箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 Siōng-chàn Tì-hūi
Tì-hūi kám bô teh kiò? Chhong-bêng kám bô chhut siaⁿ?
8:2 Tì-hūi tī lō͘ piⁿ koân-tē ê téng-bīn, tī si̍p-jī-lō͘-kháu teh khiā.
8:3 Tī siâⁿ mn̂g piⁿ, tī siâⁿ mn̂g-kháu, tī siâⁿ chhut-ji̍p ê só͘-chāi, tōa-siaⁿ hoah,
8:4 chèng lâng, góa teh kiò lín, góa ǹg sè-kan lâng chhut siaⁿ.
8:5 kóng: Gōng-ti̍t ê lâng, lín tio̍h ē liáu-kái thong-ta̍t ê lí; gû-gōng ê lâng, lín sim-lāi tio̍h bêng-pe̍k.
8:6 Lín tio̍h thiaⁿ, in-ūi góa beh kóng ke̍k-hó ê tāichì; góa beh khui chhùi lūn chèng-ti̍t ê tāichì.
8:7 Góa ê chhùi beh kóng-chhut chin-si̍t; góa ê chhùi-tûn oàn-hūn pháiⁿ tāi.
8:8 Góa só͘ kóng ê ōe lóng sī kong-gī, kî-tiong bô oan-khiau o͘-pe̍h-kóng.
8:9 Che ē bêng-lí ê lâng lóng ē liáu-kái, tit tio̍h tì-sek ê lâng lóng lia̍h-chò sī chèng-ti̍t.
8:10 Lín tio̍h sêng-siū góa ê kà-sī, pí tit tio̍h pe̍h-gîn khah hó; tit tio̍h tì-sek pí tit tio̍h n̂g-kim khah hó.
8:11 In-ūi tì-hūi pí âng-pó-chio̍h khah hó; it-chhè lâng só͘ ì-ài ê chu-pó lóng kah i bē pí-tit.
8:12 Góa tì-hūi ēng thong-ta̍t chò tòa ê só͘-chāi; koh chhōe tio̍h tì-sek kah kè-ōe.
8:13 Kèng-ùi Siōng-chú chāi tī oàn-hūn pháiⁿ tāi; hit khoán kiau-ngō͘, lāmsám kah pháiⁿ lō͘, í-ki̍p o͘-pe̍h-kóng ê chhùi lóng sī góa só͘ oàn-hūn.
8:14 Góa ū kè-ōe kah chin ê tì-sek; góa to̍h-sī chhong-bêng, góa ū lêng-le̍k.
8:15 Tè-ông tùi góa lâi chē ūi; kun-ông tùi góa tiāⁿ tio̍h kong-pêⁿ ê lu̍t-hoat.
8:16 Ông-chhin kah kùi-cho̍k, í-ki̍p sè-chiūⁿ só͘-ū ê sím-phòaⁿ-koaⁿ, lóng sī tùi góa lâi chiáng-koân.
8:17 Thiàⁿ góa ê lâng, góa mā thiàⁿ i; khún-chhiat cháu-chhōe góa ê lâng, ē chhōe-.tio̍h.
8:18 Hó-gia̍h chun-kùi chāi tī góa, kú-tn̂g ê hù-jū kah kong-gī mā chāi tī góa.
8:19 Góa ê kóe-chí pí n̂g-kim khah hó, iâⁿ-kòe sûn-kim; góa ê chhut-sán iâⁿ-kòe bûn-gîn.
8:20 Góa kiâⁿ tī kong-gī ê lō͘, kiâⁿ tī kong-pêⁿ ê lō͘,
8:21 hō͘ thiàⁿ góa ê lâng sêng-siū châi-bu̍t, mā chhiong-móa in ê kim-khò͘.
8:22 Tì-hūi tī Chhòng-chō ê Kak-sek
Tī Siōng-chú chhòng-chō ê khí-thâu, Tī goân-khí-thâu chhòng-chō ê chìn-chêng, Siōng-chú to̍h chhòng-chō góa.
8:23 Tùi éng-oán, tùi goân-khí-thâu, iáu-bōe ū sè-kài ê chìn-chêng, góa í-keng siū siat-li̍p.
8:24 Iáu-bōe ū chhim-ian, iáu-bōe ū chin chē chúi ê chúi-chôaⁿ, góa í-keng chhut-sì.
8:25 Tōa soaⁿ iáu-bōe tiāⁿ tio̍h, sió soaⁿ iáu-bōe ū chìn-chêng, góa í-keng chhut-sì.
8:26 Hit sî, Siōng-chú iáu-bōe chhòng-chō tāi-tē kah chhân-iá, tē-chiūⁿ thô͘-soa hún ê pún-chit mā iáu-bōe chûn-chāi.
8:27 Siōng-chú kiàn-li̍p chiahê thiⁿ, tī chhim-ian ê téng-bīn an-tì îⁿ-khoân.
8:28 Tī téng-bīn an-tì kiong-chhong, kian-kò͘ chhim-ian ê chúi-chôaⁿ;
8:29 kā hái tiāⁿ tio̍h kài-hān, hō͘ chúi bô pôaⁿ-kòe I ê bēng-lēng; tiāⁿ tio̍h tāi-tē ê kin-ki, góa kah I tông-chāi.
8:30 Hit sî, góa tī hia chò sai-hū-thâu, ji̍t-ji̍t hō͘ I hoaⁿ-hí, tiāⁿtiāⁿ tī I bīn-chêng khoài-lo̍k;
8:31 Tī Siōng-chú hō͘ lâng thang tòa ê tē-chiūⁿ khoài-lo̍k, mā kah sè-kan lâng chò-hóe hoaⁿ-hí.
8:32 Lín chiahê kiáⁿ, taⁿ tio̍h chun-thàn góa; in-ūi chip-siú góa ê tō-lō͘ ê lâng ū hok-khì!
8:33 Tio̍h thiaⁿ kà-sī, chiū ē tit tio̍h tì-hūi, m̄ thang khì-choa̍t góa ê kà-sī.
8:34 Chun-thàn góa, ji̍t-ji̍t tī góa ê mn̂g-kháu teh tán, tī góa ê mn̂g-kheng piⁿ thèng-hāu ê lâng chin ū hok-khì!
8:35 In-ūi chhōe tio̍h góa ê lâng chiū ē chhōe tio̍h oa̍h-miā, mā ē tùi Siōng-chú tit tio̍h un-hūi.
8:36 Tek-chōe góa ê lâng sī hāi kakī ê sèⁿ-miā; oàn-hūn góa ê lâng lóng sī kakī chhú sí.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。