出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 I-su-la-el Lâng tī Ai-gi̍p Chò Lô͘-Lē
I-su-la-el ê chèng kiáⁿ ta̍k-ê chhōa i ê ka-koàn kah Iâ-kop chò-hóe lâi-kàu Ai-gi̍p, in ê miâ kì tī ē-té:
1:2 Lū-biān, Si-miān, Lē-bī, Iô-tah,
1:3 It-sa-kal, Che-bú-lông, Biān-iá-mín,
1:4 Tàn, Ná-hu-tha-lím, Ga̍t, A-sel.
1:5 Tùi Iâ-kop só͘ seⁿ ê, chóng-kiōng ū chhit-cha̍p lâng. Iô-sé-huh í-keng tī Ai-gi̍p.
1:6 Iô-sé-huh kah i ê hiaⁿ-tī, í-ki̍p hit tāi ê lâng lóng sí.
1:7 I-su-la-el lâng gâu seⁿ koh gâu thòaⁿ, jîn-kháu ke-thiⁿ chin chē koh heng-ōng, hui-siông kiông-sēng, chhiong-móa hit-ê só͘-chāi.
1:8 Ai-gi̍p ū sin ê ông heng-khí, i m̄ bat Iô-sé-huh.
1:9 Ông tùi i ê jîn-bîn kóng, " Lí khòaⁿ, chiahê jîn-bîn — I-su-la-el lâng pí lán khah chē koh khah kiông.
1:10 Lâi! Lán tio̍h ēng kè-chhek lâi tùi-thāi in, khióng-kiaⁿ in ke-thiⁿ chin chē, āu-lâi nā tú tio̍h kau-chiàn ê tāichì, in ē kah lán ê tùi-te̍k liân-ha̍p lâi kong-kek lán, koh tùi chit-ê tē lī-khui-.khì. "
1:11 Chiū ánne, siat-li̍p tok-kang lâi kā in koán-hat, ēng tāng-tàⁿ kā in khó͘-to̍k, in chiū kā Hôa-láu khí Pí-thom kah Lâm-sek nn̄g-ê siâⁿ chò kim-khò͘.
1:12 Chóng-.sī, Hôa-láu ná kā in khó͘-to̍k, in ná chē soah ná hoat-tián. Chiū ánne, ông to̍h ūi tio̍h I-su-la-el lâng chhau-hoân.
1:13 Ai-gi̍p lâng chiū tok-chek I-su-la-el lâng chò khó͘-kang,
1:14 Hō͘ in chò-kang, seng-oa̍h kan-khó͘, chhiau-thô͘ chò chng kah chò chhân-.ni̍h ê kang, tī só͘ chò it-chhè ê kang lóng chin giâm.
1:15 Ū Hi-bú-lâi ê sán-pô, chi̍t-ê miâ kiò Si-hu-la̍h, chi̍t-ê miâ kiò Phó͘-a.
1:16 Ai-gi̍p ông tùi in kóng, " Lín kā Hi-bú-lâi ê chabó͘ lâng khioh-kiáⁿ, khòaⁿ in lîm-phûn ê sî, nā-sī chapo͘ gín'á, tio̍h hō͘ i sí; nā-sī chabó͘ gín'á, chiah thang hō͘ i oa̍h. "
1:17 Chóng-.sī, sán-pô kèng-ùi Siōng-tè, bô chiàu Ai-gi̍p ông ê bēng-lēng lâi chò, kèng-jiân lâu chapo͘ gín'á ê oa̍h-miā.
1:18 Ai-gi̍p ông chiū kiò sán-pô lâi, tùi in kóng, " Lín ná ē ánne chò, lâu chapo͘ gín'á ê oa̍h-miā? "
1:19 Sán-pô tùi Hôa-láu kóng, " Hi-bú-lâi ê chabó͘ lâng kah Ai-gi̍p ê chabó͘ lâng bô kāng, in khah ū oa̍h-la̍t, sán-pô iáu-bōe kàu, in í-keng seⁿ-liáu. "
1:20 Siōng-tè hó khoán-thāi sán-pô, jîn-bîn ke-thiⁿ chin chē, hui-siông kiông-sēng.
1:21 Sán-pô in-ūi kèng-ùi Siōng-tè, Siōng-tè chiū hō͘ in sêng-ka.
1:22 Hôa-láu hoan-hù i ê jîn-bîn kóng, " Só͘ seⁿ ê nā-sī chapo͘ kiáⁿ, lín tio̍h kā i hiat lo̍h-khì hô-.ni̍h, nā-sī chabó͘ gín'á, lín tio̍h lâu i ê sèⁿ-miā. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。