詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
105:1 Siōng-tè kah I ê Chú-bîn
( LTS 16: 8-22)
Lín tio̍h kám-siā Siōng-chú, kiû-kiò I ê miâ, tī bān-bîn tiong-kan soan-iông I ê chok-ûi!
105:2 Tio̍h ǹg I gîm-si, ǹg I chhiùⁿ koa oló! Tâm-lūn I it-chhè kî-biāu ê só͘ chò!
105:3 Tio̍h in-ūi I ê sèng-miâ lâi khoa-kháu! Cháu-chhōe Siōng-chú ê lâng, sim-lāi tio̍h hoaⁿ-hí!
105:4 Tio̍h óa-khò Siōng-chú kah I ê koân-lêng, tiāⁿtiāⁿ cháu-chhōe lâi kìⁿ I ê bīn.
105:5 I ê lô͘-po̍k A-bu-la-hàm ê kiáⁿ-sun kah I só͘ kéng-soán Iâ-kop ê kiáⁿ-sun,
105:6 Lín tio̍h siàu-liām I só͘ chò kî-biāu ê tāichì kah I ê sîn-jiah, í-ki̍p I ê chhùi só͘ phòaⁿ-toàn ê ōe.
105:7 I sī Siōng-chú — lán ê Siōng-tè; choân tē lóng ū I ê sím-phòaⁿ.
105:8 I kì-liām I ê iok it-ti̍t kàu éng-oán; I só͘ èng-ín ê ōe it-ti̍t kàu bān-sè-tāi;
105:9 to̍h-sī kah A-bu-la-hàm só͘ li̍p ê iok, tùi Í-sak só͘ chiù ê chōa.
105:10 I koh kā chit-ê iok tùi Iâ-kop tiāⁿ tio̍h chò lu̍t-lē, tùi I-su-la-el tiāⁿ tio̍h chò éng-oán ê iok.
105:11 I kóng: Góa beh kā Ka-nân tē siúⁿ-sù hō͘ lí, chò lí sán-gia̍p ê hūn-gia̍h.
105:12 Tong-sî in ê jîn-teng iú-hān, jîn-sò͘ chin chió, koh tī hia sī chò chhut-gōa lâng.
105:13 In tùi chit cho̍k kiâⁿ kàu hit cho̍k, tùi chit kok kiâⁿ kàu hit kok.
105:14 I bô iông-ín siáⁿ lâng khi-hū in, ūi tio̍h in ê iân-kò͘ I khián-chek hiahê kun-ông.
105:15 I kóng: M̄-thang kha̍p tio̍h góa só͘ boah iû ê, mā m̄ thang pháiⁿ khoán-thāi góa ê sian-ti.
105:16 I bēng-lēng ki-hng kàng-lo̍h tī hit-ê thó͘-tē, kā in só͘ óa-khò ê bí-niûⁿ lóng toān-choa̍t.
105:17 I tī in ê thâu-chêng chhe chi̍t-ê lâng seng khì, to̍h-sī Iô-sé-huh siū bē khì chò lô͘-lē.
105:18 Lâng ēng kha-liâu chhiú-khàu siong i ê kha, i ê ām-kún siū thih-liān khún-pa̍k.
105:19 Siōng-chú ê ōe kā i chhì-thàm, it-ti̍t kàu I só͘ kóng ê èng-giām.
105:20 Ông chhe lâng khì kā i tháu-khui, to̍h-sī tī-lí jîn-bîn ê Hôa-láu kā i tháu-pàng.
105:21 Ông siat-li̍p i chò ông-ka ê cháiⁿ-siòng, koán-lí i it-chhè só͘-ū ê châi-bu̍t,
105:22 Ē-tàng sûi-ì pa̍k i ê jîn-sîn, ēng tì-hūi kà-sī i ê tiúⁿ-ló.
105:23 I-su-la-el mā lâi-kàu Ai-gi̍p; Iâ-kop chhut-gōa khì tī Hâm ê tē.
