創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
46:1 Iâ-kop Chhōa ka-koàn Kàu Ai-gi̍p
I-su-la-el tòa it-chhè só͘-ū ê, chhut-hoat lâi-kàu Bel-sí-bah, chiū hiàn chè hō͘ i ê lāu-pē Í-sak ê Siōng-tè.
46:2 Àm-sî, Siōng-tè tī ī-siōng ê tiong-kan kā I-su-la-el kóng, " Iâ-kop, Iâ-kop! " I kóng, " Góa tī chia. "
46:3 Siōng-tè kóng, " Góa sī Siōng-tè, to̍h-sī lí ê lāu-pē ê Siōng-tè; lí lo̍h-khì Ai-gi̍p m̄-bián kiaⁿ, in-ūi Góa beh hō͘ lí tī hia chiâⁿ-chò tōa kok.
46:4 Góa beh kah lí chò-hóe lo̍h-khì Ai-gi̍p, Góa mā it-tēng ē koh chhōa lí tńg-.lâi; Iô-sé-huh beh chhiú-hōaⁿ lí ê ba̍k-chiu, hō͘ lí thang an-jiân kheh ba̍k. "
46:5 Iâ-kop chiū tùi Bel-sí-bah chhut-hoat; I-su-la-el hiahê kiáⁿ hō͘ in ê lāu-pē Iâ-kop kah in ê bó͘-kiáⁿ lóng chē tī Hôa-láu só͘ chhe lâi beh chài i ê chhia.
46:6 Iâ-kop kah i só͘-ū ê kiáⁿ-sun tòa in ê chengseⁿ kah tī Ka-nân tē só͘ tit tio̍h ê châi-bu̍t, lóng lâi-kàu Ai-gi̍p.
46:7 Iâ-kop chhōa i ê kiáⁿ, sun, chabó͘ kiáⁿ, chabó͘ sun kah i só͘-ū ê kiáⁿ-sun, lóng lâi-kàu Ai-gi̍p.
46:8 I-su-la-el lâng lâi-kàu Ai-gi̍p ê, to̍h-sī Iâ-kop kah i ê kiáⁿ, in ê miâ kì tī ē-té: Iâ-kop ê tōa-kiáⁿ Lū-biān.
46:9 Lū-biān ê kiáⁿ, Ha-no͘k, Pa-lú, He-chú-lóng, Kal-mih.
46:10 Si-miān ê kiáⁿ, E-mu-el, Ia-mín, O-hat, Iá-kin, Cho-hal, iáu ū Ka-nân tē ê chabó͘ lâng ê kiáⁿ Sàu-lô.
46:11 Lē-bī ê kiáⁿ, Kel-sióng, Ko-hat, Me-la-lih.
46:12 Iô-tah ê kiáⁿ, El, O-nán, Se-la̍h, Hoa-lè-suh, Cha-la̍h; to̍k-to̍k El kah O-nán sí tī Ka-nân tē. Hoa-lè-suh ê kiáⁿ, He-chú-lóng, Ha-múl.
46:13 It-sa-kal ê kiáⁿ, To͘-la̍h, Phu-oah, Io-buh, Sim-lông.
46:14 Che-bú-lông ê kiáⁿ, Se-lia̍t, E-lóng, Ia-li-el.
46:15 Chiahê sī Le-ah tī Pa-tàn-a-lâm kā Iâ-kop só͘ seⁿ ê kiáⁿ, koh ū i ê chabó͘ kiáⁿ Tí-nah, i ê kiáⁿ-sun lâm-lí chóng-kiōng saⁿ- cha̍p-saⁿ lâng.
46:16 Ga̍t ê kiáⁿ, Che-hui-óng, Hak-gī, Siu-nî, E-chu-bóng, E-lī, Ia-no-ah-tí, A-li-el-lī.
46:17 A-sel ê kiáⁿ, Im-nah, I-si-bah, E-sú-bí, Bê-lô-ia, koh ū in ê sió-mōe Se-la̍h. Bê-lô-ia ê kiáⁿ, He-bel, Mal-ki-el.
