約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
38:1 Siōng-tè Hôe-tap Io-buh
Hit sî, Siōng-tè tùi tōa hong ê tiong-kan ìn Io-buh kóng:
38:2 Taⁿ chi̍t-ê ēng bû-ti ê ōe hō͘ só͘ gī-lūn ê bô bêng, i sī siáⁿ lâng?
38:3 Lí tio̍h hâ io chhin-chhiūⁿ tāi-tiōng-hu, góa mn̄g lí, lí ìn góa.
38:4 Góa hē tē ê tē-ki, hit sî lí tī tó-ūi? Lí nā chai-iáⁿ chiū kóng chhut-.lâi.
38:5 Siáⁿ lâng tiāⁿ tio̍h i ê chhùn-chhioh, siáⁿ lâng khan chîn-soh tī i ê téng-bīn, lí kám chai?
38:6 I ê tē-ki chhāi tī siáⁿ-mi̍h ê téng-bīn? Á-sī i kak-thâu ê chio̍h sī siáⁿ lâng an-tì?
38:7 Hit tong-sî, thiⁿ-kng chá-khí ê chheⁿ chò-hóe chhiùⁿ koa; Siōng-tè ê chèng kiáⁿ-jî mā lóng chhut hoaⁿ-hí ê siaⁿ.
38:8 Tōa hái chhiong chhut, chhin-chhiūⁿ tùi thai-.ni̍h chhut-.lâi, hit sî, siáⁿ lâng ē-tàng ēng mn̂g kā i koaiⁿ khí-.lâi?
38:9 Hit sî, góa ēng hûn chò i ê saⁿ, ēng o͘-àm chò pò͘ kā i pau khí-.lâi;
38:10 kā i tiāⁿ tio̍h Góa só͘ li̍p ê kài-hān, koh kā i siat mn̂g-chhòaⁿ kah mn̂g.
38:11 koh kóng, lí thang kàu chia, m̄ thang pôaⁿ-kòe, lí kiau-ngō͘ ê éng kàu chia ûi-chí.
38:12 Tùi lí chhut-sì ê ji̍t í-lâi, lí bat bēng-lēng chá-khí sî, hō͘ thiⁿ-kng chá-khí chai i ê só͘-chāi;
38:13 lí kám ū hoat-tō͘ hō͘ kng khiú tē ê sì-ke̍k, thang kā pháiⁿ lâng kóaⁿ chhut-.khì?
38:14 Tē-bīn chiū ánne piàn-ōaⁿ chhin-chhiūⁿ khàm ìn ê thô͘, bān-mi̍h hián-hiān chhin-chhiūⁿ saⁿ-khò͘ ê chhái-sek.
38:15 Pháiⁿ lâng só͘ sǹg-chò in ê kng, taⁿ tùi in siu tò tńg-.lâi, gia̍h koân ê chhiú ē siū at-tn̄g.
38:16 Lí kám bat ji̍p-khì hái ê chúi-goân? Á-sī bat kiâⁿ tī chhim-ian pì-bi̍t ê só͘-chāi?
38:17 Sí-bông ê mn̂g ū kā lí khui? Sí-ìm ê mn̂g lí kám bat khòaⁿ-.tio̍h?
38:18 Tē ê khoah-tōa, lí kám khòaⁿ ū thàu? Lí nā choân-pō͘ lóng chai, chò lí kóng chhut-.lâi.
38:19 Kng-bêng tòa ê só͘-chāi, hit tiâu lō͘ tùi tó-ūi khì? O͘-àm ê só͘-chāi tī tó-ūi?
38:20 Lí kám chai án-chóaⁿ chhōa i tńg-khì i ê kéng-kài? Lí kám ē chai-iáⁿ thàu kàu i ê chhù ê lō͘?
38:21 Lí chai lah, in-ūi hit sî lí í-keng chhut-sì, lí ê nî-hòe mā í-keng chē.
38:22 Lí bat ji̍p-khì seh ê khò͘-pâng, á-.sī khòaⁿ tio̍h pha̍uh ê kim-khò͘,
38:23 Kám to̍h-sī góa só͘ siu-chông lâi thèng-hāu hoān-lān ê kî, thèng-hāu sio-thâi kau-chiàn ê ji̍t?
38:24 Kng tùi siáⁿ-mi̍h lō͘ hun-khui? Tang-hong tùi siáⁿ-mi̍h lō͘ sì-kè chhoe tī tē-chiūⁿ?
38:25 Siáⁿ lâng kā tōa hō͘-chúi khui lō͘; á-.sī chún-pī lûi-tiān ê lō͘?
38:26 Siáⁿ lâng lo̍h hō͘ tī bô lâng ê tē, tī bô lâng tòa ê khòng-iá?
38:27 Siáⁿ lâng hō͘ pha-hng ê tē tit tio̍h kàu-gia̍h ê chúi, hō͘ chheⁿ-chháu hoat khí-.lâi?
38:28 Hō͘-chúi kám ū lāu-pē? Lō͘-chúi chi̍t tiám chi̍t tih sī siáⁿ lâng seⁿ ê?
38:29 Peng tùi siáⁿ-mi̍h ê thai chhut-.lâi? Thiⁿ ê sng sī siáⁿ lâng seⁿ ê?
38:30 Chiahê chúi kiat-peng chhin-chhiūⁿ chio̍h-thâu, chhim-ian ê bīn kiat kui tè.
38:31 Báu-chheⁿ kui chhok, kám sī lí pa̍k ê? Chham-chheⁿ ê tòa kám sī lí tháu-khui ê?
38:32 Lí kám ū hoat-tō͘ hō͘ cha̍p-jī kiong chiàu i ê sî-hāu chhut-.lâi? Koh ín-chhōa Pak-táu-chheⁿ kah i só͘ sio̍k ê chheⁿ?
38:33 Lí kám chai thiⁿ ê tēng-lē? Á-sī siat i ê koân lâi koán-hat tē?
38:34 Lí kám ē chhut siaⁿ kiò hûn, hō͘ hō͘-chúi chin chē jia-khàm lí?
38:35 Lí kám ē hoat-chhut sihnà, in chiū khì, koh tùi lí kóng: Goán tī chia.
38:36 Siáⁿ lâng kā tì-hūi hē tī sim-hoâi? Siáⁿ lâng siúⁿ-sù chhong-bêng tī sim-lāi?
38:37 Siáⁿ lâng ē ēng tì-hūi sǹg hûn ê sò͘-gia̍h? Siáⁿ lâng ē piàⁿ thiⁿ ê phûn?
38:38 Hit sî, tîn-ai chiâⁿ-chò thô͘-môe, thô͘ kám chiū kiat kui thoân?
38:39 Lí kám ū kā bó-sai la̍k tio̍h chia̍h-mi̍h, hō͘ sai-á-thûn thang chia̍h pá?
38:40 Chiū-sī i tī hia̍t lāi thèⁿ-kha, tī ún-ba̍t ê só͘-chāi bih-.leh ê sî.
38:41 O͘-a kiáⁿ ǹg Siōng-tè ai-kiû; bô thang chia̍h poe-lâi poe-khì ê sî, siáⁿ lâng ūi o͘-a chún-pī chia̍h-mi̍h?
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。