創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
49:1 Iâ-kop ê Ûi-giân
Iâ-kop kiò i hiahê kiáⁿ lâi, kóng, " Lín lóng chū-chi̍p óa-.lâi, góa beh kā lín ji̍t-āu só͘ ē tú-.tio̍h ê tāichì kā lín kóng.
49:2 Iâ-kop chiahê kiáⁿ, lín tio̍h chū-chi̍p lâi thiaⁿ, tio̍h thiaⁿ lín lāu-pē ê ōe.
49:3 Lū-biān, lí sī góa ê tōa-kiáⁿ, góa ê koân-sè, góa ê khùi-la̍t ê khí-thâu, ū ui-giâm ê te̍k-sek, ū koân-lêng ê te̍k-sek.
49:4 Chóng-.sī, lí chhin-chhiūⁿ chúi teh kún, it-tēng bē tàng khiā thâu ūi; in-ūi lí peh-chiūⁿ lín lāu-pē ê bîn-chhn̂g, lí peh-chiūⁿ góa ê chhn̂g-pho͘, lí kā i òe lahsap,
49:5 Si-miān kah Lē-bī sī hiaⁿ-tī; in ê to-kiàm sī hiong-ok ê khì-kū.
49:6 Góa ê sim-sîn, lí m̄ thang kah in tâng kè-bô͘; góa ê sîn-hûn, lí m̄ thang kah in ê hōe-chiòng liân-lo̍k. In-ūi in khí siū-khì, thâi-sí-lâng, in lāmsám koah-tn̄g gû thúi ê tōa kin.
49:7 In ê siū-khì hoâiⁿ-pà, thang chiù-chó͘; in ê oàn-hūn chân-jím, mā sī thang chiù-chó͘; góa beh hun-khui in tī Iâ-kop ke, kā in sì-sòaⁿ khì tī I-su-la-el cho̍k.
49:8 Iô-tah, lí ê hiaⁿ-tī beh oló lí; lí ê chhiú beh chhi̍h tùi-te̍k ê ām-kún; lí ê lāu-pē ê kiáⁿ beh phak-pài tī lí ê bīn-chêng.
49:9 Iô-tah sī sè-chiah sai; góa ê kiáⁿ, lí lia̍h tio̍h la̍h-bu̍t chiū tńg-.khì; i khut-lo̍h, i thèⁿ-kha, chhin-chhiūⁿ sai, chhin-chhiūⁿ bó ê sai, siáⁿ lâng káⁿ jiá i?
49:10 Koân-pèng bô lī-khui Iô-tah, tī-lí chiá bô lī-khui i nn̄g ki kha ê tiong-kan, ti̍t-kàu Si-lô（ Chù,"Si-lô"mā thang e̍k-chò " I ê thóng-tī-chiá " Á-sī " Chìn-kòng ê mi̍h " ） lâi-lîm; lia̍t pang lóng ē kui i.
49:11 Pa̍k i ê lî-á tī phû-tô chhiū, pa̍k i ê lî-á-kiáⁿ tī hó ê phû-tô chhiū; ēng phû-tô chiú sé i ê saⁿ-khò͘, ēng phû-tô-chiap sé i ê saⁿ-khò͘.
49:12 I ê ba̍k-chiu in-ūi chiú lâi âng, i ê chhùi-khí in-ūi leng lâi pe̍h.
49:13 Che-bú-lông ē tòa hái-kháu, ē chò pha-chûn ê káng-kháu; i ê tē-kài ē kàu Si-tòng.
49:14 It-sa-kal sī ióng ê lî-á, tó tī iûⁿ-tiâu ê tiong-kan;
49:15 I khòaⁿ an-chēng chò hó, khòaⁿ thó͘-tē chò súi; tàⁿ ēng keng-kah-thâu taⁿ-teh, chiâⁿ-chò lô-khó͘ ê lô͘-po̍k.
49:16 Tàn ē phòaⁿ-toàn i ê jîn-bîn, chhin-chhiūⁿ I-su-la-el chi-cho̍k ê chi̍t-ê.
49:17 Tàn ē chò lō͘-.ni̍h ê chôa, lō͘ tiong ê to̍k-chôa; kā siong bé-tê, khiâ ê lâng hiàⁿ tùi āu-bīn lo̍h-.khì.
