箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
25:1 Só͘-lô-móng ê Chim-giân ( Sòa )
Í-hā mā sī Só͘-lô-móng ê Chim-giân, sī Iô-tah ông Hi-che-kia ê lâng só͘ chhau ê.
25:2 Kā tāichì khàm ba̍t sī Siōng-tè ê êng-kng; kā tāichì chhâ-bêng sī kun-ông ê êng-kng.
25:3 Chhin-chhiūⁿ thiⁿ ê koân, tē ê kāu, jîn-bîn oh-tit liáu-kái kun-ông ê sim-su ì-liām.
25:4 Tû-khì gîn ê che-tái, gîn-chhiūⁿ chiah ē-tàng chò-chhut khì-kū;
25:5 Tû-khì ông bīn-chêng ê pháiⁿ lâng, i ê kok-ūi chiah ē-tàng tùi kong-gī lâi kian-kò͘.
25:6 Tī ông ê bīn-chêng m̄ thang kakī chū-tōa, mā m̄ thang khiā tōa-ūi.
25:7 Khah hó sī ū lâng chhiáⁿ lí chē tōa-ūi, m̄ thang tī ông-chhin ê bīn-chêng hông kiò lí lo̍h-.khì.
25:8 M̄-thang chhong-pōng chhut-khì kah lâng oan-ke, bián-tit kàu bóe hō͘ lí ê chhù-piⁿ lêng-jio̍k ê sî, lí m̄-chai beh án-chóaⁿ chò.
25:9 Lí kah chhù-piⁿ kè-kàu, tio̍h kah i pún-sin piān-kái, m̄ thang siap-lāu pa̍t lâng ê pì-bi̍t;
25:10 Khióng-kiaⁿ thiaⁿ-.tio̍h ê lâng ē mē lí, lí ê chhàu-miâ chiū oh-tit sé-chheng.
25:11 Kóng-ōe ha̍p-gî, ná chhin-chhiūⁿ kim phông-kó hē tī gîn nâ-á lāi.
25:12 Tì-hūi lâng ê chek-pī tī sūn-ho̍k ê lâng ê hīⁿ-khang lāi, ná chhin-chhiūⁿ kim hīⁿ-kau kah sûn-kim ê phoa̍h-liān.
25:13 Tiong-si̍t ê sù-chiá tùi chhe i ê lâng lâi kóng, tú chhin-chhiūⁿ joa̍h-thiⁿ siu-koah ê sî ím-liāu ê liâng-léng, in-ūi i hō͘ chú-lâng ê sim khùiⁿ-oa̍h.
25:14 Bô sàng lé kantaⁿ khoa-kháu lé-mi̍h gōa hó ê lâng, ná chhin-chhiūⁿ ū hong ū hûn ā bô lo̍h hō͘.
25:15 Kú-tn̂g jím-nāi ê lâng, koaⁿ-tiúⁿ mā ē siū i khó͘-khǹg; un-jiû ê chhùi-chi̍h ē at-tn̄g kut-thâu.
25:16 Lí ū tit tio̍h bi̍t bô? Chia̍h kàu-gia̍h chiū hó; khióng-kiaⁿ lí chia̍h kòe-thâu soah thò͘ chhut-.lâi.
25:17 Lí m̄ thang tiāⁿtiāⁿ kòe-ke, khióng-kiaⁿ i ē thó-ià lí, oàn-hūn lí.
25:18 Lām-sám kiàn-chèng hām-hāi chhù-piⁿ ê lâng, tú chhin-chhiūⁿ thûi, to kah lāi-chìⁿ teh siong-hāi lâng.
25:19 Hoān-lān ê sî óa-khò bô tiong-si̍t ê lâng, tú chhin-chhiūⁿ chhùi-khí pháiⁿ khì, kha thut-lûn.
25:20 Tùi siong-sim ê lâng chhiùⁿ koa, tú chhin-chhiūⁿ kôaⁿ-thiⁿ ê sî thǹg saⁿ, koh chhin-chhiūⁿ kā chhò͘ piàⁿ tī kiⁿ ê téng-bīn.
25:21 Lí ê tùi-te̍k nā pak-tó͘ iau, tio̍h ēng bí-niûⁿ hō͘ i chia̍h; nā chhùi-ta, tio̍h ēng chúi hō͘ i lim.
25:22 Án-ne, lí sī ēng jia̍t-jia̍t ê hóe-thòaⁿ thia̍p tī i ê thâu-khak téng hō͘ i chai kiàn-siàu; Siōng-chú mā ē kā lí pò-siúⁿ.
25:23 Pak-hong thàu ē tì-sú lo̍h hō͘; húi-pòng lâng ê chi̍h ē tì-sú lâng pìⁿ-bīn.
25:24 Lêng-khó tòa tī chhù téng ê kak-thâu, mā m̄ thang kah chháu-nāu ê chabó͘ lâng chò-hóe tòa tī khui-khoah ê chhù.
25:25 Ū hó siau-sit tùi hn̄g-hn̄g thoân-.lâi, ná chhin-chhiūⁿ ēng léng-chúi hō͘ chhùi-ta ê lâng lim.
25:26 Gī lâng tī pháiⁿ lâng ê bīn-chêng thè-niū, tú chhin-chhiūⁿ ta̍h lô khì ê chúi-chôaⁿ òe lahsap ê chéⁿ.
25:27 Bi̍t chia̍h siuⁿ chē sī m̄-hó; lâng kòe-thâu kiû kakī ê êng-kng mā sī bô hó.
25:28 Lâng nā bô iok-sok kakī ê sim, tú chhin-chhiūⁿ húi-hoāi ê siâⁿ bô chhiûⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。