箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
26:1 Joa̍h-thiⁿ lo̍h seh kah siu-koah ê sî lo̍h hō͘, lóng sī bô ha̍p-gî; gû-gōng ê lâng tit tio̍h êng-kng mā sī bô ha̍p-gî.
26:2 Tú chhin-chhiūⁿ chhek-chiáu-á poe khí poe lo̍h, ìⁿ-á poe-lâi poe khì, bô-iân bô-kò͘ ê chiù-chó͘ mā bē èng-giām.
26:3 Piⁿ sī ūi tio̍h bé, bé-kā-kiuⁿ sī ūi tio̍h gû; koái-á-.sī ūi tio̍h gōng lâng ê kha-chiah-phiaⁿ phiaⁿ.
26:4 M̄-thang chiàu gōng lâng ê gōng ōe lâi kā i ìn-tap, khióng-kiaⁿ lí ē kah i sio-siâng.
26:5 Tio̍h chiàu gōng lâng ê gōng ōe lâi kā i ìn-tap, khióng-kiaⁿ i ē kakī khòaⁿ-chò sī ū tì-sek.
26:6 Thok gōng lâng pò siau-sit, tú chhin-chhiūⁿ kòng tn̄g kakī ê kha, hō͘ kakī chia̍h-khui.
26:7 Chim-giân tī gōng lâng ê chhùi, tú chhin-chhiūⁿ pái-kha-.ê kha khang-khang teh hàiⁿ.
26:8 Kā êng-kng hō͘ gû-gōng ê lâng, tú chhin-chhiūⁿ kā chi̍t pò͘-tē ê pó-chio̍h khǹg tī chio̍h-tui lāi-bīn.
26:9 Chim-giân tī gōng lâng ê chhùi, tú chhin-chhiūⁿ chi̍t ki chhì chha̍k ji̍p-khì chùi-hàn ê chhiú.
26:10 Chhiàⁿ gōng lâng á-.sī chhiàⁿ kòe-lō͘ lâng lâi chò tāichì, tú chhin-chhiūⁿ loān siā chìⁿ khì siong tio̍h kûn-chiòng.
26:11 Gōng lâng koh-chài chò gōng tāichì, tú chhin-chhiūⁿ káu-á tò tńg-lâi chia̍h i só͘-thò͘ ê mi̍h-kiāⁿ.
26:12 Lí ū khòaⁿ tio̍h kakī lia̍h-chò sī tì-sek ê lâng bô? Gōng lâng pí i iáu khah ū ǹg-bāng.
26:13 Pîn-tōaⁿ ê lâng kóng, " Tī lō͘-.ni̍h ū béng sai, tī ke-lō͘-.ni̍h ū ióng sai. "
26:14 Mn̂g tī mn̂g-khū teh tńg, pîntōaⁿ lâng tī bîn-chhn̂g téng mā sī ánne.
26:15 Pîn-tōaⁿ lâng chhun chhiú tùi pôaⁿ-.ni̍h, the̍h-lâi-kàu chhùi mā hiâm sin-khó͘.
26:16 Pîn-tōaⁿ lâng khòaⁿ kakī ū tì-hūi, iâⁿ-kòe chhit-ê gâu ìn-tap ê lâng.
26:17 Kòe-lō͘ lâng khì chhap kah i bô koan-hē ê sio-cheⁿ, ná chhin-chhiūⁿ lâng khiú tio̍h káu ê hīⁿ-á.
26:18 Lâng khi-phiàn i ê chhù-piⁿ, kóng, " Góa sī teh kún-chhiò ",
26:19 Ná chhin-chhiūⁿ tian-kông ê lâng hiat hóe-pé kah lāi-chìⁿ í-ki̍p thâi lâng ê ke-si.
26:20 Hóe nā bô kàu chhâ chiū ē hoa-khì; nā bô lâng o̍h-ōe, sio-cheⁿ chiū ē soah-.khì.
26:21 Ài sio-cheⁿ ê lâng ē kek-tōng sio-cheⁿ, tú chhin-chhiūⁿ tī teh to̍h ê thòaⁿ-hóe tiong thiⁿ-chhâ.
26:22 Pōe-āu ê êng-á-ōe chhin-chhiūⁿ hó chia̍h ê mi̍h, chi̍t ē ji̍p chhùi chiū thun lo̍h-khì pak-tó͘ lāi.
26:23 Chhùi tiⁿ sim kan-chà ê lâng, tú chhin-chhiūⁿ hûi-khì an gîn ê che-tái.
26:24 Oàn-hūn lâng ê, i chhùi kóng phô͘-tháⁿ ê ōe, chóng-.sī, sim-lāi khǹg kúi-chà.
26:25 I kóng hó thiaⁿ ōe, lí m̄ thang siong-sìn, in-ūi i ê sim-lāi ū chhit-hāng ê khó-ò͘ⁿ.
26:26 I sûi-jiân ēng kúi-chà am-khàm kakī ê oàn-hūn, I ê pháiⁿ ē tī hōe-chiòng ê bīn-chêng lō͘-hiān.
26:27 Ku̍t hām-kheⁿ ê lâng kakī ē poa̍h lo̍h-khì hit lāi-bīn; kō chio̍h-thâu ê lâng ē hō͘ kō tò tńg-.lâi ê chio̍h-thâu teh tio̍h.
26:28 Kóng pe̍h-chha̍t ê chi̍h ē siong-hāi lâng; phô͘-tháⁿ ê chhùi ē pāi-hoāi lâng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。