創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
47:1 Iô-sé-huh ji̍p-khì kā Hôa-láu kóng, " Góa ê lāu-pē kah góa ê hiaⁿ-tī tòa in ê iûⁿ-kûn, gû-kûn kah it-chhè só͘-ū ê, tùi Ka-nân tē lâi, taⁿ tī Go-sián ê tē khiā-khí. "
47:2 Iô-sé-huh tùi i ê hiaⁿ-tī ê tiong-kan kéng gō͘ lâng, chhōa in khì kìⁿ Hôa-láu.
47:3 Hôa-láu mn̄g Iô-sé-huh ê hiaⁿ-tī kóng, " Lín chò siáⁿ-mi̍h thâu-lō͘? " In kā Hôa-láu kóng, " Lí ê lô͘-po̍k pún-sin kah goán ê chó͘-sian, lóng sī kò͘ iûⁿ ê lâng. "
47:4 In koh kā Hôa-láu kóng, " Ka-nân tē ki-hng chin siong-tiōng, lô͘-po̍k ê iûⁿ-kûn bô chháu thang chia̍h, só͘-í, goán lâi sī beh kià-kha tī chia, taⁿ kiû lí iông-ín lí ê lô͘-po̍k tòa tī Go-sián tē. "
47:5 Hôa-láu kā Iô-sé-huh kóng, " Lí ê lāu-pē kah lí ê hiaⁿ-tī lâi-kàu lí chia,
47:6 Ai-gi̍p tē lóng tī lí ê bīn-chêng; hō͘ lí ê lāu-pē kah lí ê hiaⁿ-tī tòa tī kok lāi siōng hó ê só͘-chāi. In thang tòa tī Go-sián ê tē. Lí nā chai in tiong-kan khah ū pún-sū ê lâng, chiū phài in koán-kò͘ góa ê chengseⁿ. "
47:7 Iô-sé-huh chhōa i ê lāu-pē Iâ-kop ji̍p-khì khiā tī Hôa-láu ê bīn-chêng, Iâ-kop chiū kā Hôa-láu chiok-hok.
47:8 Hôa-láu mn̄g Iâ-kop kóng, " Lí it-seng ê nî-ji̍t sī gōa chē? "
47:9 Iâ-kop kā Hôa-láu kóng, " Góa kià-kha tī sè-kan ê nî-ji̍t sī chi̍t-pah saⁿ-cha̍p hòe. Góa it-seng ê nî-ji̍t koh chió, koh kan-khó͘, put-jû góa ê chó͘-sian kià-kha tī sè-kan ê nî-ji̍t. "
47:10 Iâ-kop koh kā Hôa-láu chiok-hok, chiū tùi Hôa-láu ê bīn-chêng chhut-.khì.
47:11 Iô-sé-huh chiàu Hôa-láu ê bēng-lēng, kā Ai-gi̍p kok siōng hó ê tē, to̍h-sī Lâm-sek ê tē, hō͘ i ê lāu-pē kah i ê hiaⁿ-tī tòa, chò in ê sán-gia̍p.
47:12 Iô-sé-huh ēng bí-niûⁿ hōng-ióng i ê lāu-pē kah i ê hiaⁿ-tī, í-ki̍p i ê lāu-pē choân ke, lóng chiàu in ê lâng-gia̍h lâi kā in kiong-kip.
47:13 Tōa Ki-hng
Ki-hng chin siong-tiōng, choân tē lóng bô bí-niûⁿ, sīm-chì Ai-gi̍p tē kah Ka-nân tē ê lâng, in in-ūi ki-hng ê iân-kò͘, gō kàu hūn-.khì.
47:14 Iô-sé-huh chū-chi̍p Ai-gi̍p tē kah Ka-nân tē só͘-ū ê gîn, to̍h-sī in lâi tia̍h bí-niûⁿ ê gîn, kā hiahê gîn tòa kàu Hôa-láu ê kiong lāi.
47:15 Ai-gi̍p tē kah Ka-nân tē ê gîn lóng ēng liáu, Ai-gi̍p kûn-chiòng lóng lâi kìⁿ Iô-sé-huh kóng, " Goán ê gîn lóng ēng liáu à, kiû lí hō͘ goán bí-niûⁿ, goán án-chóaⁿ tio̍h sí tī lí ê bīn-chêng? "
47:16 Iô-sé-huh kóng, " Nā-sī gîn ēng liáu, lín thang khan lín ê chengseⁿ lâi, góa ūi tio̍h lín ê chengseⁿ beh hō͘ lín bí-niûⁿ. "
47:17 In chiū kā chengseⁿ kóaⁿ kàu Iô-sé-huh hia, Iô-sé-huh chiū ēng bí-niûⁿ ōaⁿ in ê bé, iûⁿ-kûn, gû-kûn kah lî. Hit nî, ūi tio̍h beh ōaⁿ in it-chhè ê chengseⁿ, chiū ēng bí-niûⁿ iúⁿ-chhī in.
