詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
55:1 Kiû Chō͘ ê Kî-tó
( Ta-bi̍t kà-sī ê si; kau hō͘ ga̍k-koaⁿ; ēng si-hiân ê ga̍k-khì. )Siōng-tè ah, kiû Lí àⁿ hīⁿ-khang thiaⁿ góa ê kî-tó, m̄ thang bih khí-lâi m̄-thiaⁿ góa ê khún-kiû.
55:2 Kiû Lí àⁿ-lo̍h hīⁿ-khang thiaⁿ góa, ìn góa. Góa pi-siong bô pêng-an, thò͘ tōa khùi,
55:3 Lóng sī in-ūi tùi-te̍k ê hoah siaⁿ, pháiⁿ lâng ê chè-ap; in-ūi in kā chōe-kò piàⁿ hō͘ góa, ēng siū-khì lâi pek góa.
55:4 Góa ê sim-lāi chin thòng-khó͘; sí-bông ê kiaⁿ-hiâⁿ lîm-kàu góa.
55:5 Kiaⁿ-hiâⁿ phi̍h-phi̍h chhoah kā góa pau-ûi, khióng-pò͘ kā góa im-ba̍t.
55:6 Góa kóng: Goān góa chhin-chhiūⁿ hún-chiáu tit tio̍h si̍t, góa chiū poe khì, chhōe tio̍h an-hioh ê só͘-chāi.
55:7 Góa beh poe khì hn̄g-hn̄g, hioh tī khòng-iá. [Sè-la̍h]
55:8 Góa beh kóaⁿ-kín chàu khì siám-phiah ê só͘-chāi, thang thoat-lī kông hong po̍k-hō͘.
55:9 Chú ah, kiû Lí kā in thun-bia̍t, phah-loān in ê giân-gí! In-ūi góa tī siâⁿ lāi bat khòaⁿ tio̍h kiông-pō kah hun-cheng ê tāichì.
55:10 In mê-ji̍t tī siâⁿ chhiûⁿ téng kiâⁿ lâi kiâⁿ khì; siâⁿ lāi chhiong-móa hi-ké kah ok-to̍k.
55:11 Siâ-ok tī hit lāi-bīn; ke-lō͘ sì-kè lóng sī ap-chè kah kan-chà.
55:12 In-ūi húi-pòng góa ê m̄-sī tùi-te̍k, siat-sú sī, chiū iáu ē-tàng jím-tit; chū-ko kong-kek góa ê m̄-sī oàn-hūn góa ê lâng, siat-sú sī, chiū ē-tàng siám-phiah.
55:13 Bô phah-sǹg sī lí kah góa pêng-pòe ê lâng, góa ê tâng-phōaⁿ, góa ti-kí ê pêng-iú.
55:14 Lán pêng-sî chò-hóe tâm-lūn, chin chhin-bi̍t, lán kah kûn-chiòng tī Siōng-tè ê tiān chò-hóe kèng-pài.
55:15 Goān sí-bông hut-jiân lîm-kàu góa ê tùi-te̍k, hō͘ in oa̍h-oa̍h lo̍h im-hú! In-ūi tī in tòa ê só͘-chāi chhiong-móa siâ-ok.
55:16 Nā-sī góa, góa beh kiû-kiò Siōng-tè; Siōng-chú ē chín-kiù góa.
55:17 Ê-hng, chá-khí, tiong-tàu, góa beh ai-siong thó͘-khùi; I mā ē thiaⁿ góa ê siaⁿ.
55:18 I ē kiù-sio̍k góa ê sèⁿ-miā thoat-lī kong-kek góa ê lâng, hō͘ góa tit tio̍h pêng-an; sûi-jiân hoán tùi góa ê lâng chin chē.
55:19 Tùi kó͘-chá to̍h tiāⁿtiāⁿ kah goán tông-chāi ê Siōng-tè, ē thiaⁿ-.tio̍h, mā ē kā in pò-èng, to̍h-sī hiahê bô kái-piàn, bô kèng-ùi Siōng-tè ê lô͘-po̍k.
55:20 I chhun chhiú kong-kek kakī ê tâng-phōaⁿ, ûi-pōe kah i só͘ li̍p ê iok.
55:21 I ê chhùi chhin-chhiūⁿ leng-iû ku̍t liu-liu; i ê sim chûn oàn-hūn beh kau-chiàn; i ê ōe pí ko-iû khah jiû-nńg, kî-si̍t sī chhut-siù ê to.
55:22 Tio̍h kā lí ê ka-taⁿ sià hō͘ Siōng-chú, I ē hû-chhî lí; I éng-oán bē hō͘ gī lâng iô-tāng.
55:23 Siōng-tè ah, Lí ē hō͘ in hām-lo̍h tī bia̍t-bông ê chhim kheⁿ; thâi-sí-lâng kah kan-chà ê lâng bē oa̍h kàu tiong-liân. Nā-sī góa, góa beh óa-khò Lí.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。