詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
107:1 Si-phian Tē-gō͘ Koàn(107~150 phiⁿ)
O-ló Siōng-chú ê Chì-siān
Lín tio̍h kám-siā Siōng-chú, in-ūi I sī hó; in-ūi I ê chû-ài éng-oán chûn-chāi!
107:2 Siōng-chú só͘ kiù-sio̍k ê lâng tio̍h kóng chiahê ōe; to̍h-sī I tùi tùi-te̍k chhiú tiong só͘ kiù-sio̍k ê lâng,
107:3 Tùi ta̍k kok, tùi tang tùi sai, tùi lâm tùi-pak, só͘ chū-chi̍p óa-.lâi ê lâng lóng tio̍h ánne kóng.
107:4 In tī khòng-iá pha-hng ê lō͘ phiau-liû, chhōe bô siâⁿ thang tòa,
107:5 Pak-tó͘ iau koh chhùi-ta, in ê sim-sîn hūn-.khì.
107:6 In chiū tī khó͘-lān tiong ai-kiû Siōng-chú, I chiū tùi in ê hoān-lān tiong kā in chín-kiù,
107:7 Koh chhōa in kiâⁿ ti̍t ê lō͘, hō͘ in khì-kàu thang tòa ê siâⁿ.
107:8 Ūi tio̍h Siōng-chú ê chû-ài kah I tùi sè-kan lâng só͘ kiâⁿ ê kî-sū, goān lâng-lâng lóng oló I.
107:9 In-ūi I hō͘ pek-chhiat him-bō͘ ê sim tit tio̍h ti chiok, hō͘ iau-gō ê sim tit tio̍h hó-mi̍h chia̍h kàu pá.
107:10 Hiahê chē tī o͘-àm sí-ìm tiong ê lâng, siū khùn-khó͘ kah siū thih-liān khún-pa̍k ê lâng,
107:11 Sī in-ūi in pōe-ge̍k Siōng-tè ê ōe, khòaⁿ-khin Chì-koân-.ê ê chí-ì.
107:12 Só͘-í, I ēng lô-khó͘ kà-koai in ê sim; in poa̍h-tó, bô lâng hû-chō͘.
107:13 In chiū tī khó͘-lān tiong ai-kiû Siōng-chú, I chiū kái-kiù in thoat-lī hoān-lān.
107:14 I tùi o͘-àm sí-ìm tiong chhōa in chhut-.lâi, kā pa̍k in ê soh chhoah-tn̄g.
107:15 Ūi tio̍h Siōng-chú ê chû-ài kah I tùi sè-kan lâng só͘ kiâⁿ ê kî-sū, goān lâng-lâng lóng oló I;
107:16 In-ūi I phah-phòa tâng ê mn̂g, chám-tn̄g thih ê mn̂g-chhòaⁿ.
107:17 Gōng lâng in-ūi in ê kòe-sit, koh in-ūi in ê chōe-ok siū khó͘-to̍k.
107:18 In ê sim thó-ià ta̍k chióng ê chia̍h-mi̍h, í-keng óa-kīn sí-bông ê mn̂g.
107:19 In chiū tī khó͘-lān tiong ai-kiû Siōng-chú, I chiū kái-kiù in thoat-lī hoān-lān.
107:20 I chhut bēng-lēng kā in i hó, kiù in thoat-lī sí-bông.
107:21 Ūi tio̍h Siōng-chú ê chû-ài kah I tùi sè-kan lâng só͘ kiâⁿ ê kî-sū, goān lâng-lâng lóng oló I.
107:22 Mā goān in hiàn kám-siā ê chè, chhut hoaⁿ-hí ê siaⁿ kóng-khí I ê só͘ chò.
107:23 Chē chûn kòe hái, tī tōa hái tiong keng-êng sū-gia̍p ê lâng,
107:24 In ū khòaⁿ tio̍h Siōng-chú ê só͘ chò kah I tī chhim-ian só͘ kiâⁿ ê kî-sū.
107:25 In-ūi I chi̍t ē bēng-lēng, kông hong chiū khí, hái-éng chiū giâ khí-.lâi.
107:26 In chiūⁿ-kàu kiong-chhong, lo̍h kàu hái-té; in in-ūi gûi-hiám, sîn-hûn siau-sòaⁿ.
107:27 In tian-tian tó-tó, tang-tó sai-oai, chhin-chhiūⁿ chiú-chùi ê lâng; in ê tì-hūi bô hoat-tō͘ hoat-hui chhut-.lâi.
107:28 In chiū tī khó͘-lān tiong ai-kiû Siōng-chú, I kā in tùi hoān-lān tiong chhōa chhut-.lâi.
107:29 I hō͘ kông hong tiāⁿ lo̍h-.lâi, hái-éng chiū pêng-chēng.
107:30 Hong tiāⁿ éng chēng, in chiū hoaⁿ-hí; I chiū chhōa in kàu in só͘ ài khì ê káng-kháu.
107:31 Ūi tio̍h Siōng-chú ê chû-ài kah I tùi sè-kan lâng só͘ kiâⁿ ê kî-sū, goān lâng-lâng lóng oló I.
107:32 Goān in tī jîn-bîn ê hōe tiong chun I chò koân, tī tiúⁿ-ló ê chō-ūi oló I.
107:33 I hō͘ kang-hô piàn-chò khòng-iá, hō͘ chúi-chôaⁿ piàn-chò ta-sò ê tē.
107:34 I hō͘ pûi tē piàn-chò kiâm tē, lóng sī in-ūi tòa tī hia ê lâng ê chōe.
107:35 I hō͘ khòng-iá piàn-chò thâm-khut, hō͘ ta tē piàn-chò chúi-chôaⁿ.
107:36 I hō͘ iau-gō ê lâng tòa tī hia, hō͘ in ē-tàng khí-chō thang tòa ê siâⁿ;
107:37 koh chèng-choh chhân-hn̂g, chai phû-tô, tit tio̍h só͘ chhut ê lông-sán-bu̍t.
107:38 I koh siúⁿ-sù hok-khì hō͘ in, hō͘ in seⁿ-thòaⁿ chin chē, mā hō͘ in ê chengseⁿ bô kiám-chió.
107:39 In koh in-ūi pō-gio̍k, hoān-lān, iu-khó͘, jîn-kháu chiū kiám-chió koh hō͘ lâng khòaⁿ-khin.
107:40 I hō͘ kùi-cho̍k siū khòaⁿ-khin, hō͘ in phiau-liû tī pha-hng bô lō͘ ê só͘-chāi.
107:41 M̄ koh, I kí-khí sànchhiah lâng, hō͘ in thoat-lī khó͘-lān, hō͘ i ê ka-cho̍k heng-ōng chhin-chhiūⁿ iûⁿ-kûn.
107:42 Chèng-ti̍t ê lâng ē khòaⁿ tio̍h lâi hoaⁿ-hí; só͘-ū pháiⁿ lâng ê chhùi ē that-ba̍t.
107:43 Kiàn-nā ū tì-hūi ê lâng ē koan-sim chiahê tāichì, mā ē siàu-liām Siōng-chú ê chû-ài.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。