詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
106:1 Ēng Jîn-chû Tùi-thāi I ê Chú-bîn
Lín tio̍h oló Siōng-chú! Lín tio̍h kám-siā Siōng-chú, in-ūi I sī hó; I ê chû-ài éng-oán chûn-chāi.
106:2 Siáⁿ lâng ē-hiáu kóng-khí Siōng-chú ê tōa koân-lêng? Siáⁿ lâng ē-tàng kóng-chhut I it-chhè ê miâ-siaⁿ?
106:3 Kiàn-nā chun-siú kong-pêⁿ, tiāⁿtiāⁿ kiâⁿ kong-gī ê, chit chióng lâng chiū ē ū hok-khì!
106:4 Siōng-chú ah, Lí ēng un-hūi khoán-thāi Lí ê chú-bîn; kiû Lí mā ēng che kì-liām góa, kiû Lí hō͘ kiù-un lîm-kàu góa,
106:5 Hō͘ góa khòaⁿ tio̍h Lí kéng-soán ê chú-bîn ê hok-khì kah Lí ê kok chò-hóe hoaⁿ-hí khoài-lo̍k kah Lí ê chú-bîn chò-hóe êng-kng.
106:6 Goán kah goán ê chó͘-sian kāng-khoán hoān chōe, goán chok-gia̍t, kiâⁿ pháiⁿ.
106:7 Goán ê chó͘-sian tī Ai-gi̍p bô bêng-pe̍k Lí só͘ chò ê kî-sū, bē kì-tit Lí hong-sēng ê chû-ài, hoán-tńg tī Âng-hái kiâⁿ pōe-ge̍k.
106:8 M̄ koh, I ūi tio̍h kakī ê miâ kā in chín-kiù, lâi hián-bêng I ê tōa koân-lêng.
106:9 Koh hoah Âng-hái, hái chiū ta; I chhōa in keng-kòe chhim ê só͘-chāi, ná chhin-chhiūⁿ teh keng-kòe khòng-iá.
106:10 I kiù in thoat-lī oàn-hūn in ê lâng ê chhiú, tùi tùi-te̍k ê chhiú tiong kā in kiù-sio̍k.
106:11 Chúi im-sí in ê tùi-te̍k, bô lâu kah pòaⁿ-ê.
106:12 Hit sî, in chiah sìn I ê ōe, chhiùⁿ koa oló I.
106:13 In chin kín to̍h bē kì-tit I ê só͘ chò, bô thèng-hāu I ê chí-sī.
106:14 Hoán-tńg tī khòng-iá tōa khí tham-io̍k, tī pha-hng ê só͘-chāi chhì-thàm Siōng-tè.
106:15 I kā in só͘ kiû ê lóng hō͘ in, M̄ koh, hō͘ in ê sîn-hûn soe-lám.
106:16 In koh tī iâⁿ tiong oàn-tò͘ Mô͘-se kah Siōng-chú sèng-pia̍t ê A-lông.
106:17 Tē chiū li̍h-.khui, thun-bia̍t Ta-than, iám-ba̍t A-mí-lâm hit-tīn lâng.
106:18 Ū hóe tī hit-tīn lâng tiong-kan hoat-khí; ū hóe-iām sio-bia̍t hiahê pháiⁿ lâng.
106:19 In tī Hô-lep soaⁿ chō gû-á, phak-pài in só͘ chù ê ngó͘-siōng.
106:20 Án-ne, kā in ê êng-kng ōaⁿ-chò chia̍h chháu ê gû-á siōng.
106:21 In bē kì-tit chín-kiù in ê Siōng-tè; I bat tī Ai-gi̍p tùi in chò tōa tāichì,
106:22 Tī Hâm ê tē kiâⁿ kî-sū, tī Âng-hái kiâⁿ thang kiaⁿ ê tāichì.
106:23 Só͘-í, I kóng beh kā in siau-bia̍t; nā m̄-sī ū I só͘ kéng-soán ê Mô͘-se khiā tī I ê bīn-chêng lâi bán-hôe I ê siū-khì, I chá to̍h kā in bia̍t-bông à.
106:24 In koh khòaⁿ-khin hit-ê hó ê tē, m̄-sìn I ê ōe.
