箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
23:1 Tē-la̍k Tiâu
Lí nā kah koaⁿ-tiúⁿ chē-toh, tio̍h chù-ì tī lí bīn-chêng ê lâng.
23:2 Lí nā-sī tham-chia̍h ê lâng, tio̍h ē-hiáu ēng to hē tī kakī ê nâ-âu.
23:3 M̄-thang tham mi̍h-kiāⁿ hó chia̍h, in-ūi he sī teh phiàn lâng ê chia̍h-mi̍h.
23:4 Tē-chhit Tiâu
M̄-thang lô-khó͘ thoa-bôa lâi kiû hó-gia̍h; m̄ thang óa-khò kakī ê chhong-bêng.
23:5 Lí kám ē chù-ba̍k tī hit-ê khang-hi ê chîⁿ-châi? In-ūi chîⁿ-châi kakī ē hoat si̍t, chhin-chhiūⁿ eng-chiáu poe chiūⁿ thiⁿ.
23:6 Tē-peh Tiâu
M̄-thang chia̍h tàng-sng lâng ê pn̄g, mā m̄ thang tham i ê hó chu-bī.
23:7 In-ūi i ê sim ánne siūⁿ, i chò lâng mā sī ánne; i sûi-jiân tùi lí kóng, " Chhiáⁿ chia̍h, chhiáⁿ lim", chóng-.sī, i ê sim bô ì-hiòng lí.
23:8 Lí só͘ chia̍h ê hit tiám á ē thò͘ chhut-.lâi; lí só͘ kóng ê hó ōe lóng bô chhái-kang.
23:9 Tē-káu Tiâu
M̄-thang kóng-ōe hō͘ gōng lâng thiaⁿ, in-ūi i ē khòaⁿ-khin lí tì-hūi ê ōe.
23:10 Tē-cha̍p Tiâu
M̄-thang î-sóa chá-chêng só͘ li̍p ê tē-kài, mā m̄ thang chhim-chiàm ko͘-jî ê chhân-tē.
23:11 In-ūi ū tōa koân-lêng ê Siōng-chú ē kā in sio̍k-hôe, I ē tùi lí lâi thè in sin-oan.
23:12 Tē Cha̍p-it Tiâu
Tio̍h choan-sim niá-siū kà-sī, tio̍h àⁿ hīⁿ-khang thiaⁿ tì-hūi ê ōe.
23:13 Tē Cha̍p-jī Tiâu
Gín-á m̄ thang bô kā i kàu-tok; lí ēng chhê-á kā i phah, bē tì-kàu sí.
23:14 Lí tio̍h ēng chhê-á kā i phah, thang kiù i ê lêng-hûn bián lo̍h im-hú.
23:15 Tē Cha̍p-saⁿ Tiâu
Góa ê kiáⁿ, lí ê sim nā ū tì-hūi, góa ê sim it-tēng chin hoaⁿ-hí.
23:16 Lí ê chhùi nā kóng chèng-ti̍t ê ōe, góa ê sim-tn̂g mā ē khoài-lo̍k.
23:17 Tē Cha̍p-sì Tiâu
Lí m̄ thang him-siān pháiⁿ lâng, tio̍h kui ji̍t kèng-ùi Siōng-chú.
23:18 In-ūi iáu ū chiong-lâi ê ǹg-bāng, jî-chhiáⁿ lí ê ǹg-bāng mā bē toān-choa̍t.
23:19 Tē Cha̍p-gō͘ Tiâu
Góa ê kiáⁿ, lí tio̍h thiaⁿ, tio̍h ū tì-hūi, koh tio̍h ín-chhōa lí ê sim kiâⁿ chèng-ti̍t ê lō͘.
23:20 Hò͘ⁿ-chiú kah tham-chia̍h ê lâng, lí m̄ thang kah i óng-lâi chò-tīn.
23:21 In-ūi hò͘ⁿ-chiú tham-chia̍h ê lâng ē tì-kàu sànchhiah; ài khùn ê lâng ē tì-kàu chhēng phòa saⁿ.
23:22 Tē Cha̍p-la̍k Tiâu
Lí tio̍h chun-thàn lí ê lāu-pē; lí ê lāu-bú nî lāu ê sî mā m̄ thang kā i khòaⁿ-khin.
23:23 Tio̍h bé chin-lí, m̄ thang bē; tùi tì-hūi, kà-sī kah bêng-lí mā tio̍h ánne.
23:24 Gī lâng ê lāu-pē ē tōa khoài-lo̍k; lâng seⁿ tio̍h tì-hūi ê kiáⁿ ē in-ūi i lâi hoaⁿ-hí.
23:25 Lí tio̍h hō͘ lí ê pē-bú hoaⁿ-hí, tio̍h hō͘ lí ê lāu-bú khoài-lo̍k.
23:26 Tē Cha̍p-chhit Tiâu
Góa ê kiáⁿ, tio̍h kā lí ê sim hiàn hō͘ góa, lí ê ba̍k-chiu mā tio̍h ì-ài góa ê lō͘,
23:27 In-ūi chhiong-ki sī chhim kheⁿ, îm-hū sī e̍h ê chéⁿ.
23:28 I chhin-chhiūⁿ chha̍t teh tng-tán, tī lâng ê tiong-kan ke-thiⁿ kúi-chà ê lâng.
23:29 Tē Cha̍p-peh Tiâu
Siáⁿ lâng ū chai-hō? Siáⁿ lâng ū iu-būn? Siáⁿ lâng ū sio-cheⁿ? Siáⁿ lâng ū thó͘-khùi? Siáⁿ lâng bô-iân bô-kò͘ siū-siong? Siáⁿ lâng ba̍k-chiu ū hoeh-si?
23:30 Chiū-sī hiahê lim chiú m̄-chai soah, sì-kè khì chhōe tiâu-hô chiú lim ê hit khoán lâng.
23:31 Chiú tī poe lāi piàn-sêng âng sek ê chúi, lí m̄ thang khòaⁿ; lim liáu ē ku̍t-âu, lí mā m̄ thang khòaⁿ.
23:32 Kàu bóe i ē chhin-chhiūⁿ chôa teh kā lí, chhin-chhiūⁿ to̍k-chôa teh chhioh lí.
23:33 Lí ê ba̍k-chiu ē khòaⁿ tio̍h kî-ī ê tāichì, lí ê sim ē chhò-loān, o͘-pe̍h-kóng.
23:34 Lí ē chhin-chhiūⁿ tó tī hái tiong, á-.sī chhin-chhiūⁿ khùn tī chûn-ûi-téng ê lâng.
23:35 Lí ē kóng, " Lâng phah góa, góa bô siū-siong; lâng kòng góa, góa m̄-chai; góa tang-sî cheng-sîn? Góa koh khì chhōe chiú lim. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。