46:18 Che sī La̍h-ban hō͘ i ê chabó͘ kiáⁿ Le-ah ê lú-pī Jil-pah só͘ seⁿ ê kiáⁿ-sun, to̍h-sī i kā Iâ-kop seⁿ ê, chóng-kiōng cha̍p-la̍k lâng.
46:19 Iâ-kop ê bó͘ La̍h-khel ê kiáⁿ, Iô-sé-huh kah Biān-iá-mín.
46:20 Iô-sé-huh tī Ai-gi̍p tē seⁿ Má-ná-se kah E-hu-laim, to̍h-sī Ong siâⁿ ê chè-si, Pho-ti-hoe-la̍h ê chabó͘ kiáⁿ, A-se-nat, kā Iô-sé-huh seⁿ ê.
46:21 Biān-iá-mín ê kiáⁿ, Be-la̍h, Be-kel, A-si-bel, Ge-la̍h, Ná-mān, E-hi, Lo-sih, Mup-pîm, Hup-pîm, Al-toh.
46:22 Che sī La̍h-khel kā Iâ-kop só͘ seⁿ ê kiáⁿ-sun, chóng-kiōng cha̍p-sì lâng.
46:23 Tàn ê kiáⁿ, Ho͘-sim.
46:24 Ná-hu-tha-lím ê kiáⁿ, Ia-ji-el, Gu-nî, E-chel, Si-lém.
46:25 Che sī La̍h-ban hō͘ i ê chabó͘ kiáⁿ La̍h-khel ê lú-pī Bil-ha̍h só͘ seⁿ ê kiáⁿ-sun, to̍h-sī i kā Iâ-kop só͘ seⁿ ê, chóng-kiōng chhit lâng.
46:26 Hiahê kah Iâ-kop chò-hóe kàu Ai-gi̍p ê, tû i ê sim-pū í-gōa, kiàn-nā tùi i seng-khu só͘ chhut ê, chóng-kiōng la̍k-cha̍p-la̍k lâng.
46:27 Koh ū Iô-sé-huh tī Ai-gi̍p só͘ seⁿ ê kiáⁿ ū nn̄g-ê. Iâ-kop ê ke lâi-kàu Ai-gi̍p ê, chóng-kiōng chhit-cha̍p lâng.
46:28 Iâ-kop kah i ê Ka-cho̍k Lâi-kàu Ai-gi̍p
Iâ-kop chhe Iô-tah chò thâu khì kìⁿ Iô-sé-huh, thang chhōa in khì Go-sián, in chiū lâi-kàu Go-sián ê tē.
46:29 Iô-sé-huh chún-pī i ê chhia khì Go-sián, i ê lāu-pē I-su-la-el lâi kā i gêng-chiap, kàu kìⁿ tio̍h bīn, chiū phak tī lāu-pē ê ām-kún, tī ām-kún-.ni̍h khàu chin kú.
46:30 I-su-la-el kā Iô-sé-huh kóng, " Góa kìⁿ tio̍h lí ê bīn, chai lí iáu oa̍h-.leh, góa taⁿ sí mā kam-goān. "
46:31 Iô-sé-huh kā i ê hiaⁿ-tī kah lāu-pē ê ke kóng, " Góa beh lâi-khì thong-ti Hôa-láu, kā i kóng, ' Góa ê hiaⁿ-tī kah góa ê lāu-pē ê ke, í-chêng tòa tī Ka-nân tē ê, taⁿ lóng lâi-kàu góa chia.
46:32 In sī bo̍k-chiá, in-ūi in sī chhī chengseⁿ ê lâng, in kā iûⁿ-kûn, gû-kûn kah it-chhè só͘-ū ê lóng tòa-.lâi. '
46:33 Hôa-láu tiàu lín ê sî, nā mn̄g lín kóng, ' Lín chò siáⁿ-mi̍h thâu-lō͘? '
46:34 Lín tio̍h kóng, ' Lí ê lô͘-po̍k, tùi siàu-liân kàu taⁿ, goán liân goán ê chó͘-sian lóng sī teh chhī chengseⁿ. ' Án-ne lín thang lâi khiā tī Go-sián ê tē, in-ūi kiàn-nā chhī chengseⁿ ê lóng sī Ai-gi̍p lâng só͘ thó-ià ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。