105:24 Siōng-chú hō͘ i ê jîn-bîn seⁿ-thòaⁿ chin chē, hō͘ in pí tùi-te̍k khah kiông.
105:25 I piàn-ōaⁿ tùi-te̍k ê sim lâi oàn-hūn I ê chú-bîn, sòa ēng kúi-chà ê kè-bô͘ khoán-thāi I ê lô͘-po̍k.
105:26 I chhe I ê lô͘-po̍k Mô͘-se, kah I só͘ kéng-soán ê A-lông.
105:27 In tī tùi-te̍k ê tiong-kan kiâⁿ I ê sîn-jiah, tī Hâm ê tē kiâⁿ kî-sū.
105:28 I bēng-lēng o͘-àm, tē chiū ū o͘-àm; lóng bô ûi-pōe I ê ōe.
105:29 I hō͘ in ê chúi piàn-sêng hoeh, hō͘ in ê hî lóng sí-.khì.
105:30 Tī in ê thó͘-tē chhân-kap-á seⁿ-thòaⁿ chin chē, liân ông ê pâng-keng mā ū.
105:31 I chi̍t-ē chhut siaⁿ, hô͘-sîn kui tīn poe-.lâi, Koh ū sat-bó tī in ê kéng lāi móa sì-kè.
105:32 I lo̍h pha̍uh hō͘ in chò hō͘; tī in ê thó͘-tē kàng-lo̍h iām-hóe.
105:33 I mā phah-tó in ê phû-tô chhiū kah bû-hoa-kó chhiū, húi-hoāi in kéng lāi ê chhiū-ba̍k.
105:34 I chi̍t-ē chhut siaⁿ, chháu-meh chiū poe-.lâi, chháu-meh chē kah sǹg bē liáu,
105:35 Kā in thó͘-tē ê chhài-se chia̍h liáu-liáu, koh chia̍h in chhân-hn̂g só͘ chhut-sán ê ngó͘-kok.
105:36 I koh phah-sí kok lāi só͘-ū ê tōa-kiáⁿ, to̍h-sī hiahê teh beh chiâⁿ-chò in khùi-la̍t ê khí-thâu.
105:37 I chhōa in chhut-.lâi, tòa gîn tòa kim; I ê chi-cho̍k tiong bô kah chi̍t-ê loán-jio̍k ê lâng.
105:38 In chhut-.lâi ê sî, Ai-gi̍p lâng tōa hoaⁿ-hí, in-ūi Ai-gi̍p lâng bat ūi tio̍h in lâi kiaⁿ.
105:39 I khí hûn hō͘ in chò pò͘-phâng, àm-sî ēng hóe kā in chiò-kng.
105:40 In chi̍t-ē khún-kiû, I chiū hō͘ ian-chhun poe-.lâi, koh tùi thiⁿ kàng-lo̍h piáⁿ hō͘ in pá-chiok.
105:41 I phah-khui chio̍h-pôaⁿ, chúi chiū chhèng chhut-.lâi; tī ta tē chúi-lâu chhin-chhiūⁿ hô.
105:42 In-ūi I kì-liām I sîn-sèng ê èng-ín, mā kì-liām I ê lô͘-po̍k — A-bu-la-hàm.
105:43 I chhōa I ê chú-bîn hoaⁿ-hoaⁿ hí-hí chhut-.lâi, chhōa I kéng-soán ê chú-bîn chhiùⁿ hoaⁿ-hí ê koa chhut-.lâi.
105:44 I kā lia̍t kok ê tē siúⁿ-sù hō͘ in, in chiū sêng-chiap hiahê jîn-bîn lô-khó͘ só͘ tit tio̍h ê sán-gia̍p;
105:45 I beh hō͘ in chun-thàn I ê lu̍t-lē, chun-siú I ê hoat-tō͘. Lín tio̍h oló Siōng-chú!
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。