箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 Tì-hūi ê Hó-chhù
Lín chiahê kiáⁿ, tio̍h thiaⁿ lāu-pē ê kà-sī; tio̍h choan-sim ha̍k-si̍p lâi tit tio̍h bêng-lí.
4:2 In-ūi góa ēng hó ê tō-lí hō͘ lín; tio̍h m̄ thang khì-sak góa ê hoat-tō͘.
4:3 Góa sī lāu-pē ê kiáⁿ, tī lāu-bú ê bīn-chêng chò i siōng thiàⁿ ê iù-siù kiáⁿ.
4:4 Lāu-pē kà-sī góa, kā góa kóng, " Lí ê sim tio̍h kì-tiâu góa ê ōe, chun-siú góa ê bēng-lēng, chiū ē tit tio̍h oa̍h-miā. "
4:5 Tio̍h tit tio̍h tì-hūi, tio̍h tit tio̍h chhong-bêng, m̄ thang bē kì-.tit, m̄ thang lī-khui góa só͘ kóng ê ōe.
4:6 M̄-thang khì-sak tì-hūi, i ē pó-hō͘ lí; tio̍h thiàⁿ tì-hūi, i ē chiàu-kò͘ lí.
4:7 Tì-hūi sī kin-pún, tio̍h tit tio̍h tì-hūi; tī lí it-chhè só͘ tit tio̍h ê tiong-kan, tio̍h tit tio̍h chhong-bêng.
4:8 Lí nā chun-tiōng tì-hūi, i ē hō͘ lí ko-seng; lí nā loân-bō͘ tì-hūi, i chiū hō͘ lí êng-kng.
4:9 Tì-hūi ē ēng súi ê bō-á tì tī lí ê thâu-khak; kā êng-kng ê bián-liû hō͘ lí.
4:10 Góa ê kiáⁿ, tio̍h chù-ì thiaⁿ lâi chiap-la̍p góa ê ōe, chiū ē chia̍h tn̂g hòe-siū.
4:11 Góa í-keng chí-sī lí tì-hūi ê lō͘, ín-chhōa lí kiâⁿ chèng-ti̍t ê tō-lō͘.
4:12 Lí kiâⁿ ê sî, bô tì-sú ū chó͘-gāi; lí cháu ê sî, mā bē tì-sú kha that tio̍h mi̍h-kiāⁿ.
4:13 Tio̍h chip-siú kà-sī, m̄ thang pàng-sang; tio̍h kín-sīn chun-siú, in-ūi chiahê kà-sī sī lí ê oa̍h-miā.
4:14 Hiong-ok ê lâng ê lō͘ m̄ thang ji̍p-.khì; pháiⁿ lâng ê lō͘ m̄ thang kiâⁿ.
4:15 Tio̍h siám-phiah, m̄ thang tùi hia kòe; tio̍h oa̍t-cháu lī-khui, chìn-chêng kiâⁿ-.khì.
4:16 In-ūi pháiⁿ lâng nā bô hāi lâng, chiū khùn bē khì; nā bô hō͘ lâng poa̍h-tó, chiū khùn bē lo̍h-bîn.
4:17 In-ūi in tùi hiong-ok tit tio̍h chia̍h piáⁿ; tùi kiông-pō tit tio̍h lim chiú.
4:18 To̍k-to̍k gī lâng ê lō͘ chhin-chhiūⁿ thàu-chá ê kng, ná chiàu ná-kng, ti̍t-kàu tiong-tàu.
4:19 Pháiⁿ lâng ê lō͘ chhin-chhiūⁿ o͘-àm, in kha that tio̍h mā m̄-chai siáⁿ-mi̍h goân-in.
4:20 Góa ê kiáⁿ, tio̍h chù-ì thiaⁿ góa ê ōe, àⁿ hīⁿ-khang thiaⁿ góa só͘ kóng ê kà-sī.
4:21 M̄-thang hō͘ kà-sī lī-khui lí ê ba̍k-chiu, tio̍h kì-tiâu tī lí ê sim-lāi.
4:22 In-ūi chhōe tio̍h ê lâng, chiū ē tit tio̍h oa̍h-miā, jî-chhiáⁿ choân seng-khu tit tio̍h ióng-kiāⁿ.
4:23 Lí tio̍h chīn-la̍t pó-siú lí ê sim, in-ūi sim sī oa̍h-miā ê kin-goân.
4:24 Lí ê chhùi tio̍h tû-khì siâ-ok; Lí ê chhùi-tûn tio̍h lī-khui hêng-ge̍k.
4:25 Lí ê ba̍k-chiu tio̍h khòaⁿ ti̍t-ti̍t; lí ê ba̍k-chiu tio̍h khòaⁿ thâu-chêng.
4:26 Tio̍h siu pêⁿ lí kha kiâⁿ ê lō͘; tio̍h kian-kò͘ lí só͘-ū ê lō͘-tô͘.
4:27 M̄-thang phian chó phian iū; tio̍h hō͘ lí ê kha lī-khui pháiⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。