詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
78:1 Siōng-tè kah I ê Chú-bîn
（ A-sah kà-sī ê si. ） Góa ê chú-bîn, lín tio̍h thiaⁿ góa ê kà-sī, àn hīⁿ-khang thiaⁿ góa só͘ kóng ê ōe.
78:2 Góa beh khui chhùi kóng phì-jū; góa beh kóng-chhut kó͘-chá ê ò-pì,
78:3 Chiū-sī goán só͘ thiaⁿ-.tio̍h, só͘ chai ê, mā sī goán ê chó͘-sian thoân hō͘ goán ê tāichì.
78:4 Goán bô beh kā chiahê tāichì tùi in ê kiáⁿ-sun ún-môa, beh kā Siōng-tè ê miâ-siaⁿ kah I ê koân-lêng, í-ki̍p I só͘ chò kî-biāu ê tāichì thoân hō͘ āu sè-tāi.
78:5 In-ūi I tī Iâ-kop li̍p kiàn-chèng ê ōe, tī I-su-la-el siat lu̍t-hoat; I bēng-lēng lán ê chó͘-sian lâi thoân hō͘ in ê kiáⁿ-sun,
78:6 Hō͘ āu-tāi, to̍h-sī teh beh chhut-sì ê kiáⁿ-sun chai; jiân-āu koh thoân hō͘ in ê kiáⁿ-kiáⁿ sun-sun,
78:7 Hō͘ in thang gióng-bōng Siōng-tè, bô bē kì-tit choân-lêng Siōng-tè ê chok-ûi, lâi chun-siú I ê kài-bēng.
78:8 Bián-tit in chhin-chhiūⁿ in ê chó͘-sian, sī ngē-sim pōe-ge̍k ê sè-tāi, sī chûn-sim bô sì-chiàⁿ ê sè-tāi, in gióng-bōng Siōng-tè ê sim bô kian-kò͘.
78:9 E-hu-laim ê kiáⁿ-sun gia̍h bú-khì kah kiong-chìⁿ, lîm-tīn ê ji̍t, oa̍t tńg-sin tô-cháu.
78:10 In bô chun-siú Siōng-tè ê iok, m̄-khéng chiàu I ê lu̍t-hoat lâi kiâⁿ.
78:11 Koh bē kì-tit I ê chok-ûi kah I só͘ hō͘ in khòaⁿ ê kî-biāu tāichì.
78:12 I tī Ai-gi̍p tē, Chó-an ê chhân, tī in chó͘-sian ê ba̍k-chiu chêng kiâⁿ kî-ī ê tāichì.
78:13 I kā hái hun-khui hō͘ in kòe-.khì, koh hō͘ chúi chhin-chhiūⁿ thô͘-piah khiā khí-.lâi.
78:14 I ji̍t-sî ēng hûn chhōa in, koh kui mê ēng hóe ê kng chhōa in.
78:15 I tī khòng-iá hō͘ chio̍h-pôaⁿ li̍h-.khui, hō͘ in ū chin chē chúi thang lim, chhin-chhiūⁿ tùi chhim-ian chhèng chhut-.lâi.
78:16 I hō͘ chúi tùi chio̍h-pôaⁿ chhèng chhut-.lâi, hō͘ chúi chhin-chhiūⁿ kang-hô lâu lo̍h-.lâi.
78:17 In iû-goân tiāⁿtiāⁿ tek-chōe I, tī ta-sò ê tē pōe-ge̍k Chì-koân-.ê.
78:18 In sim-lāi chhì-thàm Siōng-tè, chiàu in kakī só͘ ì-ài ê kiû chia̍h-mi̍h.
78:19 In lāmsám gī-lūn Siōng-tè, kóng, choân-lêng ê Chú tī khòng-iá kám ē pān toh?
78:20 I bat phah chio̍h-pôaⁿ hō͘ chúi chhèng chhut-.lâi, kang-hô móa chhut-.lâi; I kám ē siúⁿ-sù bí-niûⁿ? I kám ē kā I ê chú-bîn chún-pī bah?
78:21 Só͘-í, Siōng-tè thiaⁿ-.tio̍h chiū siū-khì, ēng iām-hóe sio Iâ-kop ê ke, tùi I-su-la-el cho̍k hoat siū-khì;
78:22 In-ūi in m̄ sìn-ho̍k Siōng-tè, m̄ óa-khò I ê kiù-un.
