箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 Koh-chài Khoàn-kài
Góa ê kiáⁿ, lí nā ūi tio̍h chhù-piⁿ chò tiong-pó, thè gōa-lâng tah chhiú tam-pó,
6:2 Lí chiū hō͘ chhùi lāi ê ōe tauh tio̍h, hō͘ chhùi lāi ê ōe khîⁿ tio̍h.
6:3 Góa ê kiáⁿ, lí kì-jiân lo̍h tī chhù-piⁿ ê chhiú tiong, taⁿ tio̍h ánne kiâⁿ, lâi kiù kakī. Lí tio̍h khiam-pi khì khún-kiû lí ê chhù-piⁿ.
6:4 M̄-thang hō͘ lí ê ba̍k-chiu khùn-.khì, m̄ thang hō͘ lí ê ba̍k-chiu phôe pàng-kheh-kheh.
6:5 Tio̍h kiù kakī, chhin-chhiūⁿ lo̍k thoat-lī phah-la̍h ê lâng ê chhiú; chhin-chhiūⁿ chiáu-á thoat-lī lia̍h chiáu ê lâng ê chhiú.
6:6 Pîn-tōaⁿ ê lâng, lí tio̍h khì khòaⁿ káu-hiā, khòaⁿ i ê só͘ chò thang tit tio̍h tì-hūi.
6:7 I bô thâu-ba̍k, bô kàm-tok, bô sī-tōa.
6:8 I iáu koh ē-hiáu tī joa̍h-thiⁿ chún-pī chia̍h-mi̍h, tī siu-koah ê sî chek-chū bí-niûⁿ.
6:9 Pîn-tōaⁿ lâng, lí beh khùn kàu tang-sî? Lí tang-sî chiah ē khùn chhéⁿ khí-.lâi?
6:10 Koh khùn chi̍t-sî-á, koh bîn chi̍t-sî-á, koh theⁿ chi̍t-sî-á;
6:11 Lí ê sànchhiah chhin-chhiūⁿ chha̍t lâi; lí ê khiàm-khoeh chhin-chhiūⁿ chhēng chiàn-kah ê lâi.
6:12 Bô hē-lo̍h ê pháiⁿ lâng, chiū ēng hit ki chhùi sì-kè phiàn lâng;
6:13 Sái ba̍k-bóe lâi hōe-ì, ēng kha pí ì-sù, ēng chéng-thâu-á chí-sī.
6:14 Sim lāi koai-phiah, tiāⁿtiāⁿ kè-bô͘ pháiⁿ tāi; sì-kè sái-lōng oan-ke.
6:15 Só͘-í, i ê chai-hō hut-jiân lîm-kàu; i ē sûi-sî pāi-hoāi, bô hoat-tō͘ i-tī.
6:16 Ū la̍k hāng sī Siōng-chú só͘ oàn-hūn, liân I ê sim só͘ thó-ià ê ū chhit-hāng;
6:17 Chiū-sī kiau-ngō͘-ê ba̍k-chiu, kóng pe̍h-chha̍t ê chi̍h, thâi bô chōe ê lâng ê chhiú,
6:18 Tô͘-bô͘ pháiⁿ tāi ê sim, phun-cháu-khì hām-hāi lâng ê kha,
6:19 Kóng pe̍h-chha̍t ê ké kiàn-chèng, tī hiaⁿ-tī tiong-kan sái-lōng oan-ke ê lâng.
6:20 Kéng-kài Îm-loān
Góa ê kiáⁿ, tio̍h chip-siú lí ê lāu-pē ê bēng-lēng, m̄ thang khì-sak lí ê lāu-bú ê kà-sī.
6:21 Tio̍h tiāⁿtiāⁿ kì-tiâu tī lí ê sim, khòa tī lí ê ām-kún.
6:22 Lí kiâⁿ lō͘ ê sî chiū ē ín-chhōa lí, lí khùn ê sî chiū ē pó-siú lí, lí khùn-chhéⁿ chiū kah lí tâm-lūn.
6:23 In-ūi bēng-lēng sī teng, kà-sī sī kng; koán-kà ê chek-pī sī oa̍h-miā ê lō͘;
6:24 ē pó-siú lí bē khì chhin-kīn pháiⁿ ê chabó͘ lâng, bē khì thiaⁿ ki-lí phô͘-tháⁿ ê ōe.
6:25 Lí ê sim-lāi m̄ thang loân-bō͘ i ê súi-sek, mā m̄ thang hō͘ i ê ba̍k-chiu ín-iú khì.
6:26 In-ūi ki-lí ē hō͘ lâng sàn kah chí ū chhun chi̍t tè piáⁿ; îm-hū ē chhiúⁿ-toa̍t lâng ê pó-kùi oa̍h-miā.
6:27 Lâng kám ē phō hóe tī heng chêng, i ê saⁿ bē to̍h khí-.lâi?
6:28 Lâng kám ē ta̍h tī jia̍t ê hóe-thòaⁿ, i ê kha kám bē sio-.tio̍h?
6:29 Chhin-kīn chhù-piⁿ ê bó͘ ê lâng mā sī ánne; kiàn-nā bong i ê lâng bē bián-tit ē siū hêng-hoa̍t.
6:30 Chha̍t in-ūi iau thau-the̍h chia̍h-mi̍h lâi chí ki, lâng bē khòaⁿ-khin i.
6:31 Siat-sú hō͘ lâng lia̍h tio̍h, tio̍h pôe chhit pōe; tio̍h kā chhù lāi só͘-ū ê châi-bu̍t lóng the̍h chhut-lâi pôe.
6:32 Kah lâng ê bó͘ kiâⁿ kan-îm ê lâng to̍h-sī bô tì-sek; kiâⁿ chit-ê tāichì ê lâng ē sún-hāi kakī ê sèⁿ-miā.
6:33 I ē siū siong-hāi kah lêng-jio̍k; i ê kiàn-siàu bē tàng sé-tû.
6:34 In-ūi chi̍t-tò͘ ē kek-khí lâng ê tōa siū-khì; pò-siû ê sî it-tēng bô khoan-iông.
6:35 Lí ēng chîⁿ sio̍k-chōe, i mā bô ài; lí sûi-jiân sàng chin chē lé-mi̍h, i mā m̄-pàng lí soah.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。