出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 Mô͘-se kò͘ i ê tiūⁿ-lâng — Mí-tiân ê chè-si E-thu-ló ê iûⁿ-kûn, kóaⁿ iûⁿ khì khòng-iá ê āu-bīn, kàu Siōng-tè ê soaⁿ, to̍h-sī Hô-lep soaⁿ.
3:2 Siōng-chú ê sù-chiá tī chhì-phè lāi ê hóe-iām tiong tùi i chhut-hiān. I khòaⁿ tio̍h chhì-phè teh to̍h, lí khòaⁿ, chhì-phè ā bô hō͘ hóe sio-.khì.
3:3 Mô͘-se kóng, " Góa taⁿ beh oat kòe-khì khòaⁿ chit-ê kéng-siōng, chit-ê chhì-phè ná ē bô sio-.khì? "
3:4 Siōng-chú khòaⁿ tio̍h i oat-khì beh khòaⁿ, Siōng-tè chiū tùi chhì-phè lāi kā i kóng, " Mô͘-se, Mô͘-se. " I chiū ìn kóng, " Góa tī chia. "
3:5 Siōng-tè chiū kóng, " Lí m̄ thang óa-.lâi, tio̍h thǹg lí ê ê, in-ūi lí khiā ê só͘-chāi sī sèng-tē. "
3:6 Koh kóng, " Góa sī lí ê chó͘-sian ê Siōng-tè — A-bu-la-hàm ê Siōng-tè, Í-sak ê Siōng-tè, Iâ-kop ê Siōng-tè. " Mô͘-se cha̍h i ê bīn, m̄-káⁿ khòaⁿ Siōng-tè.
3:7 Siōng-chú kóng, " Góa ê chú-bîn tòa tī Ai-gi̍p ê sî, in ê khùn-khó͘ Góa si̍t-chāi í-keng ū khòaⁿ tio̍h à; in ūi tio̍h tok-kang ê khó͘-to̍k lâi tōa-siaⁿ âu-kiò, Góa í-keng thiaⁿ tio̍h à. Góa pún-lâi to̍h chai-iáⁿ in ê thòng-khó͘.
3:8 Taⁿ Góa lo̍h-lâi beh kiù in thoat-lī Ai-gi̍p lâng ê chhiú, chhōa in chhut hit-ê só͘-chāi, kàu pûi súi koh khui-khoah ê tē, kàu lâu leng kah bi̍t ê tē, to̍h-sī Ka-nân, Hiat, A-mô͘-lī, Pe-lí-ji, Hi-bī, I-é-bú-suh, hiahê cho̍k ê só͘-chāi.
3:9 Taⁿ I-su-la-el lâng tōa-siaⁿ âu-kiò ê siaⁿ hō͘ Góa thiaⁿ-.tio̍h, Góa mā khòaⁿ tio̍h Ai-gi̍p lâng kā in khó͘-to̍k ê kan-khó͘.
3:10 Taⁿ lí lâi, Góa beh chhe lí khì kìⁿ Hôa-láu, chhōa Góa ê chú-bîn — I-su-la-el lâng chhut Ai-gi̍p. "
3:11 Mô͘-se tùi Siōng-tè kóng, " Góa sī siáⁿ lâng ē-tàng khì kìⁿ Hôa-láu, chhōa I-su-la-el lâng chhut Ai-gi̍p? "
3:12 Siōng-tè kóng, " Góa si̍t-chāi ē kah lí tông-chāi, lí chhōa jîn-bîn chhut Ai-gi̍p liáu-āu, lín ē tī chit-ê soaⁿ ho̍k-sāi Siōng-tè; che beh chò Góa chhe lí ê chèng-kì. "
3:13 Mô͘-se tùi Siōng-tè kóng, " Lí khòaⁿ, góa kàu I-su-la-el lâng hia, tùi in kóng, ' Lín chó͘-sian ê Siōng-tè chhe góa lâi lín chia. ' In nā mn̄g góa kóng, ' I kiò siáⁿ-mi̍h miâ? ' Góa tio̍h án-chóaⁿ kā in hôe-tap? "
3:14 Siōng-tè tùi Mô͘-se kóng, " Góa sī chū-jiân jî-jiân ê "; koh kóng, " Lí tio̍h kā I-su-la-el lâng ánne kóng, ' Chū-jiân-.ê chhe góa lâi-kàu lín chia. '
3:15 Siōng-tè koh tùi Mô͘-se kóng, " Lí tio̍h tùi I-su-la-el lâng ánne kóng, ' Chhe góa lâi-kàu lín chia ê to̍h-sī Siōng-chú, lín chó͘-sian ê Siōng-tè — A-bu-la-hàm ê Siōng-tè, Í-sak ê Siōng-tè, Iâ-kop ê Siōng-tè. Che sī Góa éng-oán ê miâ, che sī Góa ê kì-liām kàu bān-sè-tāi. '
3:16 Lí khì chio-chi̍p I-su-la-el ê tiúⁿ-ló, kā in kóng, ' Siōng-chú — lín chó͘-sian ê Siōng-tè, to̍h-sī A-bu-la-hàm, Í-sak, Iâ-kop ê Siōng-tè tùi góa hián-hiān, kóng, ' Góa si̍t-chāi chiàu-kò͘ lín, lâng tī Ai-gi̍p só͘ kā lín khoán-thāi ê, Góa mā ū khòaⁿ-.tio̍h.
3:17 Góa mā bat kóng, ' Góa ē chhōa lín thoat-lī Ai-gi̍p ê kan-khó͘, khì-kàu Ka-nân, Hiat, A-mô͘-lī, Pe-lí-ji, Hi-bī, I-é-bú-suh, hiahê cho̍k ê tē, kàu lâu leng kah bi̍t ê tē. '
3:18 " In ē thiaⁿ lí ê ōe, lí kah I-su-la-el ê tiúⁿ-ló tio̍h khì kìⁿ Ai-gi̍p ông, kā i kóng, ' Hi-bú-lâi lâng ê Siōng-tè — Siōng-chú í-keng tú tio̍h goán, taⁿ kiû lí iông-ín goán khì khòng-iá, kiâⁿ saⁿ ji̍t ê lō͘-thêng, beh chè-sū Siōng-chú — goán ê Siōng-tè. '
3:19 Góa chai sûi-jiân ēng tōa koân-lêng ê chhiú, Ai-gi̍p ông mā m̄ hō͘ lín khì.
3:20 Góa ē chhun Góa ê chhiú, ēng Góa tī Ai-gi̍p tiong só͘ beh kiâⁿ it-chhè ê kî-sū lâi kā i phah, jiân-āu i chiah ē chún lín khì.
3:21 " Góa ē hō͘ chiahê jîn-bîn tī Ai-gi̍p lâng ê bīn-chêng tit tio̍h un-tián, hō͘ lín chhut-khì ê sî, bô khang-chhiú khì.
3:22 Chiahê chabó͘ lâng ta̍k-ê lóng ē tùi i ê chhù-piⁿ kah tòa tī i chhù lāi ê chabó͘ lâng thó gîn-khì, kim-khì kah saⁿ-khò͘, thang hō͘ lí ê kiáⁿ-jî ēng. Án-ne, lín ē khì chhiúⁿ Ai-gi̍p lâng. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。