箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
21:1 Ông ê sim tī Siōng-chú ê chhiú tiong, chhin-chhiūⁿ chúi-lâu chiàu I ê só͘ ài ê hong-hiòng lâu-.khì.
21:2 Lâng ê hêng-ûi kakī khòaⁿ-chò chèng-ti̍t; chóng-.sī, Siōng-chú chhek-to̍k lâng ê sim.
21:3 Kiâⁿ-gī péng-kong, pí hiàn chè koh khah tit tio̍h Siōng-chú chiap-la̍p.
21:4 Ba̍k-thâu koân, sim kiau-ngō͘, í-ki̍p pháiⁿ lâng chū-ko lóng sī chōe.
21:5 In-khîn kè-ōe ē tit tio̍h chhiong-sēng; sò-sèng ê lâng ē tì-kàu khiàm-khoeh.
21:6 Ēng kúi-chà ê chi̍h tit tio̍h ê chîⁿ-châi, chhin-chhiūⁿ chhe-lâi chhe-khì ê phû-hûn chin kín to̍h ē siau-sit.
21:7 Pháiⁿ lâng ê kiông-pō ē sàu-tû kakī, in-ūi in m̄-khéng kong-pêⁿ tùi-thāi lâng.
21:8 Tîm-bê chōe-ok ê lâng, i ê lō͘ oan-oan oat-oat; chóng-.sī, sûn-kiat ê lâng, i ê hêng-ûi chèng-ti̍t.
21:9 Lêng-khó tòa tī chhù téng ê kak-thâu, m̄ thang kah chháu-nāu ê chabó͘ lâng chò-hóe tòa tī khui-khoah ê chhù.
21:10 Pháiⁿ lâng ê sim ài lâng chò pháiⁿ, i ê ba̍k-chiu pēng bô khó-liân i ê chhù-piⁿ.
21:11 Bú-bān ê lâng ē siū hêng-hoa̍t, gōng-ti̍t ê lâng ē tit tio̍h tì-hūi; tì-hūi ê lâng siū kà-sī chiū ē tit tio̍h tì-sek.
21:12 Gī lâng chin chheng-chhó pháiⁿ lâng ê ke, chai-iáⁿ pháiⁿ lâng ē chhia-tó tì-kàu bia̍t-bô.
21:13 Kā hīⁿ-khang that khí-.lâi, m̄-thiaⁿ sànchhiah lâng teh ai-kiû ê lâng, i í-āu kiû-kiò mā bē tit tio̍h lâng thiaⁿ.
21:14 Àm-tiong sàng lé ē soah siū-khì; heng chêng ê lé-mi̍h ē soah tōa siū-khì.
21:15 Péng-kong kiâⁿ-gī, ē hō͘ hó lâng hoaⁿ-hí; tùi pháiⁿ lâng bô siáⁿ lī-ek.
21:16 Lī-khui bêng-lí ê lō͘ ê lâng, ē tòa tī im-hûn ê tiong-kan.
21:17 Ài chhia-hoa ê lâng ē tì-kàu sànchhiah; hò͘ⁿ-chiú kah iû ê lâng bē tàng hó-gia̍h.
21:18 Pháiⁿ lâng chò gī lâng sio̍k-hôe ê kè-chîⁿ; kan-chà ê lâng chò chèng-ti̍t lâng ê thè-sin.
21:19 Lêng-khó tòa tī khòng-iá, mā m̄ thang kah chháu-nāu ài oan-ke ê chabó͘ lâng chò-hóe tòa.
21:20 Tì-hūi ê lâng chhù lāi ū kùi-khì ê pó-bu̍t kah iû; gōng lâng chin kín to̍h sńg liáu-liáu.
21:21 Cháu-chhōe kong-gī kah jîn-chû ê lâng, ē chhōe tio̍h oa̍h-miā, kong-gī kah êng-iāu.
21:22 Tì-hūi ê lâng ē-tàng peh-chiūⁿ ióng-sū ê siâⁿ, húi-bia̍t i só͘ óa-khò ê siâⁿ-pó.
21:23 Iok-sok kakī ê chhùi kah chi̍h ê lâng, ē pó-siú i ê sîn-hûn bián siū chai-hāi.
21:24 Kiau-ngō͘ chū-ko ê lâng miâ kiò-chò bú-bān, i chò tāichì chhiong-kông.
21:25 Pîn-tōaⁿ ê lâng ē tùi tham-io̍k lâi sí, in-ūi i ê chhiú m̄-khéng chò-kang.
21:26 Ū lâng kui ji̍t tham-io̍k put ti-chiok; m̄ koh, gī lâng khóng-khài si-sià lóng bē tàng-sng.
21:27 Pháiⁿ lâng ê chè-hiàn sī khó-ò͘ⁿ ê; hô-hòng sī i chûn pháiⁿ-ì lâi hiàn?
21:28 Lām-sám chò-chèng ê lâng ē bia̍t-bông; to̍k-to̍k chhin-hīⁿ thiaⁿ tio̍h lâi kiàn-chèng ê lâng, bô lâng ē-tàng kā i piān-tó.
21:29 Pháiⁿ lâng bīn-phôe kāu; m̄ koh, chèng-ti̍t lâng kín-sīn i ê kiâⁿ-ta̍h.
21:30 Lâng bô hit khoán tì-hūi, chhong-bêng, kè-ōe, thang tí-te̍k Siōng-chú.
21:31 Bé sī ūi tio̍h kau-chiàn ê ji̍t lâi chún-pī; chóng-.sī, tek-sèng sī tùi Siōng-chú lâi.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。