約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
42:1 Io-buh ìn Siōng-tè kóng:
42:2 Góa chai Lí bān sū lóng ē; Lí ê chí-ì lóng bē tàng chó͘-tòng-.tit.
42:3 Chit-ê ēng bû-ti lâi khàm ba̍t só͘ gī-lūn ê sī siáⁿ lâng? Só͘-í, góa ū kóng-chhut góa só͘ bô bêng ê, to̍h-sī góa só͘ siūⁿ bē chhut ê kî-biāu, góa só͘ m̄-chai.
42:4 Kiû Lí thiaⁿ, góa beh kóng, góa mn̄g Lí, Lí ìn góa.
42:5 Góa chá-chêng hīⁿ-khang thiaⁿ tio̍h Lí, taⁿ góa ê ba̍k-chiu khòaⁿ tio̍h Lí;
42:6 só͘-í, góa thó-ià kakī, tī tîn-ai kah hóe-hu ê tiong-kan hóe-kái.
42:7 Kiat-bóe ê Ōe
Siōng-tè tùi Io-buh kóng chiahê ōe í-āu, Siōng-tè chiū tùi Thê-man lâng E-lī-hoat kóng, " Góa ê siū-khì tùi lí kah lí nn̄g-ê pêng-iú hoat khí-.lâi, in-ūi lín gī-lūn Góa, bô kóng ha̍p-lí ê ōe, chhin-chhiūⁿ Góa ê lô͘-po̍k Io-buh só͘ kóng ê.
42:8 Taⁿ lín tio̍h ūi kakī chhú chhit chiah gû-káng, chhit chiah iûⁿ-káng, kàu Góa ê lô͘-po̍k Io-buh hia, ūi kakī hiàn sio-chè; Góa ê lô͘-po̍k Io-buh ē thè lín kî-tó; in-ūi Góa beh chiap-la̍p i, bián-tit Góa chiàu lín ê gû-gōng lâi kā lín khoán-thāi; in-ūi lín gī-lūn Góa, bô kóng ha̍p-lí ê ōe, chhin-chhiūⁿ Góa ê lô͘-po̍k Io-buh só͘ kóng ê. "
42:9 Chiū ánne, Thê-man lâng E-lī-hoat, Siú-oa lâng Bil-tat, Ná-má lâng Cho-hoah, chiàu Siōng-tè só͘ bēng-lēng in ê khì kiâⁿ; Siōng-tè mā chiap-la̍p Io-buh.
42:10 Io-buh thè i ê pêng-iú kî-tó ê sî, Siōng-tè chiū hō͘ i ê chêng-hóng ho̍k-goân; jî-chhiáⁿ Siōng-tè siúⁿ-sù Io-buh pí í-chêng só͘-ū ê ka-pōe.
42:11 Hit sî, i ê chèng hiaⁿ-tī, chí-mōe kah í-chêng sio-bat ê lâng lóng lâi kìⁿ i, tī i ê chhù chò-hóe chia̍h, ūi tio̍h Siōng-tè só͘ kàng-lo̍h tī i só͘-ū ê chai-hō, lóng pi-siong lâi kā i an-ùi; ta̍k lâng sàng i chi̍t tè gîn, ta̍k lâng sàng i chi̍t-ê kim-khoân.
42:12 Án-ne, Siōng-tè sù-hok Io-buh ê bóe-kéng iâⁿ-kòe i ê khí-thâu; i ū iûⁿ chi̍t-bān sì-chheng, lo̍k-tô la̍k-chheng, gû chi̍t chheng tùi, lî-bó chi̍t chheng.
42:13 I mā ū chhit-ê kiáⁿ kah saⁿ-ê chabó͘ kiáⁿ.
42:14 I kā tōa chabó͘ kiáⁿ ê miâ kiò-chò E-mi-mah, tē-jī-ê miâ kiò-chò Ke-chi-ah, tē-saⁿ-ê miâ kiò-chò Ke-lian-hap-phuk.
42:15 Hit só͘-chāi só͘-ū ê chabó͘ lâng, chhōe bô chhin-chhiūⁿ Io-buh ê chabó͘ kiáⁿ hiahni̍h súi; in ê lāu-pē hō͘ in tī hiaⁿ-tī tiong tit tio̍h sán-gia̍p.
42:16 Chit sî í-āu, Io-buh koh chia̍h chi̍t-pah sì-cha̍p hòe, tit tio̍h khòaⁿ tio̍h i ê kiáⁿ, i ê sun, kàu sì tāi.
42:17 Án-ne, Io-buh nî-hòe lāu, ji̍t-chí móa, chiū sí.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。