詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
57:1 Kiû Chō͘ ê Kî-tó
( Ta-bi̍t siám-phiah Sàu-lô, bih tī tōng lāi; hit sî i chò chit-siú kim ê si, kau hō͘ ga̍k-koaⁿ; tiāu sī ēng " M̄-thang húi-hoāi ". ) Siōng-tè ah, kiû Lí khó-liân góa, khó-liân góa! Góa ê sim beh tâu-hioh tī Lí hia. Góa beh tâu-hioh tī Lí si̍t-kó͘ ê tì-ìm ē, thèng-hāu chai-hō lóng kòe-.khì.
57:2 Góa beh kiû-kiò chì-koân Siōng-tè, to̍h-sī kā góa sêng-choân ta̍k hāng tāichì ê Siōng-tè.
57:3 Tng hit-ê beh thun-chia̍h góa ê lâng húi-pòng góa ê sî, Siōng-tè ē tùi thiⁿ si un lâi kiù góa, I mā ē hoat-chhut I ê chû-ài kah I ê sìn-si̍t.
57:4 Góa ê sèⁿ-miā tī sai ê tiong-kan, góa tó tī chhin-chhiūⁿ hóe teh to̍h ê sè-kan lâng tiong-kan. In ê chhùi-khí kahná chhiuⁿ kah chìⁿ, in ê chi̍h chhin-chhiūⁿ lāi to.
57:5 Siōng-tè ah, goān Lí ê koân-tōa pôaⁿ-kòe chiahê thiⁿ! Goān Lí ê êng-kng pôaⁿ-kòe choân tē!
57:6 In tī góa ê kha-pō͘ siat lô-bāng, ap-chè góa ê sim-sîn; in tī góa ê bīn-chêng khui hām-kheⁿ, kakī tian-tò poa̍h lo̍h-khì hit lāi-bīn. [Sè-la̍h]
57:7 Siōng-tè ah, góa ê sim chū-chāi, góa ê sim kian-tēng; góa beh gîm-si, góa beh chhiùⁿ koa lâi oló.
57:8 Góa ê sim-sîn, lí tio̍h cheng-sîn khí-.lâi! Khîm, sek, lín tio̍h cheng-sîn khí-.lâi! Góa pún-sin beh chin chá to̍h cheng-sîn khí-.lâi.
57:9 Chú ah, góa beh tī bān-bîn tiong-kan kám-siā Lí; tī lia̍t pang tiong-kan chhiùⁿ koa oló Lí.
57:10 In-ūi Lí ê chû-ài tōa kàu tú thiⁿ; Lí ê sìn-si̍t thàu kàu kiong-chhong.
57:11 Siōng-tè ah, goān Lí ê koân-tōa pôaⁿ-kòe chiahê thiⁿ! Goān Lí ê êng-kng pôaⁿ-kòe choân tē!
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。