詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
71:1 Lāu lâng ê Kî-tó
Siōng-chú ah, góa óa-khò Lí; kiû Lí hō͘ góa éng-oán bē tú tio̍h kiàn-siàu.
71:2 Kiû Lí chiàu Lí ê kong-gī chín-kiù góa, tháu-pàng góa; kiû Lí àⁿ hīⁿ-khang thiaⁿ góa, lâi kiù góa.
71:3 Kiû Lí chò góa thang khiā-khí ê chio̍h-pôaⁿ, hō͘ góa tiāⁿtiāⁿ khì tiàm hia; Lí í-keng koat-tēng beh kiù góa. In-ūi Lí sī góa ê soaⁿ-giâm, góa ê soaⁿ-chē.
71:4 Góa ê Siōng-tè ah, kiû Lí kiù góa thoat-lī pháiⁿ lâng ê chhiú, thoat-lī put-gī kah chân-jím ê lâng ê chhiú-thâu.
71:5 In-ūi chì-koân Siōng-chú, Lí sī góa só͘ gióng-bōng ê; tùi góa siàu-liân ê sî, Lí it-ti̍t sī góa ê óa-khò.
71:6 Góa tùi thai-.ni̍h to̍h hō͘ Lí hû-chhî; sī Lí hō͘ góa chhut lāu-bú ê pak-tó͘. Góa beh tiāⁿtiāⁿ oló Lí!
71:7 Chin chē lâng khòaⁿ góa chò kî-koài, chóng-.sī, Lí sī góa kian-kò͘ tô-siám ê só͘-chāi.
71:8 Góa móa chhùi beh oló Lí, Kui ji̍t beh êng-kng Lí.
71:9 Góa nî lāu ê sî, kiû Lí m̄ thang pàng-sak góa; góa khùi-la̍t soe-lám ê sî, kiû Lí m̄ thang lī-khui góa.
71:10 In-ūi góa ê tùi-te̍k gī-lūn góa; tng-tán beh hāi góa ê sèⁿ-miā ê lâng chò-hóe chham-siông,
71:11 kóng, Siōng-tè í-keng pàng-sak i; taⁿ tio̍h lâi jiok i, lâi lia̍h i! In-ūi bô lâng ē lâi kiù i.
71:12 Siōng-tè ah, kiû Lí m̄ thang lī-khui góa hn̄g-hn̄g! Góa ê Siōng-tè ah, kiû Lí kóaⁿ-kín lâi pang-chān góa!
71:13 Goān hiahê chò góa sèⁿ-miā tùi-te̍k ê lâng tú tio̍h kiàn-siàu lâi bia̍t-bông; goān hiahê kè-bô͘ beh hāi góa ê lâng siū lêng-jio̍k làu-khùi.
71:14 Chóng-.sī, góa beh tiāⁿtiāⁿ gióng-bōng Lí, góa beh ná kú ná oló Lí.
71:15 Lí ê kong-gī kah Lí ê chín-kiù sǹg bē liáu, góa ê chhùi kui ji̍t beh kóng-khí.
71:16 Góa beh lâi kóng-khí chì-koân Siōng-chú tōa koân-lêng ê tāichì; góa kantaⁿ beh soan-iông Lí ê gī.
71:17 Siōng-tè ah, tùi góa siàu-liân ê sî Lí to̍h kà-sī góa; chitmá góa iáu teh soan-iông Lí kî-biāu ê chok-ûi.
71:18 Siōng-tè ah, kàu góa nî lāu thâu-mn̂g pe̍h ê sî, kiû Lí m̄ thang pàng-sak góa! Hō͘ góa thang kā Lí ê khùi-la̍t chí-sī ē-tāi, kā Lí ê tōa koân-lêng chí-sī só͘-ū bī-lâi ê lâng.
71:19 Siōng-tè ah, Lí ê kong-gī chin koân; Siōng-tè ah, Lí bat kiâⁿ úi-tāi ê tāichì; siáⁿ lâng ē-tàng kah Lí pí?
71:20 Lí hō͘ goán keng-kòe chin chē tōa chai-lān, Lí iáu koh hō͘ goán oa̍h lo̍h-.khì, mā beh kā goán tùi tē ê chhim-ian kiù khí-.lâi.
71:21 Kiû Lí hō͘ góa ná lâi ná koân-tōa, kiû Lí koh tò tńg-lâi an-ùi góa.
71:22 Góa ê Siōng-tè ah, góa beh tôaⁿ sek oló Lí, oló Lí ê sìn-si̍t! I-su-la-el ê sèng ê ah, góa beh tôaⁿ khîm oló Lí!
71:23 Góa chhiùⁿ koa oló Lí ê sî, góa ê chhùi-tûn kah Lí só͘ kiù-sio̍k ê góa ê lêng-hûn beh hoaⁿ-hí chhut siaⁿ;
71:24 Góa ê chi̍h beh kui ji̍t káng-lūn Lí ê gī, in-ūi hiahê kè-bô͘ beh hāi góa ê lâng í-keng kiàn-siàu siū lêng-jio̍k.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。