詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
25:1 Kî-kiû Tài-niá Pó-hō͘
( Ta-bi̍t ê si. )Siōng-chú ah, góa ê sim-sîn gióng-bōng Lí!
25:2 Góa ê Siōng-tè ah, góa pêng-sî óa-khò Lí; kiû Lí m̄ thang hō͘ góa kiàn-siàu, m̄ thang hō͘ góa ê tùi-te̍k in-ūi iâⁿ-kòe góa lâi khoa-kháu.
25:3 Kiàn-nā thèng-hāu Lí ê, it-tēng bē tì-kàu kiàn-siàu; hiahê bô-iân bô-kò͘ kiâⁿ kan-chà ê lâng ē tú tio̍h kiàn-siàu.
25:4 Siōng-chú ah, kiû Lí kā Lí ê tō-lō͘ chí-sī góa, kā Lí ê lō͘-tô͘ kà-sī góa.
25:5 Kiû Lí chhōa góa kiâⁿ Lí ê chin-lí, koh kà-sī góa, in-ūi Lí sī kiù góa ê Siōng-tè. Góa kui ji̍t teh thèng-hāu Lí.
25:6 Siōng-chú ah, kiû Lí ē kì-tit Lí ê liân-bín kah Lí ê chû-ài, in-ūi che sī chū kó͘ í-lâi to̍h tiāⁿtiāⁿ ū ê.
25:7 Kiû Lí m̄ thang kì-tit góa siàu-liân sî ê chōe-kò kah góa ê kòe-sit; Siōng-chú ah, kiû Lí chiàu Lí ê chû-ài, chiàu Lí ê un-hūi lâi ē kì-tit góa.
25:8 Siōng-chú sī liông-siān koh chèng-ti̍t, I ē chí-sī chōe-jîn kiâⁿ chiàⁿ lō͘.
25:9 I ē ēng kong-pêⁿ ín-chhōa khiam-sùn ê lâng, I ē ēng I ê tō-lō͘ kā in kà-sī.
25:10 Kiàn-nā siú I ê iok kah I ê kiàn-chèng ê lâng, Siōng-chú lóng sī ēng chû-ài kah sêng-si̍t khoán-thāi in.
25:11 Siōng-chú ah, góa ê chōe chin tāng, kiû Lí in-ūi Lí ê miâ lâi sià-bián góa.
25:12 Siáⁿ lâng kèng-ùi Siōng-chú? Siōng-chú ē chí-sī i só͘ tio̍h kéng ê lō͘.
25:13 I ê sim-sîn ē tit tio̍h an-hioh; i ê kiáⁿ-sun ē sêng-chiap thó͘-tē.
25:14 Siōng-chú kah kèng-ùi I ê lâng chhin-bi̍t, koh beh kā I ê iok chí-sī in.
25:15 Góa ê ba̍k-chiu tiāⁿtiāⁿ gióng-bōng Siōng-chú, in-ūi I beh hō͘ góa ê kha thoat-lī lô-bāng.
25:16 Kiû Lí oa̍t kòe-lâi khòaⁿ góa, khó-liân góa, in-ūi góa ko͘-toaⁿ koh khùn-khó͘.
25:17 Góa sim-lāi ê iu-khó͘ chin chē, kiû Lí kiù góa thoat-lī só͘-ū ê hoān-lān.
25:18 Kiû Lí koan-sim góa ê kan-lân kah lô-khó͘, sià-bián góa it-chhè ê chōe.
25:19 Kiû Lí khòaⁿ góa ê tùi-te̍k, in-ūi in chin chē; in chin ok-to̍k teh oàn-hūn góa.
25:20 Kiû Lí pó-hō͘ góa ê sèⁿ-miā, chín-kiù góa; hō͘ góa bô tú tio̍h kiàn-siàu, in-ūi góa óa-khò Lí.
25:21 Goān sûn-choân kah chèng-ti̍t pó-hō͘ góa, in-ūi góa thèng-hāu Lí.
25:22 Siōng-tè ah, kiû Lí kiù-sio̍k I-su-la-el, hō͘ i thoat-lī it-chhè ê kan-khó͘.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。