箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
11:1 Kúi-chà ê thian-phêng sī Siōng-chú só͘ thó-ià; kong-pêⁿ ê chhìn-thûi sī I só͘ hoaⁿ-hí.
11:2 Kiau-ngō͘ nā lâi, kiàn-siàu mā tòe teh lâi; chóng-.sī, tì-hūi ē kah khiam-pi ê lâng chò-hóe chûn-chāi.
11:3 Chèng-ti̍t ê lâng, i ê sêng-si̍t ē ín-chhōa i; kan-chà ê lâng, i ê o͘-pe̍h-kóng ē hō͘ i pāi-hoāi.
11:4 Siōng-tè tōa siū-khì ê ji̍t, chîⁿ-châi bô lō͘-ēng; chí ū kong-gī ē kiù lâng thoat-lī sí-bông.
11:5 Oân-choân ê gī lâng ē pho͘-pêⁿ i kakī ê lō͘; chí ū pháiⁿ lâng ē in-ūi i kakī ê pháiⁿ lâi poa̍h-tó.
11:6 Chèng-ti̍t ê gī lâng ē chín-kiù i kakī; kan-chà ê lâng ē hō͘ in kakī ê pháiⁿ lia̍h tio̍h.
11:7 Pháiⁿ lâng chi̍t-ē sí, i ê ǹg-bāng ē bô-.khì; chōe-jîn só͘ him-bō͘ ê mā ē siau-sit-.khì.
11:8 Gī lâng ē-tàng thoat-lī hoān-lān; ū pháiⁿ lâng chò i ê thè-sin.
11:9 Bô kèng-khiân ê lâng ēng chhùi hāi chhù-piⁿ; chí ū gī lâng tùi tì-sek tit tio̍h kiù.
11:10 Gī lâng heng-thong, choân siâⁿ hoaⁿ-hí; pháiⁿ lâng bia̍t-bông, lâng lóng chhut hoaⁿ-hí ê siaⁿ.
11:11 Siâⁿ in-ūi chèng-ti̍t lâng ê chiok-hok chiū heng-khí; chóng-.sī, in-ūi pháiⁿ lâng ê chhùi chiū tó-hoāi.
11:12 Biáu-sī chhù-piⁿ ê lâng sī bû-ti; chóng-.sī, bêng-lí ê lâng tiām-tiām bô chhut siaⁿ.
11:13 Sì-kè kóng lâng ê tn̂g-té ê lâng lāu-sia̍p pì-bi̍t; sim sêng-si̍t ê lâng kā tāichì ún-ba̍t.
11:14 Bô tì-hūi ê chí-tō, jîn-bîn chiū sit-pāi; bô͘-sū chē chiū ē tit tio̍h an-ún.
11:15 Kā chheⁿ-hūn lâng chò pó-chèng ē tōa khek-khui; bô ài kā lâng tam-pó ê lâng chiū ē tit tio̍h an-ún.
11:16 Hó tek-hēng ê chabó͘ lâng tit tio̍h miâ-siaⁿ; kiông-béng ê chapo͘ lâng tit tio̍h chîⁿ-châi.
11:17 Jîn-chû ê lâng lī-ek kakī ê sèⁿ-miā; chân-jím ê lâng hāi kakī ê seng-khu.
11:18 Pháiⁿ lâng keng-êng ē tit tio̍h hi-ké ê kang-chîⁿ; iā gī ê chéng-chí ê ē tit tio̍h si̍t-chāi ê pò-siúⁿ.
11:19 Kú-tn̂g kiâⁿ gī ē tit tio̍h oa̍h-miā; tui kiû pháiⁿ sū ē tì-kàu sí-bông.
11:20 Sim lāi o͘-pe̍h siūⁿ ê lâng sī Siōng-chú só͘ thó-ià; chò tāichì oân-siān ê lâng sī I só͘ hoaⁿ-hí.
11:21 Pháiⁿ lâng chhiú khan chhiú, it-tēng ē siū hêng-hoa̍t; gī lâng ê kiáⁿ-sun ē tit tio̍h chín-kiù.
11:22 Cha-bó͘ lâng súi nā bô bêng-lí, chhin-chhiūⁿ kim-khoân khòa tī ti ê phīⁿ.
11:23 Gī lâng só͘ ì-ài ê tāichì lóng sī hó; pháiⁿ lâng só͘ ǹg-bāng ê tāichì, kiat-kio̍k sī jiá Siōng-chú siū-khì.
11:24 Lâng ná hù-chhut chiū ē ná ke-thiⁿ; lâng ná tàng-sng chiū ē tian-tò sànchhiah.
11:25 Ài chín-chè ê lâng ē tit tio̍h hong-sēng; chu-jūn lâng ê ē tit tio̍h chu-jūn.
11:26 Tún ngó͘-kok m̄ thiò ê lâng ē hō͘ jîn-bîn chiù-chó͘; kam-goān thiò chhut ê lâng ē tit tio̍h chiok-hok.
11:27 Chhut-la̍t chò hó sū ē tit tio̍h un-hūi; choan-bûn hāi lâng ê ē tú tio̍h chai-hō.
11:28 Óa-khò kakī chîⁿ-châi ê lâng ē poa̍h-tó; gī lâng ē chhin-chhiūⁿ chheⁿ-chhùi ê chhiū-hio̍h heng-ōng.
11:29 Kiáu-jiáu kakī chhù lāi ê lâng, siáⁿ-mi̍h lóng tit bē tio̍h; gû-gōng ê lâng ē chò tì-hūi lâng ê lô͘-po̍k.
11:30 Gī lâng só͘ kiat ê kóe-chí-sī oa̍h-miā ê chhiū; tì-hūi ê lâng ē tit tio̍h lâng ê lêng-hûn.
11:31 Lí khòaⁿ, gī lâng tī sè-kan tit tio̍h pò-siúⁿ; pháiⁿ lâng kah chōe-jîn kám bē siū koh khah tōa ê pò-èng?
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。