箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 Ko͘-to̍k ê lâng tui-kiû kakī só͘ ì-ài ê, koh thòng-hūn it-chhè chin ê tì-hūi.
18:2 Gōng lâng bô ì-ài bêng-lí, to̍k-to̍k ài hián-bêng kakī ê sim-ì.
18:3 Pháiⁿ lâng lâi, biáu-sī mā tòe teh lâi; kiàn-siàu kàu, lêng-jio̍k mā kah i chò-hóe kàu.
18:4 Lâng chhùi lāi ê ōe chhin-chhiūⁿ chhim ê chúi, tì-hūi ê chúi-chôaⁿ chhin-chhiūⁿ teh lâu ê khe chúi.
18:5 Thé-thiap pháiⁿ lâng ê chêng-bīn, á-.sī sím-phòaⁿ oan-óng gī lâng lóng sī m̄-hó.
18:6 Gōng lâng khui chhùi chiū khí oan-ke, i ê chhùi jiá-lâi hông phah.
18:7 Gōng lâng ê chhùi hō͘ i kakī bia̍t-bông, i ê chhùi-tûn sī i kakī lêng-hûn ê lô-bāng.
18:8 O̍h ōe ê lâng ê giân-gí chhin-chhiūⁿ hó chia̍h ê mi̍h, chhim-ji̍p lâng ê pak-tó͘ lāi.
18:9 Chò kang pîntōaⁿ ê lâng kah phò-hoāi ê lâng chò hiaⁿ-tī.
18:10 Siōng-chú sī kian-kò͘ ê koân-tâi, gī lâng cháu ji̍p-khì chiū tit tio̍h an-ún.
18:11 Hó-gia̍h lâng siūⁿ kóng châi-bu̍t sī i kian-kò͘ ê siâⁿ, ná chhin-chhiūⁿ ū koân chhiûⁿ thang khò.
18:12 Lâng ê sim nā kiau-ngō͘ chiū ē pāi-hoāi; khiam-pi chiū ē ū chun-kùi.
18:13 Iáu-bōe thiaⁿ-liáu chiū ìn-tap, to̍h-sī i ê gû-gōng kah lêng-jio̍k.
18:14 Lâng ē-tàng jím-siū jio̍k-thé ê pēⁿ-thiàⁿ; sim-sîn siū-siong, siáⁿ lâng jím-siū ē-tiâu?
18:15 Chhong-bêng ê lâng ê sim tit tio̍h tì-sek, tì-hūi lâng ê hīⁿ-khang cháu-chhōe tì-sek.
18:16 Lé-mi̍h sī thè lâng khui lō͘, chhōa i kàu tōa-jîn-bu̍t ê bīn-chêng.
18:17 Tāi-seng piān-lūn ê lâng kahná ū lí; to̍k-to̍k chhù-piⁿ lâi chiū chhâ-chhut si̍t-chêng.
18:18 Thiu-chhiam ē hō͘ oan-ke soah, mā ē pâi-kái ū sè-le̍k ê lâng tiong-kan ê kiù-hun.
18:19 Hō͘ khek-khui ê hiaⁿ-tī koh hô, pí cheng-ho̍k kian-kò͘ ê siâⁿ khah oh; chit khoán ê sio-cheⁿ tú chhin-chhiūⁿ iâⁿ-chē ê mn̂g-chhòaⁿ.
18:20 Lâng kóng-ōe só͘ kiat ê kóe-chí ē hō͘ i ê pak-tó͘ chhiong-móa; i ê chhùi-tûn só͘ siu-sêng ê ē hō͘ i pá-chiok.
18:21 Seⁿ-sí ê koân-pèng chāi tī chhùi-chi̍h; thiàⁿ i ê lâng ē chia̍h i ê kóe-chí.
18:22 Chhōa tio̍h bó͘ ê lâng to̍h-sī tit tio̍h hok-khì, mā sī tit tio̍h Siōng-chú ê un-tián.
18:23 Sàn-chhiah lâng pek-chhiat lâi khún-kiû; hó-gia̍h lâng pháiⁿ siaⁿ-sàu lâi ìn-tap.
18:24 Ū chin chē pêng-iú ê lâng ū sî ē kakī chū chhú bia̍t-bông; ū chi̍t-ê ti-kí ê pêng-iú ē pí hiaⁿ-tī khah chhin.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。