詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
80:1 Ūi Ho̍k-kok Kî-tó
( A-sah ê si, kau hō͘ ga̍k-koaⁿ; tiāu ēng " Chò kiàn-chèng ê pek-ha̍p hoe. ")Chhōa Iô-sé-huh chhin-chhiūⁿ teh chhōa iûⁿ-kûn ê I-su-la-el ê bo̍k-chiá ah, kiû Lí àⁿ hīⁿ-khang thiaⁿ; chē tī ki-lō͘-peng ê téng-bīn ê Chú ah, kiû Lí hoat-chhut Lí ê kng.
80:2 Tī E-hu-laim, Biān-iá-mín kah Má-ná-se ê bīn-chêng, kiû Lí si-tián Lí ê koân-lêng lâi kiù goán.
80:3 Siōng-tè ah, kiû Lí hō͘ goán tò tńg-.lâi, hō͘ Lí ê bīn hoat-chhut kng, goán chiū ē tit-kiù.
80:4 Bān-kun ê Siōng-tè — Siōng-chú ah, Lí tùi Lí chú-bîn ê kî-tó hoat-chhut siū-khì ē koh gōa kú?
80:5 Lí ēng ba̍k-sái chò chia̍h-mi̍h hō͘ in chia̍h, koh ēng chin chē ba̍k-sái hō͘ in lim.
80:6 Lí hō͘ keh-piah kok In-ūi goán lâi sio-cheⁿ, goán ê tùi-te̍k chò-hóe teh chhiò goán.
80:7 Bān-kun ê Siōng-tè ah, kiû Lí hō͘ goán tò tńg-.lâi, hō͘ Lí ê bīn hoat-chhut kng, goán chiū tit-kiù.
80:8 Lí tùi Ai-gi̍p sóa chhut chi̍t châng phû-tô chhiū, kóaⁿ-chhut lia̍t pang lâi kā i chai-chèng.
80:9 Lí tī i ê thâu-chêng piàⁿ khang thó͘-tē, i ê kin tèng chhim, chiū seⁿ-thòaⁿ móa-tē.
80:10 I ê iáⁿ jia-ba̍t chiahê soaⁿ, i ê ki chhin-chhiūⁿ chin hó ê pek-hiuⁿ chhiū.
80:11 I hoat-chhut i ê ki, chhun-kàu tōa hái, i ê tîn thòaⁿ kàu tōa hô.
80:12 Lí ná ē thiah-húi i ê lî-pa, chhut-chāi só͘-ū kòe lō͘ ê lâng lâi bán?
80:13 Chhiū-nâ lāi chhut-.lâi ê soaⁿ ti kā i chau-that; khòng-iá ê cháu-siù lâi kā i chia̍h.
80:14 Bān-kun ê Siōng-tè ah, kiû Lí tò tńg-.lâi! Kiû Lí tùi thiⁿ àⁿ lo̍h-lâi khòaⁿ, chiàu-kò͘ chit châng phû-tô chhiū,
80:15 Pó-hō͘ Lí chiàⁿ chhiú só͘ chai ê chhiū kah Lí ūi kakī só͘ kian-kò͘ ê ki.
80:16 Phû-tô-chhiū í-keng siū hóe sio, siū to chhò; kiû Lí tùi in hoat siū-khì, in chiū bia̍t-bông.
80:17 Goān Lí ê chhiú hōaⁿ tī Lí chiàⁿ pêng ê lâng, to̍h-sī Lí ūi kakī só͘ kian-kò͘ ê Jîn-chú.
80:18 Án-ne, goán chiū bô tò-thè lī-khui Lí; kiû Lí hō͘ goán tit tio̍h oa̍h, goán chiū beh kiû-kiò Lí ê miâ.
80:19 Bān-kun ê Siōng-tè — Siōng-chú ah, kiû Lí hō͘ goán tò tńg-.lâi, hō͘ Lí ê bīn hoat-chhut kng, goán chiū tit-kiù!
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。