78:23 Chóng-.sī, I bēng-lēng tī téng-bīn ê kiong-chhong, koh khui thiⁿ ê mn̂g;
78:24 I chhin-chhiūⁿ lo̍h hō͘, kàng-lo̍h má-ná hō͘ in chia̍h, kā thiⁿ ê bí-niûⁿ siúⁿ-sù hō͘ in.
78:25 Lâng chia̍h tōa koân-lêng ê ê chia̍h-mi̍h; Siōng-tè siúⁿ-sù bí-niûⁿ hō͘ in pá-chiok.
78:26 I tùi thiⁿ khí tang-hong, ēng I ê koân-lêng chhōa lâm-hong lâi.
78:27 I kàng-lo̍h bah tī in tiong-kan, chē kah chhin-chhiūⁿ thô͘-soa hún, koh ū poe-chiáu chē kah chhin-chhiūⁿ hái soa,
78:28 lo̍h tī in ê iâⁿ tiong, tī in tòa ê pò͘-pêⁿ ê sì-kho͘-ûi.
78:29 In chiū chia̍h kàu pá-pá; I chiàu in só͘ ì-ài ê hō͘ in.
78:30 In ê só͘ ì-ài ê iáu-bōe pá-chiok, chia̍h-mi̍h iáu tī in ê chhùi lāi ê sî,
78:31 Siōng-tè chiū tùi in hoat siū-khì, kā in tiong-kan ióng-chòng ê lâng thâi-sí, phah-tó I-su-la-el ê siàu-liân lâng.
78:32 Sûi-jiân ánne, in iû-goân koh hoān chōe, bô in-ūi Siōng-tè kî-biāu ê chok-ûi lâi sìn I.
78:33 Só͘-í, I hō͘ in khang-khang kòe-ji̍t, hō͘ in nî-nî tī kiaⁿ-hiâⁿ tiong keng-kòe.
78:34 Siōng-tè thâi in ê sî, in chiah lâi kiû I; in oa̍t tò-tńg pek-chhiat kiû Siōng-tè.
78:35 In mā tui-liām Siōng-tè sī in ê chio̍h-pôaⁿ, chì-koân choân-lêng Siōng-tè sī in ê kiù-sio̍k Chú.
78:36 Chóng-.sī, in ēng chhùi kā I phô͘-tháⁿ, khiok ēng chi̍h tùi I kóng pe̍h-chha̍t.
78:37 In-ūi in tùi I bô tiong-si̍t, bô chīn-tiong siú I ê iok.
78:38 Chóng-.sī, I ū liân-bín; I sià-bián in ê chōe-kò, I bô kā in siau-bia̍t, koh tiāⁿtiāⁿ siau I ê siū-khì, bô choân-pō͘ hoat-chhut I ê siū-khì.
78:39 I tài-liām in chí-put-kò sī hia̍t-khì ê lâng, sī chhoe kòe-khì bô koh tò tńg-.lâi ê hong.
78:40 In tī khòng-iá pōe-ge̍k I, tī pha-hng ê só͘-chāi hō͘ I iu-būn, kàu hiah chē pái!
78:41 In chài-saⁿ chhì-thàm Siōng-tè, put-toān tú-tak I-su-la-el ê sèng ê.
78:42 In bē kì-tit I ê koân-lêng, mā bē kì-.tit kiù-sio̍k in thoat-lī tùi-te̍k ê ji̍t.
78:43 I tī Ai-gi̍p án-chóaⁿ hián-chhut I ê sîn-jiah; tī Chó-an chhân án-chóaⁿ hián-chhut kî-sū;
78:44 I kā in ê kang-hô piàn-chò hoeh, in ê káng mā sī ánne, tì-kàu lóng bē lim-.tit.
78:45 I hō͘ hô͘-sîn kui tīn kàu in tiong-kan lâi kā in cham, koh hō͘ chhân-kap-á lâi kā in sún-hāi.
78:46 I kā in ê lông-sán-bu̍t kau hō͘ thâng-thōa, kā in lô-khó͘ tit tio̍h ê mi̍h kau hō͘ chháu-meh.
78:47 I lo̍h pha̍uh lâi húi-hoāi in ê phû-tô chhiū, lo̍h-sng lâi húi-hoāi in ê sng-châi chhiū.
78:48 I koh kā in ê chengseⁿ kau hō͘ pha̍uh, kā in kui kûn ê chengseⁿ kau hō͘ sihnà.
78:49 I hoat-chhut tōa siū-khì, siū-khì, thòng-hūn kah khó͘-lān, kui tīn kàng chai-hō ê sù-chiá lóng lâi-kàu in tiong-kan.