106:25 In tī in pò͘-pêⁿ lāi hoat-chhut oàn-hūn ê ōe, m̄-thiaⁿ-thàn Siōng-chú ê ōe.
106:26 Só͘-í, I tùi in gia̍h chhiú chiùchōa, beh hō͘ in sí tī khòng-iá,
106:27 Hō͘ in ê kiáⁿ-sun sí tī lia̍t kok ê tiong-kan, sì-sòaⁿ tī ta̍k só͘-chāi.
106:28 In koh khì pài Pau-al ê Ba-al, chia̍h chè hiàn hō͘ bô oa̍h-miā ê sîn-bêng ê chè-mi̍h.
106:29 In ánne chò jiá-khí I ê siū-khì, chiū ū un-e̍k tī in tiong-kan liû-hêng.
106:30 Hit sî, Hui-ne-hah chhut-lâi ūi in pâi-kái, un-e̍k chiah soah.
106:31 Chit-ê tāichì Siōng-tè kā i sǹg-chò sī gī, sè-sè tāi-tāi, it-ti̍t kàu éng-oán.
106:32 In tī Me-lí-bah ê chúi-chôaⁿ koh hō͘ Siōng-chú siū-khì, sīm-chì Mô͘-se ūi tio̍h in ê iân-kò͘ mā siū liân-lūi;
106:33 sī in-ūi in ngó͘-ge̍k in ê Siōng-tè, tì-sú Mô͘-se kóng-chhut sò-sèng chhong-pōng ê ōe.
106:34 Siōng-chú kā in hoan-hù tio̍h châu-bia̍t hiahê jîn-bîn, in bô chun-thàn Siōng-chú,
106:35 Hoán-tńg kah gōa-pang lâng hūn-cha̍p thong-hun, o̍h in ê só͘ chò,
106:36 ho̍k-sāi in ê ngó͘-siōng, kiat-kó chiâⁿ-chò hāi in ê hām-chéⁿ.
106:37 In kā in ê kiáⁿ-jî chò chè-mi̍h, lâi hiàn hō͘ kúi-sîn,
106:38 in lâu bô chōe ê lâng ê hoeh, to̍h-sī in ê kiáⁿ-jî ê hoeh, kā in chò chè-mi̍h hiàn hō͘ Ka-nân ê ngó͘-siōng, hit-ê tē chiū hō͘ hoeh òe lahsap.
106:39 Án-ne, in hō͘ kakī ê hêng-ûi òe lahsap, tī in ê só͘ chò hoān tio̍h îm-hēng.
106:40 Só͘-í, Siōng-chú tùi I ê chú-bîn hoat-chhut siū-khì, thó-ià I ê sán-gia̍p — I-su-la-el.
106:41 I kā in kau hō͘ gōa-pang lâng ê chhiú; oàn-hūn in ê lâng chiū kā in koán-hat.
106:42 In ê tùi-te̍k mā kā in ap-chè, in chiū khut-ho̍k tī tùi-te̍k ê chhiú-hā.
106:43 Siōng-chú chin chē pái kā in chín-kiù, m̄ koh, in tī in ê kè-bô͘ tiong pōe-ge̍k I; in-ūi kakī ê chōe-ok soah tì-kàu tūi-lo̍h.
106:44 I thiaⁿ tio̍h in teh ai-kiò ê sî, iáu koh thé-thiap in ê gûi-kip.
106:45 I ūi tio̍h in lâi kì-liām I ê iok, chiàu I hong-sēng ê chû-ài hôe-sim choán-ì,
106:46 I mā hō͘ in tī só͘-ū lia̍h in ê lâng ê bīn-chêng tit tio̍h liân-bín.
106:47 Siōng-chú — goán ê Siōng-tè ah, kiû Lí chín-kiù goán, tùi gōa-pang tiong kā goán chū-chi̍p; thang hō͘ goán kám-siā Lí ê sèng-miâ, lia̍h Lí ê siū oló chò tōa hoaⁿ-hí.
106:48 Tio̍h oló Siōng-chú — I-su-la-el ê Siōng-tè, tùi éng-oán kàu éng-oán. Goān chèng lâng lóng kóng, A-men! Lín tio̍h oló Siōng-chú!
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。