49:18 Siōng-chú ah, góa ū teh thèng-hāu Lí ê chín-kiù.
49:19 Ga̍t ē hō͘ kun-tūi tui-pek; chóng-.sī, i beh tui-pek in ê kha-āu-teⁿ.
49:20 A-sel ē chhut hó ê bí-niûⁿ, koh chhut ông só͘ chia̍h ê hó mi̍h.
49:21 Ná-hu-tha-lím sī tháu-pàng ê lo̍k-bú, chhut hó thiaⁿ ê ōe.
49:22 Iô-sé-huh sī gâu kiat kóe-chí ê chhiū-ki, i ê chhiū-ki chhun-chhut chhiûⁿ gōa.
49:23 Siā chìⁿ ê lâng kā i tōa siong-hāi, ēng chìⁿ kā i siā, kā i pek-hāi.
49:24 Chóng-.sī, i ê kiong iû-goân ân, i ê chhiú mā tit tio̍h khùi-la̍t; che sī in-ūi Iâ-kop ê Choân-lêng-.ê ê chhiú, ( Chiū-sī I-su-la-el ê bo̍k-chiá, I-su-la-el ê chio̍h-pôaⁿ ),
49:25 Mā in-ūi lí ê pē ê Siōng-tè, I ē pang-chān lí; koh in-ūi hit-ê Choân-lêng-.ê, I ē kā lí sù-hok; I ē kā thiⁿ-téng kàng-lo̍h ê hok-khì, chhim-ian só͘ khǹg ê hok-khì, í-ki̍p chia̍h leng seng-sán ê hok-khì, lóng hō͘ lí.
49:26 Lí ê lāu-pē só͘ chiok ê hok-khì, iâⁿ-kòe góa ê lāu-pē kah a-kong só͘ chiok ê hok-khì, ti̍t-kàu éng sè-tāi ê soaⁿ-niá ke̍k-thâu ê pian-kài. Chiahê hok-khì ē kàng-lo̍h tī Iô-sé-huh ê thâu-khak, lîm-kàu hiaⁿ-tī tiong siōng te̍k-pia̍t ê thâu-khak téng.
49:27 Biān-iá-mín sī hiong-béng ê chhâi-lông; chá-khí sî, chia̍h i só͘ lia̍h tio̍h-.ê, ê-hng sî, pun i só͘ chhiúⁿ tio̍h-.ê.
49:28 Che it-chhè sī I-su-la-el ê cha̍p-jī chi-cho̍k, che mā sī in ê lāu-pē tùi in só͘ kóng ê ōe; kā in só͘ chiok-hok ê, lóng sī chiàu ta̍k lâng ê hok-hūn kā in chiok-hok.
49:29 Iâ-kop ê Sí-bông kah Bâi-chòng
Iâ-kop koh kā in hoan-hù kóng, " Góa beh tńg-khì góa ê chó͘-sian hia, lín tio̍h kā góa bâi-chòng tī Hiat lâng E-hu-lóng chhân-.ni̍h ê hia̍t, kah góa ê lāu-pē kah a-kong siâng só͘-chāi,
49:30 Chiū-sī tī Ka-nân tē Mam-lē ê thâu-chêng, Mak-pe-la̍h chhân-.ni̍h ê hia̍t, hit-ê hia̍t kah chhân sī A-bu-la-hàm tùi Hiat lâng E-hu-lóng bé lâi chò sán-gia̍p kah chò bōng-tē ê.
49:31 In tī hia bâi-chòng A-bu-la-hàm kah i ê bó͘ Sa-la̍h, koh tī hia bâi-chòng Í-sak kah i ê bó͘ Li-bé-kah, góa mā tī hia bâi-chòng Le-ah.
49:32 Hit khu chhân kah hit lāi-bīn ê hia̍t, sī tùi Hiat lâng bé-.lâi ê. "
49:33 Iâ-kop hoan-hù i hiahê kiáⁿ liáu-āu, kha kiu-khì bîn-chhn̂g téng, chiū tn̄g-khùi, tńg-khì i ê chó͘-sian hia.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。