78:50 I ūi tio̍h kakī ê siū-khì pho͘-pêⁿ I ê lō͘, hō͘ in ê sèⁿ-miā bē bián-tit sí, I kā in ê oa̍h-miā kau hō͘ un-e̍k.
78:51 Tī Ai-gi̍p phah-sí só͘-ū ê tōa-kiáⁿ, tī Hâm ê pò͘-pêⁿ lāi phah-sí in ê tōa-kiáⁿ.
78:52 Chóng-.sī, I chhin-chhiūⁿ teh chhōa iûⁿ kā kakī ê chú-bîn chhōa chhut-.lâi, tī khòng-iá chhōa in chhin-chhiūⁿ teh chhōa iûⁿ-kûn.
78:53 I chhōa in, hō͘ in an-ún, hō͘ in bô kiaⁿ-hiâⁿ, hō͘ hái im-sí in ê tùi-te̍k.
78:54 I koh chhōa in lâi-kàu sèng-tē ê kau-kài, lâi-kàu I ēng chiàⁿ chhiú só͘ tit tio̍h ê soaⁿ.
78:55 I tī in ê bīn-chêng kā lia̍t pang ê lâng kóaⁿ chhut-.khì; ēng soh-á kā gōa-pang lâng ê tē niû hō͘ in chò sán-gia̍p; hō͘ I-su-la-el ê chi-cho̍k tòa gōa-pang lâng ê pò͘-pêⁿ.
78:56 In iû-goân koh teh chhì-thàm chì-koân Siōng-tè, koh teh pōe-ge̍k I, bô siú I kiàn-chèng ê ōe.
78:57 In kah in ê chó͘-sian kāng-khoán sit sìn pōe-ge̍k, chhin-chhiūⁿ kiong péng liàn-tńg ánne piàn-khoán.
78:58 In ēng soaⁿ-thâu ê chè-tôaⁿ jiá-khí I ê siū-khì; pài in tiau-khek ê ngó͘-siōng lâi hō͘ I thòng-hūn.
78:59 Siōng-tè thiaⁿ-.tio̍h chiū siū-khì, tōa-tōa thó-ià I-su-la-el.
78:60 I sīm-chì khì-sak Sī-lô ê hōe-bō͘, to̍h-sī I tī lâng ê tiong-kan só͘ tah ê pò͘-pêⁿ.
78:61 I koh kā I ê iok-kūi （ Chù, goân e̍k-pún sī khùi-la̍t ）kau hō͘ lâng chhiúⁿ-.khì, kā I ê êng-kng kau tī tùi-te̍k ê chhiú.
78:62 I mā kā I ê chú-bîn kau hō͘ to-kiàm, tùi I ê ka-gia̍p hoat siū-khì.
78:63 In ê siàu-liân lâng hō͘ hóe sio bia̍t; in ê chāi-sek-lí bô tit tio̍h lâng ê hō-hí.
78:64 Chè-si tó tī to hā, chiú-kóaⁿ ê lâng mā bô thî-khàu.
78:65 Hit sî, Chú chhin-chhiūⁿ lâng khùn cheng-sîn, chhin-chhiūⁿ ióng-béng ê lâng lim chiú liáu-āu teh hoah.
78:66 I phah-thè I ê tùi-te̍k, hō͘ in éng-oán siū lêng-jio̍k;
78:67 Jî-chhiáⁿ I khì-sak Iô-sé-huh ê pò͘-pêⁿ, bô kéng-soán E-hu-laim ê chi-cho̍k,
78:68 Chóng-.sī, I kéng-soán Iô-tah ê chi-cho̍k, I só͘ ì-ài ê Si-óng soaⁿ;
78:69 Koh khí-chō I ê sèng-só͘, koân kah chhin-chhiūⁿ thiⁿ, koh chhin-chhiūⁿ I kiàn-li̍p éng-oán chûn-chāi ê tē;
78:70 I koh kéng-soán I ê lô͘-po̍k — Ta-bi̍t, chhōa i tùi iûⁿ-tiâu chhut-.lâi.
78:71 I hō͘ Ta-bi̍t bô koh tòe hiahê iûⁿ-bó, beh hō͘ i iúⁿ-chhī Siōng-tè ê chú-bîn — Iâ-kop kah I ê ka-gia̍p I-su-la-el.
78:72 Ta-bi̍t chiū chiàu i sim-lāi ê chèng-ti̍t kā in iúⁿ-chhī, koh ēng i láu-liān ê chhiú ín-chhōa in.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。