47:18 Hit nî í-keng kòe-.khì, tē-jī nî, in koh lâi kìⁿ Iô-sé-huh, kā i kóng, " Goán bē môa-tit góa ê chú, goán ê gîn lóng ēng liáu, chengseⁿ mā lóng kui tī góa ê chú, goán tī góa ê chú ê bīn-chêng, tû goán ê seng-khu kah goán ê chhân-tē í-gōa, bô chhun kah pòaⁿ-hāng.
47:19 Goán án-chóaⁿ tio̍h tī lí ê ba̍k-chiu chêng, lâng sí, tē pha-hng? Kiû lí ēng bí-niûⁿ bé goán kah goán ê tē, goán kah goán ê tē thang chò Hôa-láu ê lō͘-ēng. Koh chhiáⁿ kā chéng-chí hō͘ goán, hō͘ goán tit tio̍h oa̍h, bián sí, thó͘-tē mā bián pha-hng. "
47:20 Chiū ánne, Iô-sé-huh ūi Hôa-láu bé Ai-gi̍p só͘-ū ê tē, Ai-gi̍p lâng in-ūi hō͘ ki-hng só͘ pek, ta̍k lâng lóng bē i ê chhân-tē, hiahê tē chiū lóng kui tī Hôa-láu.
47:21 Iô-sé-huh chiàu chiahê siâⁿ-ip chhian-sóa Ai-gi̍p ê jîn-bîn, tùi Ai-gi̍p chit pêng kàu tī hit pêng.
47:22 To̍k-to̍k chè-si ê tē, Hôa-láu bô kā i bé, in-ūi chè-si ū tùi Hôa-láu tit tio̍h tiāⁿ tio̍h ê liōng, in chia̍h Hôa-láu só͘ hō͘ in ê liōng, só͘-í, in bô bē in ê tē.
47:23 Iô-sé-huh kā jîn-bîn kóng, " Góa kin-á-ji̍t ūi Hôa-láu bé lín kah lín ê tē. Lí khòaⁿ, tī chia ū chéng-chí hō͘ lín, lín thang the̍h-khì chèng-choh.
47:24 Kàu siu-sêng ê sî, lín tio̍h kā gō͘-hūn chi-it la̍p hō͘ Hôa-láu, sì-hūn kui lín, chò chhân-.ni̍h ê chéng-chí, mā chò lín kah lín chhù lāi ê lâng, í-ki̍p lín ê gín'á ê chia̍h-mi̍h.
47:25 In kóng, " Lí ū kiù goán ê sèⁿ-miā, goān goán tī góa ê chú ê bīn-chêng tit tio̍h un-tián, goán beh chò Hôa-láu ê lô͘-po̍k. "
47:26 Án-ne, Iô-sé-huh ūi Ai-gi̍p ê tē siat-li̍p tiāⁿ tio̍h ê lē, kàu tī kin-á-ji̍t; Hôa-láu tit tio̍h gō͘-hūn chi-it, to̍k-to̍k chè-si ê tē bô kui Hôa-láu.
47:27 Iâ-kop Chòe-āu ê Iau-kiû
I-su-la-el lâng tòa tī Ai-gi̍p kok Go-sián ê tē, in tī hia kiàn-tì sán-gia̍p, koh seⁿ-thòaⁿ ke̍k chē.
47:28 Iâ-kop tòa tī Ai-gi̍p tē-cha̍p-chhit nî, Iâ-kop it-seng ê nî-ji̍t sī chi̍t-pah sì-cha̍p-chhit hòe.
47:29 I-su-la-el sí ê ji̍t teh beh kàu, i chiū kiò i ê kiáⁿ Iô-sé-huh lâi, kā i kóng, " Góa nā tī lí ê bīn-chêng tit tio̍h un-tián, chhiáⁿ lí hē chhiú tī góa ê tōa-thúi hā tùi góa chiùchōa, ēng chû-ài kah sêng-si̍t khoán-thāi góa, m̄ thang kā góa bâi-chòng tī Ai-gi̍p.
47:30 Góa sí ê sî, lí tio̍h kā góa tòa-chhut Ai-gi̍p, bâi-chòng tī góa ê lāu-pē kah a-kong bâi-chòng ê só͘-chāi. " Iô-sé-huh kóng, " Góa ē chiàu lí ê ōe khì chò. "
47:31 Iâ-kop kóng, " Lí tio̍h tùi góa chiùchōa. " Iô-sé-huh chiū tùi i chiùchōa. Chiū ánne, I-su-la-el tī chhn̂g thâu kèng-pài Siōng-tè.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。