出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 Siōng-tè tùi Mô͘-se kóng, " Góa só͘ beh tùi-hù Hôa-láu ê, taⁿ lí ē khòaⁿ-.tio̍h, in-ūi ēng koân-lêng ê chhiú, i ē chún in khì, koh ēng koân-lêng ê chhiú, i ē kóaⁿ in chhut i ê tē. "
6:2 Siōng-chú Ho͘-tiàu Mô͘-se
Siōng-chú koh tùi Mô͘-se kóng, " Góa to̍h-sī Siōng-chú.
6:3 Góa sī choân-lêng Siōng-tè, chhut-hiān tī A-bu-la-hàm, Í-sak, Iâ-kop; chóng-.sī, Góa ê miâ kiò-chò I-é-ho-bah, Góa m̄ bat hō͘ in bat Góa.
6:4 Góa koh kah in li̍p Góa kian-kò͘ ê iok, beh kā in só͘ tòa-.kòe ê Ka-nân tē siúⁿ-sù hō͘ in, to̍h-sī in kià-kha ê tē.
6:5 Góa mā ū thiaⁿ tio̍h I-su-la-el lâng ai-siaⁿ thó͘-khùi, to̍h-sī Ai-gi̍p lâng tok in chò khó͘-kang, Góa mā ē kì-liām Góa ê iok.
6:6 Só͘-í, lí tio̍h kā I-su-la-el lâng kóng, ' Góa sī Siōng-chú, Góa ē tùi Ai-gi̍p lâng só͘ hō͘ lín taⁿ ê tāng-tàⁿ chhōa lín chhut-.lâi, koh beh kiù lín thoat-lī in só͘ hō͘ lín chò ê khó͘-kang. Góa mā ē ēng chhun chhut-.lâi ê chhiú kah tōa ê sím-phòaⁿ lâi kiù-sio̍k lín.
6:7 Góa mā ē lia̍h lín chò Góa ê chú-bîn, Góa mā ē chò lín ê Siōng-tè. Lín ē chai Góa sī Siōng-chú — lín ê Siōng-tè, sī tùi Ai-gi̍p lâng só͘ hō͘ lín taⁿ ê tāng-tàⁿ chhōa lín chhut-.lâi ê.
6:8 Góa chiùchōa èng-ín beh hō͘ A-bu-la-hàm, Í-sak, Iâ-kop hit-ê tē, Góa beh chhōa lín koh ji̍p-khì hia, kā hit-ê tē siúⁿ-sù hō͘ lín chò sán-gia̍p. Góa sī Siōng-chú. '"
6:9 Mô͘-se ánne tùi I-su-la-el lâng kóng, chóng-.sī, in ūi tio̍h sim-lāi iu-būn, mā chò khó͘-kang, soah m̄-khéng thiaⁿ Mô͘-se.
6:10 Siōng-chú hoan-hù Mô͘-se kóng,
6:11 " Lí ji̍p-khì kā Ai-gi̍p ông Hôa-láu kóng, tio̍h chún I-su-la-el lâng lī-khui i ê tē. "
6:12 Mô͘-se tī Siōng-chú ê bīn-chêng kóng, " Lí khòaⁿ, I-su-la-el lâng to m̄-thiaⁿ góa ê ōe, Hôa-láu ná ē beh thiaⁿ góa chit-ê chhùi-chi̍h tun ê lâng? "
6:13 Siōng-chú hoan-hù Mô͘-se kah A-lông, tio̍h thoân-lēng hō͘ I-su-la-el lâng kah Ai-gi̍p ông Hôa-láu, thang chhōa I-su-la-el lâng chhut Ai-gi̍p tē.
6:14 Mô͘-se kah A-lông ê Ka-phó͘
I-su-la-el chiahê cho̍k-tiúⁿ ê miâ kì tī ē-té: I-su-la-el tōa-kiáⁿ Lū-biān ê kiáⁿ sī Ha-no͘k, Pa-lú, He-chú-lóng, Kal-mih, chiahê sī Lū-biān hiahê ke.
6:15 Si-miān ê kiáⁿ sī E-mu-el, Ia-mín, O-hat, Iá-kin, Cho-hal, í-ki̍p Ka-nân tē ê chabó͘ kiáⁿ só͘ seⁿ ê Sàu-lô, chiahê sī Si-miān hiahê ke.
6:16 Lē-bī chiahê kiáⁿ ê miâ chiàu in ê sè-hē kì tī ē-té: Kel-sióng, Ko-hat, Me-la-lih. Lē-bī oa̍h kàu chi̍t-pah saⁿ-cha̍p-chhit hòe.
6:17 Kel-sióng ê kiáⁿ chiàu in ê ka-cho̍k, Lip-nî, Si-mí.
6:18 Ko-hat ê kiáⁿ, Àm-lâm, I-chu-hal, He-bú-lông, U-chi-el. Ko-hat oa̍h kàu chi̍t-pah saⁿ-cha̍p saⁿ hòe.
6:19 Me-la-lih ê kiáⁿ, Mak-lī, Mu-sih. Chiahê sī Lē-bī hiahê ke, chiàu in ê sè-hē.
6:20 Àm-lâm chhōa i ê a-ko͘ Io-ke-biat chò bó͘, i kā i seⁿ A-lông kah Mô͘-se. Àm-lâm oa̍h kàu chi̍t-pah saⁿ-cha̍p-chhit hòe.
6:21 I-chu-hal ê kiáⁿ, Khó-la̍h, Ne-he̍k, Chik-lī.
6:22 U-chi-el ê kiáⁿ, Mi-sa-el, E-li-cha-hoán, Si-thu-lī.
6:23 A-lông chhōa A-mí-ná-tap ê chabó͘ kiáⁿ Ná-sòng ê sió-mōe E-lí-se-bah chò bó͘, i kā i seⁿ Ná-tap, A-mí-huh, Ê-lī-a-chal, I-tha-mal.
6:24 Khó-la̍h ê kiáⁿ, Ak-sil, El-ká-nah, A-bi-a-sa̍h, chiahê sī Khó-la̍h hiahê ke.
6:25 A-lông ê kiáⁿ Ê-lī-a-chal chhōa Phu-thi-el ê chi̍t-ê chabó͘ kiáⁿ chò bó͘, i kā i seⁿ Hui-ne-hah. Chiahê sī Lē-bī lâng ê cho̍k-tiúⁿ, chiàu in ê ka-cho̍k.
6:26 Chit-ê A-lông, Mô͘-se to̍h-sī Siōng-chú tùi in kóng, " Tio̍h chhōa I-su-la-el lâng chiàu in ê kun-tūi chhut Ai-gi̍p tē " ê.
6:27 Tùi Ai-gi̍p ông Hôa-láu kóng beh chhōa I-su-la-el lâng chhut Ai-gi̍p ê, to̍h-sī chit-ê Mô͘-se kah A-lông.
6:28 Siōng-chú Bēng-lēng Mô͘-se kah A-lông
Tng Siōng-chú tī Ai-gi̍p tē tùi Mô͘-se kóng-ōe ê ji̍t,
6:29 Siōng-chú tùi Mô͘-se kóng, " Góa to̍h-sī Siōng-chú, Góa tùi lí só͘ kóng it-chhè ê ōe, lí lóng tio̍h kā Ai-gi̍p ông Hôa-láu kóng. "
6:30 Mô͘-se tī Siōng-chú ê bīn-chêng kóng, " Lí khòaⁿ, góa sī chhùi-chi̍h tun ê lâng, Hôa-láu ná ē beh thiaⁿ góa? "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。