàu-chá khí-.lâi, tōa-siaⁿ kā pêng-iú chiok-hok, ē hō͘ pêng-iú khòaⁿ-chò sī teh kā i chiù-chó͘.
27:15 Tōa hō͘ ê ji̍t, chúi tih bē soah, chháu-nāu ê chabó͘ lâng mā sī ánne.
27:16 Beh kā i chó͘-tòng ê lâng ná chhin-chhiūⁿ teh chó͘-tòng hong; i ê chiàⁿ chhiú chhin-chhiūⁿ la̍k tio̍h iû.
27:17 Thih bôa thih hō͘ i lāi, pêng-iú hō͘-siong kek-lē mā sī ánne.
27:18 Kò͘-siú bû-hoa-kó chhiū ê lâng ē-tàng chia̍h i ê kóe-chí; kò͘ i ê chú-lâng ē tit tio̍h êng-kng.
27:19 Chhin-chhiūⁿ chiò tī chúi-.ni̍h ê bīn kah lâng ê bīn sio-tùi; lâng ê sim kah lâng sio-tùi mā sī ánne.
27:20 Im-hú kah bia̍t-bông lóng put ti-chiok; lâng ê ba̍k-chiu mā sī ánne.
27:21 Tiáⁿ sī beh toàn-liān gîn, lô͘ sī beh toàn-liān kim; tùi oló mā ē-tàng chhì-giām lâng.
27:22 Lí sûi-jiân ēng khū-thûi kā gōng lâng kah be̍h-á tī khū lāi chò-hóe cheng, i ê gû-gōng mā bē tàng lī-khui i.
27:23 Lí tio̍h siông-sè chai lí iûⁿ-kûn ê chōng-hóng, chù-ì chiàu-kò͘ lí ê gû-kûn;
27:24 In-ūi chîⁿ-châi bē tàng éng-oán lâu lo̍h-.lâi; bián-liû kám ē-tàng chûn kàu bān-sè-tāi?
27:25 Ta-chháu í-keng siu, chháu-íⁿ koh puh chhut-.lâi; soaⁿ téng ê chhài-se mā í-keng siu-sêng.
27:26 Iûⁿ ê mn̂g thang hō͘ lí chò saⁿ, soaⁿ-iûⁿ thang chò chhân-hn̂g ê kè-chîⁿ.
27:27 Mā ū soaⁿ-iûⁿ ê leng hō͘ lí kah lí ê ka-koàn chia̍h, mā thang iúⁿ-chhī lí ê lú-pī.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。