出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 Mô͘-se ê Chhut-sì
Ū chi̍t-ê Lē-bī cho̍k ê lâng khì chhōa chi̍t-ê Lē-bī cho̍k ê chabó͘ gín'á lâi chò bó͘.
2:2 Hitê chabó͘ lâng hoâi-īn, seⁿ chi̍t-ê kiáⁿ, khòaⁿ tio̍h i sī chi̍t-ê chheng-siù ê gín'á, chiū kā i chhàng saⁿ goe̍h-ji̍t.
2:3 Āu-lâi, i khòaⁿ bē tàng koh chhàng tit, chiū ūi tio̍h i chhú lô͘-tek lâi chò siuⁿ-á, koh ēng chio̍h-iû kah tá-má-ka lâi kô͘, kā gín'á hē tī hit lāi-bīn, hē lo̍h-khì tī hô piⁿ lô͘-úi ê tiong-kan.
2:4 I ê tōa-ché tī hn̄g-hn̄g khiā-teh khòaⁿ, ài beh chai i ē tú tio̍h án-chóaⁿ.
2:5 Hôa-láu ê chabó͘ kiáⁿ lo̍h-lâi hô-.ni̍h beh sé-e̍k, i hiahê lú-pī tī hô piⁿ kiâⁿ-iû, i khòaⁿ tio̍h lô͘-úi ê tiong-kan ū siuⁿ-á, chiū chhe chi̍t-ê lú-pī khì kā siuⁿ-á giâ-.lâi.
2:6 Hian-khui khòaⁿ tio̍h lāi-bīn ū gín'á teh háu, i chiū kā i liân-bín, kóng, " Che to̍h-sī Hi-bú-lâi lâng ê gín'á. "
2:7 I ê tōa-ché lâi kā Hôa-láu ê chabó͘ kiáⁿ kóng, " Góa lâi-khì Hi-bú-lâi chabó͘ lâng ê tiong-kan kiò chi̍t-ê leng-bú, kā lí io chit-ê gín'á, kám hó? "
2:8 Hôa-láu ê chabó͘ kiáⁿ kā i kóng, " Lí thang khì. " Gín-á ê tōa-ché chiū khì kiò gín'á ê lāu-bú.
2:9 Hôa-láu ê chabó͘ kiáⁿ kā i kóng, " Phō chit-ê gín'á khì, thè góa kā i io, góa ē hō͘ lí kang-chîⁿ. " Cha-bó͘ lâng chiū phō gín'á tńg-khì io.
2:10 Gín-á chiām-chiām tōa-hàn, chabó͘ lâng chiū chhōa i kàu Hôa-láu ê chabó͘ kiáⁿ hia, chò i ê kiáⁿ. I kā i hō-miâ kiò-chò Mô͘-se, kóng, " In-ūi góa tùi chúi-.ni̍h kā i kiù khí-.lâi. "
2:11 Mô͘-se Liû-bông Kàu Mí-tiân
Āu-lâi, Mô͘-se í-keng tióng-sêng, i chhut-khì kàu i ê tông-pau hia, khòaⁿ tio̍h in teh chò khó͘-kang. I khòaⁿ tio̍h chi̍t-ê Ai-gi̍p lâng teh phah chi̍t-ê Hi-bú-lâi lâng, to̍h-sī i ê tông-pau.
2:12 I khòaⁿ sì-kho͘-ûi bô lâng tī hia, chiū phah-sí hit-ê Ai-gi̍p lâng, kā i tâi tī soa-.ni̍h.
2:13 Keh tńg kang koh chhut-.khì, khòaⁿ tio̍h ū nn̄g-ê Hi-bú-lâi lâng teh sio-phah, chiū tùi hit-ê m̄ tio̍h-.ê kóng, " Lí ná ē phah lí ê tâng-phōaⁿ? "
2:14 Hitê lâng kóng, " Siáⁿ lâng siat-li̍p lí chò siú-léng kah sím-phòaⁿ-koaⁿ lâi koán goán? Lí kám ē siūⁿ beh phah-sí góa, chhin-chhiūⁿ phah-sí hit-ê Ai-gi̍p lâng? " Mô͘-se kiaⁿ chi̍t tiô, kóng, " Chit-ê tāichì chin-chiàⁿ pō-lō͘ ā. "
2:15 Hôa-láu thiaⁿ tio̍h chit-ê tāichì, chiū siūⁿ beh thâi Mô͘-se, chóng-.sī, Mô͘-se siám-phiah Hôa-láu, cháu-khì Mí-tiân tē tòa, chē tī kó͘-chéⁿ piⁿ.
2:16 Mí-tiân ê chè-si ū chhit-ê chabó͘ kiáⁿ, in lâi chhiūⁿ chúi, it-ti̍t kàu móa chô, hō͘ lāu-pē ê iûⁿ-kûn lim.
2:17 Hiahê kò͘ iûⁿ-.ê lâi-kàu-ūi, chiū beh kā in kóaⁿ-cháu. Mô͘-se chiū khí-lâi kā in pang-chān, hō͘ in ê iûⁿ-kûn lim chúi.
2:18 In lâi-kàu lāu-pē Liû-el hia, lāu-pē mn̄g kóng, " Kin-á-ji̍t lín ná ē hiah kín tńg-.lâi? "
2:19 In kóng, " Ū chi̍t-ê Ai-gi̍p lâng kiù goán thoat-lī kò͘ iûⁿ ê lâng ê chhiú, koh thè goán chhut-la̍t chhiūⁿ chúi hō͘ iûⁿ-kûn lim. "
2:20 I tùi i hiahê chabó͘ kiáⁿ kóng, " Hitê lâng tī tó-ūi? Lín ná ē kā i pàng tī hia? Tio̍h chhiáⁿ i lâi chia̍h pn̄g. "
2:21 Mô͘-se goān-ì kah hit-ê lâng tòa, i chiū kā i ê chabó͘ kiáⁿ Chi̍p-pho-la̍h kè hō͘ Mô͘-se.
2:22 In seⁿ chi̍t-ê kiáⁿ, Mô͘-se kā i hō-miâ kiò-chò Kel-sióng, in-ūi kóng, " Góa kià-kha tī gōa-pang. "
2:23 Keng-kòe chin chē nî liáu-āu, Ai-gi̍p ông sí. I-su-la-el lâng in-ūi chò khó͘-kang, chiū thó͘-khùi tōa-siaⁿ hoah, Siōng-tè thiaⁿ tio̍h in chò khó͘-kang tōa-siaⁿ hoah ê siaⁿ.
2:24 Siōng-tè thiaⁿ tio̍h in ê ai-siaⁿ thó͘-khùi, Siōng-chú chiū siūⁿ-khí I kah A-bu-la-hàm, Í-sak, Iâ-kop só͘ li̍p ê iok.
2:25 Siōng-tè khòaⁿ-kò͘ I-su-la-el lâng, Siōng-chú mā chai-iáⁿ in ê tāichì.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。