箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
16:1 Sim ê kè-bô͘ chāi tī lâng, chi̍h ê ìn-tap sī tùi Siōng-chú lâi.
16:2 Lâng khòaⁿ kakī ê só͘ chò lóng sī chheng-khì, to̍k-to̍k Siōng-chú teh chhek-to̍k lâng ê sim.
16:3 Lí só͘ chò ê tāichì lóng tio̍h kau-thok Siōng-chú; lí ê kè-ōe chiū ē ún-tàng.
16:4 Siōng-chú só͘ chō ê lóng ha̍h I ê lō͘-ēng; liân pháiⁿ lâng mā sī ūi tio̍h chai-hō ê ji̍t lâi chûn-chāi.
16:5 Sim kiau-ngō͘ ê lâng sī Siōng-chú só͘ thó-ià; sûi-jiân chhiú khan chhiú mā bē bián siū hêng-hoa̍t.
16:6 Tùi liân-bín kah sêng-si̍t, chōe-kò tit tio̍h sio̍k-hôe;tùi kèng-ùi Siōng-chú, lâng chiū thang lī-khui pháiⁿ tāi.
16:7 Lâng ê só͘ kiâⁿ nā hō͘ Siōng-chú hoaⁿ-hí, Siōng-chú mā ē hō͘ in kah tùi-te̍k hô.
16:8 Ū chin chē chîⁿ ā put-gī, put-jû chîⁿ chió ū kong-gī.
16:9 Lâng ê sim kè-ōe i ê lō͘, to̍k-to̍k sī Siōng-chú teh tiāⁿ tio̍h i ê kha-pō͘.
16:10 Ông ê chhùi lāi nā ū Siōng-tè ê ōe, sím-phòaⁿ ê sî, i ê chhùi chiū bē ū chha-chhò.
16:11 Kong-tō ê thian-phêng kah chhìn lóng sio̍k Siōng-chú, tē-á lāi só͘-ū ê chhìn-thûi lóng sī I só͘ tiāⁿ tio̍h.
16:12 Chò pháiⁿ sī ông só͘ thó-ià, in-ūi ông-ūi sī tùi kong-gī lâi kian-kò͘.
16:13 Kong-gī ê chhùi-tûn sī ông só͘ hoaⁿ-hí, kóng-ōe chèng-ti̍t ê lâng sī ông só͘ thiàⁿ.
16:14 Ông ê tōa siū-khì chhin-chhiūⁿ sí-bông ê sù-chiá, to̍k-to̍k tì-hūi ê lâng ē hō͘ i soah.
16:15 Ông bīn-sek ê kng hō͘ lâng ū oa̍h-miā; ông ê un-tián chhin-chhiūⁿ chhun-hō͘ ê hûn.
16:16 Tit tio̍h tì-hūi pí tit tio̍h kim ke chin hó; tit tio̍h chhong-bêng pí tit tio̍h gîn koh khah hó.
16:17 Chèng-ti̍t lâng ê tōa-lō͘ sī lī-khui pháiⁿ; kín-sīn siú i ê lō͘ ē pó-choân kakī ê sèⁿ-miā.
16:18 Kiau-ngō͘ ē tì-kàu sit-pāi; chū-ko ê sim ē tì-kàu poa̍h-tó.
16:19 Sim khiam-pi kah sànchhiah lâng chò-hóe tòa, iâⁿ-kòe kah kiau-ngō͘ ê lâng chò-hóe pun só͘ chhiúⁿ ê mi̍h.
16:20 Tì-ì tī tō-lí ê lâng ē tit tio̍h lī-ek, óa-khò Siōng-chú ê lâng ū hok-khì.
16:21 Sim ū tì-hūi kiò-chò thong-ta̍t; hó kháu-châi ē ke-thiⁿ lâng ê ha̍k-būn.
16:22 Lâng ū bêng-lí chiū ū oa̍h-miā ê chúi-chôaⁿ; gōng lâng ê chek-hoa̍t to̍h-sī i kakī ê gōng.
16:23 Tì-hūi lâng ê sim kà-sī i ê chhùi, koh kā i ê chhùi-tûn ke-thiⁿ ha̍k-būn.
16:24 Oán-choán ê ōe chhin-chhiūⁿ bi̍t-pâng; ē hō͘ sim kam-tiⁿ, kut sóng-khoài.
16:25 Ū chi̍t tiâu lō͘ lâng khòaⁿ-chò chèng-ti̍t, kàu bóe ē chiâⁿ-chò sí-bông ê lō͘.
16:26 Pak-tó͘ iau sī teh bián-lē kang-lâng khì chò-kang; in-ūi i ê pak-tó͘ chhui-pek i.
16:27 Bô lō͘-ēng ê lâng tô͘-bô͘ hāi lâng; i ê chhùi-tûn chhin-chhiūⁿ ū hóe teh sio.
16:28 O͘-pe̍h-kóng ê lâng sì-kè khí hun-cheng, o̍h-ōe ê lâng hō͘ chhin-bi̍t ê pêng-iú pìⁿ léng-tām.
16:29 Kiông-pō ê lâng ín-iú chhù-piⁿ, chhōa i kiâⁿ m̄-hó ê lō͘.
16:30 Ba̍k-chiu pàng-kheh sī teh tô͘-bô͘ chò pháiⁿ, chhùi-tûn ha̍p óa-lâi chiū chiâⁿ hit-ê pháiⁿ tāi.
16:31 Pe̍h thâu-mn̂g sī êng-iāu ê bián-liû, kiâⁿ gī ê lō͘ chiū ē chhōe-.tio̍h.
16:32 Bô khoài siū-khì ê lâng iâⁿ-kòe ióng-sū, koán-hat kakī ê sim iâⁿ-kòe-khì cheng-ho̍k kui chō siâⁿ.
16:33 Liam-khau koat-tēng chāi tī lâng, tiāⁿ tio̍h tāichì chāi tī Siōng-chú.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。