箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
22:1 Hó miâ-siaⁿ khah iâⁿ-kòe tōa hoat-châi; un-hūi pí sûn-kim, sûn-gîn khah hó.
22:2 Hó-gia̍h lâng kah sànchhiah lâng hō͘-siong óng-lâi, lóng sī Siōng-chú só͘ chhòng-chō ê.
22:3 Thong-ta̍t ê lâng khòaⁿ tio̍h chai-hō chiū siám-phiah; gōng-ti̍t ê lâng chìn-chêng khì siū chai-hāi.
22:4 Khiam-pi kèng-ùi Siōng-chú ê pò-siúⁿ, to̍h-sī hó-gia̍h, chun-kùi, oa̍h-miā.
22:5 O͘-pe̍h-kóng ê lâng ê lō͘ ū chhì-phè kah lô-bāng; pó-siú kakī lêng-hûn ê lâng lī-khui hit tiâu lō͘ hn̄g-hn̄g.
22:6 Kàu-ióng gín'á tio̍h ēng ha̍p-gî ê hong-hoat, i kàu-lāu lóng-bē oai-chhoa̍h.
22:7 Hó-gia̍h lâng koán-hat sànchhiah lâng; khiàm-chè ê lâng chò chè-chú ê chhe-ēng.
22:8 Chai-chèng chōe-ok ê lâng ē siu tio̍h chai-hō; i siū-khì ê koái-á ē siū hùi-tû.
22:9 Hó sim ê lâng ē tit tio̍h hok-khì, in-ūi i kā bí-niûⁿ pun hō͘ sànchhiah lâng.
22:10 Kā bú-bān ê lâng kóaⁿ chhut-.khì chiū bô sio-cheⁿ, oan-ke kah lêng-jio̍k mā ē soah.
22:11 Ài sim-koaⁿ chheng-khì ê lâng kóng un-tián ê ōe, ông ē chò i ê pêng-iú.
22:12 Siōng-chú ê ba̍k-chiu khòaⁿ-kò͘ chhong-bêng ê lâng; chóng-.sī, i pāi-hoāi kan-chà lâng ê giân-gí.
22:13 Pîn-tōaⁿ ê lâng kóng, " Ū sai tī gōa-bīn, góa nā khì ke-lō͘, ē hō͘ i kā-sí. "
22:14 Îm-hū ê chhùi sī chhim kheⁿ; Siōng-chú só͘ thó-ià ê lâng ē poa̍h lo̍h-khì hit lāi-bīn.
22:15 Gû-gōng pa̍k-tîⁿ tī gín'á ê sim-lāi; m̄ koh, kàu-tok ê koái-á ē kā gû-gōng kóaⁿ lī-khui hn̄g-hn̄g.
22:16 Khi-hū sànchhiah lâng lâi lī-ek kakī, koh sàng lé-mi̍h hō͘ hó-gia̍h lâng ê lâng, lóng ē tì-kàu khiàm-khoeh.
22:17 Tì-hūi lâng ê Ōe
Lí tio̍h àⁿ hīⁿ-khang thiaⁿ tì-hūi lâng ê ōe; choan-sim lâi niá-siū góa ê tì-sek.
22:18 Nā chûn tī lí ê sim, tiàu tī lí ê chhùi-tûn, che to̍h-sī hó.
22:19 Góa kin-á-ji̍t thiau-tî ēng che chí-sī lí, sī ūi tio̍h beh hō͘ lí óa-khò Siōng-chú.
22:20 Kè-ōe kah tì-sek ê hó-chhù, góa kám bô siá hō͘ lí?
22:21 Hō͘ lí chai chin-lí ê ōe khak-si̍t khó-khò; hō͘ lí thang ēng chin-lí ê ōe hôe-hok chhe-phài lí ê lâng.
22:22 Saⁿ-cha̍p Tiâu Tì-hūi ê Ōe
Tē-it Tiâu
M̄-thang chhiúⁿ-kiap sànchhiah lâng ê mi̍h, in-ūi i sànchhiah; mā m̄ thang tī siâⁿ mn̂g-kháu khi-hū khùn-khó͘ ê lâng,
22:23 In-ūi Siōng-chú ē thè i sin-oan; chhiúⁿ-toa̍t in ê lâng, Siōng-chú ē chhiúⁿ-toa̍t hiahê lâng ê sèⁿ-miā.
22:24 Tē-jī Tiâu
Khoài siū-khì ê lâng m̄ thang kah i kau-pôe; tōa siū-khì ê lâng, m̄ thang kah i óng-lâi.
22:25 Khióng-kiaⁿ lí ē o̍h i ê hêng-ûi, kakī soah hām-lo̍h lô-bāng.
22:26 Tē-saⁿ Tiâu
Lí m̄ thang chò hit khoán kā lâng tap-èng, á-.sī kā khiàm-chîⁿ ê lâng chò tam-pó ê tāichì.
22:27 Lí nā bô thang hêng, khióng-kiaⁿ lâng ē lâi kā lí teh khùn ê bîn-chhn̂g giâ khì.
22:28 Tē-sì Tiâu
Chá-chêng lí ê chó͘-sian só͘ li̍p ê tē-kài, lí m̄ thang chhian-sóa.
22:29 Tē-gō͘ Tiâu
Lí ū khòaⁿ tio̍h lâng in-khîn pān tāichì ê lâng bô? I ē khiā tī ông ê bīn-chêng, bô beh khiā tī kē-chàn lâng ê bīn-chêng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。